896
Бүгэдэ Буряадай уласхоорондын XIII «Алтаргана» фестивалиин нээлгын баяр ёһолол июлиин 6-да Эрхүү хотын «Труд» стадиондо үнгэргэгдэхэ. Энээн тухай хэмжээ ябуулгада бэлэдхэлэй бүлэгэй суглаанда хэлэгдэбэ. «Алтаргана» наадан Эрхүү можодо энээнһээ урид 2008 ондо эмхидхэгдэһэн байна гэжэ һануулнабди.
Бүгэдэ Буряадаймнай «Алтаргана» наадан хоёр жэлэй нэгэ удаа үнгэргэгдэдэг заншалтай. Буряад хэлэ, соёл, ёһо заншал сахин хүгжөөхэ зорилготой хэмжээ ябуулгада буряад арад хаа-хаанаһаа ерэжэ хабаададаг. Энэшье удаа Буряад Улас ,Эрхүү можо, Үбэр Байгалай хизаар болон Ородой Холбоото Уласай бусад можо нютагуудта ажаһуудаг, тиихэдэ Хитад, Монгол болон бусад гүрэнүүдтэ ажаһуудаг угсаата араднай «Алтаргана» нааданда хабаадаха юм.
«Алтаргана» нааданда хабаадагшад июлиин 4-дэ бууха. Июлиин 5-да «Этнокультурные бренды Байкальского региона» гэһэн эрдэмэй-зохёохы уласхоорондын хуралдаан үнгэргэгдэхэ. Алтаргана» фестивалиин нээлгын баяр ёһолол июлиин 6-да Эрхүү хотын «Труд» стадиондо үнгэргэгдэхэ. Энэл үдэр фестивалиин зохёохы 14 шэглэлээр мүрысөөн эхилхэ юм. Нэрлэбэл, «Дангина», «Буряад дэгэл: ёһо заншал болон мүнөө үе саг» гэһэн хубсаһа зохёон оёгшодой мүрысөөн, «Буряадай нэгэ үдэр» гэһэн арадай аман зохёолой бүлэгүүдэй урилдаан, «Нангин бууса», буряад арадай болон мүнөө үеын дуунуудые гүйсэдхэгшэд, үльгэр түүрээгшэдэй мүрысөөнүүд болоно. Гар урлалай бүхы янза болон һалбаринуудай бүтээлнүүдэй үзэсхэлэн дэлгэгдэхэ.
Июлиин 6-да «Шатар» наадан, бүхэ барилдаан, һээр шаалга болон шагай наадаар, буряад номо һуршаар мүрысөөнүүд эхилжэ, хоёр үдэрэй туршада үнгэргэдэхэ.
Июлиин 8-да Эрхүү аймагай «Черёмушки» гэһэн мори урилдаанай-тамирай комплексдо мори урилдаан эхилхэ. Буряад үүлтэрэй морид 4000 болон 11200 метрэй зайда гороолон бэшэ, харин сэхэ газарта урилдаха. Июлиин 8-да, фестиваль хаалгын баяр ёһололой үдэшэ, тамирай болон зохёохы мүрысөөнүүдтэ илагшадые шагналга үнгэргэгдэхэ.
Эрхүү можын Эрхүү хото болон Усть-Орда һууринда «Алтаргана» наадан үнгэргэгдэхэ. Эрхүү хотын «Труд» гэһэн тамирай ордондо, «Труд» стадиондо, Молчанов-Сибирскиин нэрэмжэтэ номой санда, Загурскын нэрэмжэтэ театрта хэмжээ ябуулганууд эмхидхэгдэхэ. Усть-Орда һууринда Усть-Ордагай Буряадай тойрогой үндэһэтэнэй музейдэ, сүлөө сагаа үнгэргэлгын «Наран» түбтэ, «Эрдэм» кино болон тоглолтонуудай байшанда Бүгэдэ Буряадай «Алтаргана» фестивалиин хэмжээ ябуулганууд үнгэргэдэхэ юм. Тиихэдэ Эрхүү хотодо «Труд» гэһэн тамирай ордоной дэргэдэхэи талмайда табан һэеы гэрнүүд табигдаха. Эндэ нютагаа түлөөлжэ ерэһэн зоной үзэсхэлэн дэлгэгдэхэ юм.
Анна Огороднигой гэрэл зураг
