​Хүүгэд яажа амарнаб?

26-дахи һургуулиин шабинар

Ааяма зунай аятайхан хаһа эхилжэ, һургуулиин үхибүүдэй амаралтын саг ту­дажа ерэбэ. Үхибүүд хаана, хэзээ, ямар газарта амарха арга­тайб, түлбэринь хэды байхаб гэһэн асуудалнуудаар түрэлхид ехэтэ һонирхоно.

Хотын һуралсалай хорооной нэ­мэлтэ болбосоролой таһагай дарга Серафима Гарматаровагай мэдээсэһээр, хото шадархи болон хотын һургуулинуудта эмхидхэгдэдэг үдэртөө байлгын лагерьнууд хүдэлжэ эхилэнхэй. Үглөөнэй 9 сагһаа үдэрэй 5 саг боло­тор үхибүүд багшанарай харууһан доро аша үрэтэйгөөр сагаа үнгэргэхэ аргатай. Тиихэдэ үдэрэй туршада гурба дахин хоолложо, амтан эдеэ­гээр хангагдана. Һургуулиин дэргэ­дэ эмхидхэгдэһэн лагерьта үхибүүгээ ябуулха гэбэл, түрэлхид 2748 түхэриг мүнгэ гаргашалха болоно. Гэрһээ холо ошонгүй үхибүүгээ амаруулха гэ­бэл, һурадаг һургуулидань түрэлхид эртээнһээ мэдүүлгэ бэшэхэ ёһотой. Түлбэриин 412 түхэриг хүнгэлэлтэтэй мүнгыень түрэлхид, үлээшыень гүрэн даажа абаха ушартай.

Амархын хажуугаар һурагшадта ажал хэжэ, салин хүлһэндэ хүртэхэ арга мүн лэ олгогдоно. Энэ ажаябуулга хадаа мүнөө жэл хотын 39 һургуулида эмхид­хэгдэбэ. Тэндэ 14 наһа хүсэһэн үхибүүд ажаллахаар хараалагдана. Үглөөнэй 9 сагһаа үдэрэй 2 саг болотор хүдэлхэдөө, хоёр дахин шанар һайтай эдеэгээр мүн лэ хангагдаха юм. Ажалай ба ама­ралгын лагерьта сугларһан үхибүүд ганса ажал хэхэ бэшэ, эдэнэй наһанда таарама һонин-һонин лекци, тренинг болон бэшэшье хэмжээ ябуулганууд түсэблэгдэнхэй. Ажалаар хангалгын түбтэй һургуули тусхай хэлсээ батал­жа, һарын туршада тус лагерьта ябаһан һурагша бүхэн 1530 түхэриг мүнгөөр олзотохо аргатай бшуу.

Хото шадархи лагерьта үхибүүгээ амаруулхаяа һанаһан ажалтай зон 18 мянганһаа дээшэ мүнгэ түлэжэ, алибаа лагерьта эльгээхэ арга бии. Гэбэшье бэрхэшээлтэ байдалда ороһон, харгалзалга доро байһан үншэн хүүгэдтэ нэн түрүүн путёв­конууд хубаарилагдадаг гурим­тай. Ажаһуудалай хэсүү байдалда дайрагдаһан хүүгэдэй түлбэрииень бүхэлеэрнь гүрэн даажа абана, нүгөө ушарта 60-80 хубииень түлэхөөр ха­раалагданхай.

“Артек” лагерь ошохо гэбэл...

Ородой Холбоото Уласай Болбо­соролой болон эрдэм ухаанай яаман энээнһээ урид хизаар можонуудаар зүбшөөлтэй һууринуудые хубаарил­даг һаа, мүнөө энэ ажаябуулга нэгэ бага ондоо маягаар ябуулагдадаг бо­лонхой. “Артек” лагериин сайтда пу­тёвконууд дурадхагдана.

Юуб гэхэдэ, Хара далайн гү, али он­доошье газарта ошожо амарха дуратай һурагша бүхэн һуралсалдаа алибаа шэглэлээр шалгарһан һаа, шэлэлгын шата дабажа гарабал, дансануудаа сайтда эльгээхэ аргатай болоһон юм. Хизаар дотороо үнгэргэгдэһэн алибаа тамирай урилдаан гү, али һуралсалай талаар олимпиада гү – энэ шэлэл­гын шата дабаһантай адли болоно. Лагерьтай хани харилсаатайгаар ажалаа ябуулдаг холбоо эмхинүүдэй шэглүүлэгдэмэл урилдаануудта ам­жалта туйлаһан хүбүүд, басагад мүн лэ путёвкодо хүртэхэ аргатай.

Хотын 25-дахи һургуулиин шаби Диана Четвертакова өөрын бэрхэдэ зунайнгаа амаралта таатай зохидоор үнгэргэхэ аргатай болоһондоо ехэ урмашана. “Өөрынгөө амжалтануудые гэршэлһэн саарһа дансануудайнгаа буулгабари лагериин сайтда эльгээ­гээб. Компьютерай ашаар баллнууд тоологдожо, хэдэн хоногой үнгэрһэн хойно “Артек” лагерьһаа хонходоод, намайе уряа. Хара далайн эрьедэ ошо­жо амархаяа түхеэржэ эхилэнхэйб. Түлбэриин хахад сэнгыень Буряад Уласай Болбосоролой болон эрдэм ухаанай яаман дааха”, - гээд өөдэргэ Диана басаган хөөрэһэн байна.

Иимэрхүү аргаар бэшэшье Бүхэроссиин “Океан”, “Орлёнок”, “Смена” лагерьнууд хүдэлдэг болонхой. Нэн түрүүн, Дианын хэлэгшээр, өөрөө бүхы һонинуудые мэдэжэ байбал, зу­найнгаа амаралта мартагдашагүйгөөр үнгэргэхөөр.

Үдэрэй лагерьта

Хотын юрэнхы болбосоролой 26-дахи һургуулиин дэргэдэхи үдэрэй туршада хүдэлдэг лагерь майн 28-һаа июниин 21 болотор үүдэеэ сэ­линхэй. Эхин шатын ангинуудай һурагшад эндэ ябажа, табан отрядта хоорондоо хубаарилагдаһан. Отряд бүхэндэ 25-30 хүбүүд тоологдоно. Майн 31-эй үдэр тус лагериин нээлгын баяр ёһолол үнгэрһэн байна. Эхин шатын классуудые хүтэлэн яба­даг багшанарһаа гадна англи, буряад хэлэнэй багшанар, тиихэдэ ахалаг­ша классуудай хүбүүд, басагад вожа- таар ээлжэлэн мүн лэ эндэ ажаллана. Бүхы үдэрнүүдынь түсэбэй ёһоор зо­хёогдонхой: янза бүриин викторина, урилдаан г.м. Театр, бассейн, циркдэ ошохоор хараалагдана.

Июниин 1-эй һайндэртэ зэргэлээд байгаа Сенчихинэй нэрэмжэтэ сквер­тэ хүүгэдтэеэ ошожо, зүжэглэмэл наа­данда хабаадаһан байха юм. Шог зуга­атай, дуу шуутай нааданда һурагшад хабаадажа, үнэнхэ зүрхэнһөө баяр­лаа. Арадай Хуралай һунгамал Вадим Бредниин заншалта ёһоор багашуул­да бэлдэһэн хоол - амтатай бэлэг эдеэниинь мүн лэ олондо һайшаагдаа. “Үдэрэй туршада лагерьта хүүгэд гансашье амарна бэшэ, элдэб шэглэ­лээр хэшээлнүүдые үнгэргэнэбди, гурба дахин эдеэлхэ аргатайбди, гад­на амаржа, үдэһөө хойшо зали абаха арга мүн лэ хүүгэдтэмнай олгогдоно”, - гээд, тэндэ үхибүүдтэй ажаллажа байһан буряад хэлэнэй багша Елена Батуева хөөрэнэ.

Авторай гэрэл зураг