1005
Буряад Уласай Арадай Хуралай хэблэлэй албанай гэрэл зураг
Байгша оной июниин 15-да можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар Арадай Хуралай хорооной һунгамалнууд ДОСААФ-ай нютаг можын таһагай ажалтай танилсаа.
Тус ябалганда хорооной түрүүлэгшэ Цыденжап Батуев, Арадай Хуралай һунгамалнууд Валерий Доржиев, Сергей Леонов, Оксана Бухольцева, Баир Цыренов, болбосоролой яаманай, спортын болон залуушуулай бодолгын яаманай түлөөлэгшэд хабаадаба.
Буряад Уласта ДОСААФ-ай нютаг можын түрүүлэгшэ Алексей Шагаев ерэһэн зониие эмхеэр ябуулжа харуулаа. Һунгамалнууд буудалгын тир, спортзал, жолоошодые бэлдэлгын класс хараба. Тэдэнэр “Корнет” гэһэн дайшалхы- эхэ орондоо дуратайшуулай клубай хэшээлдэшье байгаа. Мүнөөдэр ДОСААФ-та гансал жолоошодой бэлдэлгэ Ород уласай хамгаалгын яаманай даабаряар хэгдэнэ. Бэшэ бусад һуралсалай курсанууд һуралсалай эмхиин өөрын үүсхэл.
Алексей Шагаевай мэдүүлһээр, тэдэнэр ерээдүйн ехэ түсэбүүдтэй. Лазертаг, пейнтболдо полигон бариха, парашютистнуудые бэлдэдэг болохо.
Нэн түрүүн самолёдой һууха авиациин талмай нээхээр газар гаргаха. Тус асуудалые шиидхэхын талаар Ивалга аймагай Оронго нютагһаа холо бэшэхэнэ совет үеын сагай ДОСААФ-ай аэродромой газар хараалагдана. Энэ газар хүдөө ажахын газарнуудай тоолоһон тоодо оролсоно. Тиимэһээ Оронго һомоной хүтэлбэрилэгшэтэй хөөрэлдэхэ хэрэгтэй. Энэ шухала асуудалые һунгамал Цыденжаб Батуев ажалай протокол руу оруулха гээд хэлээ.
Эхэ орондоо дуратай залуушуулые хүмүүжүүлгын талаар элдэб албан газарнуудые суг хамта ажаллажа һургаха гэһэн шухала зорилго табигдана.
Мүнөөдэр тус зорилгые болсоролой яаман, спортын болон залуушуулай бодолгын яаман, ДОСААФ-ай нютаг можын таһаг бэелүүлнэ. Иимэ ахир байдал мүнгэн һангай гаргаша хии болгон дууһана. Эдэй болон хүнэй ресурснууд баһал болгоомжогүйгөөр хэрэглэгдэнэ.
Жэшээлбэл, спортын, аяншалгын, эхэ орондоо бодоһон (патриотическа) уласай түб болбосоролой яаманай мэдэлдэ. Түбэй мэргэжэлтэд ахир тулюур байшанда хүдэлнэ. Мүнгэнэй талаар түб дуталдана.
Гансал ДОСААФ-та эдэй болон хэрэгсэлэй (техникын) база бии. Тиин залуушуулай бодолгын болон спортын яаман өөрын подпрограмма бэелүүлнэ.
Ажалаа үрэжэлтэйгөөр эмхидхэхын тула ДОСААФ-та бултанай хүсэ нэгэдүүлжэ, ажал бүридхэхэ хэрэгтэй гээд хэлсэгдээ. Тиимэһээ спортын, аяншалгын, эхэ орондоо бодоһон (патриотическа) уласай түб иишэнь оруулха тухай хэлэгдэбэ. Харин ДОСААФ-ай таһагуудые хэрэглэһэнэй түлөө түлбэринь 3 сая түхэригэй болошоходоо, тус түбтэ хэсүү болошохо.
Тиихэдэнь һунгамал Цыденжаб Батуев иимэ һанамжа оруулаа: “Талмай болон хэрэгсэл ДОСААФ-һаа миинтэ эрижэ болохогүй. Харин хуулиин ёһоор Уласай мүнгэн һанһаа (казна) энэ түлбэрииень түлэхөөр бэшэ. Бюджетнэ Кодекс гэһэн хуули ёһоной дансаар бүтэхэгүй ха юм. Харин бидэ газарай болон эдэй талаар гүрэнэй татабарида хүнгэлэлтэ хэхэ эрхэтэйбди. ДОСААФ-ые эдэй болон хэрэгсэлэй уласай программаар хангаха аргатайбди.” Зүблөөнэй дүнгүүдые согсолходоо, Цыденжаб Батуев шухала асуудалые шиидхэжэ ажал ябуулагдаха тухай найдуулаа.
