Никита Хрущёвой партиин 1-дэхи секретарь байха үедэ ехэ-ехэ ажахынууд байгуулагдаа. Тиигэжэ 1969 ондо Хурамхаанай совхоз бии боложо, тэрэнэй хүтэлбэрилэгшөөр Вандан Бадмаевич Базаров томилогдобо. Тэрэ сагта Дээдэ Баргажанда (мүнөө Хурамхаанай аймагта) В.И. Ленинэй ба М.И. Калининай нэрэмжэтэ колхозууд ба Хурамхаанай совхоз ородог hэн. Дэрээн, Гаарга ба Сахули совхозой таhагуудай тоодо орогшо бэлэй. Тиихэдээ мүнөө баhал Хурамхаан аймагай хахадhаа ехэ хубииень эзэлдэг байгаа.
Борис Вандановичай түрэhэн нютагынь Хурамхаан тосхон болоно. Тиихэдэ Вандан Бадмаевич Хурамхаан аймагай партиин хоёрдохи даргаар хүдэлдэг байһан юм. Ажахын даргаар хоёрдохиёо ерэhэн гээшэ.
Тэдэнэй эсэгэнь Базаров Вандан Бадмаевич Буряад Уласта олониитын ба улас түрын ажаябуулагша. Мэдээжэ сэтгүүлшэн Павел Натаев «О жизни и времени» гэжэ ном соогоо бэшэнэ: «Вандан Бадмаевич - бэрхэ хүн. Бодомжолжо, шэнжэлэл хэжэ hураhан, өөрын hанал бодолтой. Совет засагай үедэ тиимэ зондо хүшэр хүндэнь гайхамаар бэшэ hэн. Хүдэлмэришэ, олоной ажалай түлөө хам орожо ажалладаг, нүхэдтөө, хамта хүдэлhэн зондоо хүндэтэй ябадаг бэлэй».
Энэ статьягай автортай хэды дахин Вандан Бадмаевич ветерануудай госпитальдо арга абаа. Нэгэтэ ветеранай госпитальдо нэгэ палатада хэбтээд, хөөрөөшыень мартангүй hанажа ябадагби: «Эсэгэ ороноо хамгаалгын Агууехэ дайнай үедэ үетэн басагадаараа бааржада хонидые ашаад, Посельск хүрэжэ, Уланай колхозой зүгһөө гүрэндэ тушааха байгаа. Талаан болоходоо, тэдэнэй бааржада Баргажанай Адагhаа арга абаhан сэрэгшэд hуужа, тэдэнэй ашаар урбалдангүй, бааржань Посельск тосхоноо хүрэжэ, хонидоо гүрэндэ тушаагаа. Эхэнь зүдэршэhэн хүбүүнэйнгээ орожо ерэхэдэнь, үхөө гэжэ тоолоһон аад, мэдээгээ алдан унаба», ― гэжэ Вандан Бадмаевич хөөрэдэг бэлэй. Вандан Бадмаевичай хани нүхэр Цыренова Вера Малановна болоно. Тэдэнэй хүбүүд: Баир, Валерий, Борис.
Мүнөө Борис Ванданович тухай хөөрэнэб. Тэрэ 1960 ондо Хурамхаан тосхондо түрөө. Улаан-Үдын 1-дэхи hургуули дүүргэhээр Буряадай багшанарай дээдэ hургуулиин түүхын, хэлэ бэшэгэй таhагта орожо hураhан байна. 1981 ондо дээдэ hургуулияа улаан дипломоор дүүргээд, хоёр жэл комсомолой эмхинүүдтэ хүдэлөө. 1983 ондо Валентина Владимировнатай хуби заяагаа ниилүүлжэ, хожомынь тэдэнэр Виктор ба Александр хүбүүдые тэнжээгээ. 1984-1987 онуудаар Эрхүүгэй гүрэнэй университедэй дэргэдэхи аспирантура дүүргэжэ, түүхын эрдэмэй кандидадай нэрэ зэргэдэ хүртэбэ. Удаан татангүй, 1990 ондо түүхын доктор болобо, гушаад наhандаа тиигэжэ залуу докторнуудай дунда ёhото hуурияа эзэлбэ.
25 жэлhээ үлүү Борис Ванданович эрдэмэй түбэй институдай хүтэлбэрилэгшэ ябаа. Эрдэмтэд мүнөө Монгол орониие шудална, буддын шажан болон Түбэд орониие шэнжэлнэ. Эрдэмэйнь гол шэглэлынь Түб Азиин түүхэ ба соёл, нүүдэл байдалтай гүрэнүүдые шэнжэлгэ болоно гээшэ. Мүнөө сагта дээдэ hургуули хүгжэнэ, хани барисааниинь бэхижэнэ. Монгол, Хитад, Энэдхэг ба ондоошье гүрэнүүдээр Борис Ванданович ажалаараа ябажа, хэды сагаа эдихэ болоноб даа. Элдэбын суглаанууд, олон эрдэмэй хэрэгүүд. Б.В. Базаров 224 эрдэмэй хүдэлмэриин ба 17 монографиин автор болоно. Тэрээнhээ гадна тэрэниие багшамнай гэдэг эрдэмэй доктор - 14 хүн, эрдэмэй кандидат - 28 хүн гээшэ. Борис Вандановичта Буряад Уласай габьяата ажал ябуулагшын нэрэ олгобо (1998), Гүрэнэй шангай лауреат (2002), эрдэмтэ В.А. Коптюгай дурасхаалда зорюулагдаhан «Великий учёный и патриот» гэһэн медаляар шагнагдаба, Хитад гүрэнэй хоёр дээдэ hургуулиин «Хүндэтэ профессор» гэжэ нэрэ зэргэдэ хүртэнхэй. Монголой эрдэмэй академиин алтан медаляар (2006), Хани барисаанай орденоор (2007), Чингисхаанай «Алтан гадаhан» гэжэ орде- ноор (2011), “Монголой габьяата ажал ябуулагша” (2013), “Монголой нүүдэлшэ арадай хүндэтэ гэшүүн” (2014) гэһэн нэрэ зэргэнүүдтэ хүртэнхэй. Б.В. Базаровай бодото гэшүүн болоод байхада, мэдээжэ сэтгүүлшэн Сергей Басаев «Новая Бурятия» гэжэ сониной декабриин 5-ай дугаарта тэрээнтэй хөөрэлдөө толилhон байна. Тиихэдээ эрдэмтэн замдань тэдхэмжэ хэһэн багшанараа дулаанаар дурдаhаниинь мэдээжэ. Марк Васильевич Мохосоев буряад угсаатанай дундаhаа түрүүшын гэшүүн-корреспондент боложо, “үүдэ” нээhэн гээшэ. 2016 ондо Арнольд Тулохонов Борис Ванданович хоёр хадаа, нэгэниинь Москвагай, нүгөөдэнь РАН-ай Сибириин таhагай академигүүдэй нэрэ зэргэдэ хүртэхэдэнь, бахархамаар ба омогорхомоор лэ.
Б.В. Базаровай ударидалга доро «Историческо-культурный атлас Бурятии», «Буряад Улас» гэhэн тайлбари толи, «История Бурятии» гэhэн гурбан боти ном болон бусад олон тоото эрдэмтэнэй согсолборинууд хэблэгдэhэн байна. Тэрээнhээ гадна Борис Ванданович Буряад Уласай Арадай Хуралай һунгамал. Тиигэжэ Буряадай түрүү зоной дунда ябана гээшэ.
Даши АЮШИЕВ, Буряад Уласай соёлой габьяата хүдэлмэрилэгшэ, Буряад Уласай Уран зохёолшодой холбооной гэшүүн, Агван Доржиевай медаляар шагнагдаһан