Хүдөөгэй спортын нааданууд мүнөө жэл Түнхэн аймагта болохоор хараалагдана. “Буряадай хүдөөгэй Олимпиин нааданууд” гэжэ арад зоной дунда нэрлэгдэһэн хэмжээ ябуулга июниин 20-23-ай үдэрнүүдтэ үнгэргэгдэхэ.
Тус хэмжээ ябуулгада ехэ бэлэдхэл боложо байна. Түнхэн аймагай засаг даргын уялгануудые саг зуура дүүргэгшэ Вячеслав Цыбикжаповай хүтэлбэри доро үглөө бүри бэлэдхэлэй талаар суглаан эмхидхэгдэнэ. Тэндэ ушарһан бэрхэшээлнүүд тэрэ дары усадхагдана.
Нээлгын болон хаалгын баяр ёһололнууд Хэрэн һууринай түбэй стадион дээрэ болохо юм. Тэндэ барилдаагаар, гар тулалдаагаар, хүнгэн атлетикээр, футболоор мүрысөөнүүд үнгэргэгдэхэ. Тиимэһээ стадион һэльбэн шэнэлэгдэнэ. Харагшадай һууха трибунанууд заһабарилагдаа, гүйдэг зүргэнүүд шэнэ гурим маягаар бүтээгдэнэ.
Аршаан һууринда тамирай зал соо волейболоор мүрысөөн үнгэргэгдэхэ. 2010 оной хүдөөгэй үбэлэй спортын наадануудта энэ спортын танхим бодхоогдоо һэн гээд һануулая. Харин мүнөө наадануудта шэнэ лукодром баригдажа байнхай. Мэдээжэ һоригшо Сэсэг Доржиевагай хэлэһээр, энэ барилгые һуршад үнинэй хүлеэһэн юм.
- Иимэ гоё лукодромтой болохоо байхадаа, бишье, миниишье шабинар ехэ баяртай байнабди. Эндэ 15 щит табяад, нэгэ дороо харбаха арга олгогдоно. Мүн тиихэдэ хүн зоной һуудаг хушамал трибуна баригдана. Наранһаа, хура борооһоошье тэрээн доро хоргодохо аргатай болохомнай, - гэжэ Сэсэг Петровна баяраа мэдүүлнэ.
Һүүлэй арба гаран жэлдэ Аршаан һууринай харбаашад уластаа, бүхэроссиин болон уласхоорондын мүрысөөнүүдтэ хабаадажа, нютагаа суурхуулна. Соёлма Сыренова, Янжина Доржиева, Виктория Харитонова гэгшэдэй нэрэ олондо мэдээжэ.
Туран һууринда футболой тулалдаанууд үнгэргэгдэхэ. Эндэхи ажаһуугшад нааданай болохые хүлеэшэнхэй. “Айлшадые угтахадаа, гэрээ сэбэрлэ” гэһэндэл нютагайнгаа газаа зосоохиие сэбэрлэнэ, угаана, хорёо хашаагаа шэнэлнэ.
- Нааданууд манай һууринда болохо гээд, бүхы хүнүүднай баяртай. Бултаараа хамтаржа, хэдэн удаа субботник үнгэргөөбди. Нааданай урдахана үшөө нэгэ иимэ хэмжээ ябуулга эмхидхэхэ һанаатайбди. Манай стадион дээрэхи трибуна хуушаршаһан байгаа. Эдэ наадануудай ашаар шэб шэнэ трибуна баригдаа, талмай сэхэлэгдээ, - гэжэ “Туран” гэһэн хүдөө ажахын сомоной дарга, гиир үргэлгөөр дэлхэйн абарга Владимир Хармакшанов хөөрэнэ.
Наадануудта зорюулагдаһан һонинуудтай tunka-sport.ru гэһэн сайт дээрэ танилсахаар.
Авторай гэрэл зурагууд