Москва хотодо ушугаар Европын чемпионат наһанай илгаагаар дүрбэн бүлэг боложо хубааран үнгэргэгдэбэ. Буряадай тамиршад эндэ ялас гэмэ амжалтануудые туйлажа, спортдо дуратай олон зониие баярлуулаа.
25 гаран жэлэй туршада ушу Буряад орондо нэбтэрүүлэгдэнэ. Тэрэ гэһээр манай тамиршад ходо амжалтануудые туйлана. Энэшье удаа Игорь Марковецын шабинар дахинаа түрүүшүүлэй тоодо оролсобо.
Анна Шатаева нёдондо ехэшүүлэй дунда хабаадажа эхилһэн юм. 2017 ондо Анна дэлхэйн чемпионой нэрэ зэргэдэ абаһаар лэ хүртөө һэн. Мүнөө бэлигтэй тамиршан үндэр нэрэ зэргэтэй байһанаа гэршэлбэ. Европын тулалдаануудта түрүүшынхиеэ хэды оролсобошье, Анна Шатаева хоёр дахин чемпион боложо тодороо. Хажуугаарнь тэрэ мүнгэн медаль абаа.
- Мүрысөөнэй болохоо байхада, Анна хүл дээрээ халуун уһа адхажархиһан байна. Үглөөдэрынь бодоходонь, хүлниинь ехээр хабдажа, пүсхышөө. Гуталыншье багтахаа болишоо. Яранууд соохи эдеэрыень зүүгээр хадхажа гаргаад, гуталаа үмдөөд, хибэс дээрэ гараһан байна, - гэжэ Игорь Марковец хатуу зоригтой басаган тухай хөөрэнэ.
Эдиршүүлэй дунда мүрысөөндэ Лена Ижевская нэгэ-нэгэн алтан ба хүрэл медальнуудтай гэртээ бусаба. Тиихэдэ Аэлита Чагдурова болон Номина Шамбеева гэгшэд мүнгэн медальнуудые абаба. Альбина Арамхиева гурбадахи һуурида гараа.