​Суута тамиршанай шан

Эрэшүүлэй финальна тулалдаан

Үнгэрһэн долоон хоногой эсэстэ Буряа­дай суута һур харбаашан Ханда-Цырен (Светлана) Дугаровна Гомбожаповагай шангуудта хүртэхын түлөө Буряадай гүрэнэй ехэ һургуулиин нээмэл чемпионат үнгэргэгдэбэ.

Ханда-Цырен Дугаровна Гомбожаповагай 1984 ондо Олимпиин наадануудта ошохоо бэл­дэжэ байхадань, СССР гүрэнэй засаг дарганар тамиршадаа тэндэ эльгээхэгүйбди гэһэн шиидхэбэ­ри абаа бэлэй гээд һануулая. Мүн бусад социалис гүрэнүүд Олимпиадада ошоогүй бшуу. “Друж­ба-84” гэһэн уласхоорондын мүрысөөндэ Ханда- Цырен Гомбожапова түрүүлжэ гараһан байна. Тэрэнэй харуулһан дүн Олимпиин наадануудта шүүһэн тамиршанай туйлалтаһаа һайн байгаа һэн. Тиигэжэ элдэб “политическэ наадануудһаа” гү, али дэлхэй дээрэхи зүрилдөөнһөө боложо, Буряадай тамиршан Олимпиадада хабаадажа шадаагүй.

- Мүнөө жэл мүрысөөгөө наймадахияа баяртайгаар үнгэргэжэ байнаб. Һонирхолтойнь гэхэдэ, аяар 50 жэлэй саана, 1968 ондо, анха түрүүшынхиеэ номо һурша гартаа барижа, һорилго хэжэ эхилээ һэм. Ямар түргөөр саг ябанаб даа, - гэжэ Ханда-Цырен Дугаровна һанамжалан хэлэнэ.

БГУ-гай талмай дээрэ гурбан үдэрэй туршада энэ мүрысөөн үргэлжэлһэн байна. Майн 20-до хэды шангаар һалхилбашье, түгэсхэлэй уулзал­ганууд хубиин тоосоондо үнгэргэгдөө. Тиихэдэ командна тоосооной тулалдаануудые болюулха гэжэ шүүгшэд шиидхэбэри гаргаа.

Хубиин тоосоондо Ородой суглуулагдамал ко­мандын гэшүүн Баир Цыбекдоржиев финалда залуу Сергей Дашиевта шүүгдэбэ. Эхэнэрнүүдэй дунда Анна Балсукова финалда Соёлма Сырено­ватай уулзажа, илалта туйлаа.

Блочно номо һуршаар харбагшадай дунда Виктор Калашников түрүүлээ. Эхэнэрнүүдэй дунда Анна Фёдорова нэгэдэхи һуури эзэлээ.

Авторай гэрэл зураг