​Японтой хамтаржа хүдэлхэ яһалхан арга боломжо

Буряад уласай засагай газарай хэблэлэй албанай гэрэл зураг

Буряад Уласай Толгой­логшо Алексей Цыде­нов түрүүтэй бүлэг ту­шаалта нюурнууд Япон гүрэнөөр албан ёһоной хэрэ­гээр ябажа ерээ.

Хоёр гүрэнэй хоорондохи ха­рилсаанай хүгжэлтын алхамууд тухай аша үрэтэй хөөрэлдөөн үнгэргэгдэһэн байна. Юуб гэ­хэдэ, Буряадта хилын саанаһаа ажаүйлэдбэридэ хүрэнгэ оруулха асуудалаар тусхай хөөрэлдөөн, хэдэн тээ ажал хэ­рэгэй уулзалганууд эмхидхэг­дээ. Энэ хадаа мүнөөдэрэй бай­далаар шухала асуудалнуудай нэгэн болонхой. Тодорхойлбол, энэ ябадал эдэй засагай талаар эдэбхи үүсхэл улам дээшэлүүлхэ гэжэ ойлгохо шухала.

Буряад ба япон компани­нууд “В2В” («Бизнес для Биз­неса») түхэлөөр хөөрэлдөөгөө ябуулжа, саашадаа суг хамта бэелүүлхэ шэнэ түсэлнүүдэй түсэбүүдые табиһан байнад. Манай гүрэнтэй худалдаа най­маа ябуулхын талаар эблэлэй юрэнхылэгшэ Хироши Мегуро, Ородой Холбоото Уласай бүрин эрхэтэ түлөөлэгшэ элшэн сайд Михаил Галузин, Японидо ма­най гүрэнэй худалдаа наймаа­най түлөөлэгшэ Сергей Егоров, НЕДО жасын Засагай газарай гүйсэдхэхы захирал Шоджи Ку­кита болон бусад тус ажаябуул­гада хабаадаа.

“Буряад ороной дэбисхэр алишье талаараа угаа баян юм. Ашагта малтамал гү, али ойн ажахын үйлэдбэри гү, аяншал­га болоод эм домой бүридэлдэ ородог хоморой ургамалнуудааршье хараад үзэхэдэ, шэлэн хүдэлхэ шэглэлнүүд ехэ олон. Улаан-Үдын авиазавод абаад үзэбэл, вертолёдоор ханга­ха ба тэрэнэй хэрэгсэлнүүдые бүридхэн суглуулха талаар Япон гүрэнэйхид ехэтэ һонирхожо, ерээдүйн арга боломжонууд тухай мүн лэ зүбшэн хэлсэһэн байнабди”, - гэжэ уласай Толгой­логшо Алексей Цыденов тэмдэглэбэ.

НЕДО жасын Засагай газа­рай хүтэлбэритэй хүдэлхэ зуураа саашанхи һайн ерээдүйе хараалһан ажалай түсэбүүд тухай ба ажаһуудалай хог хаягдалнуудые буйлуулан үйлэдбэрилхэ талаар MHIEC компаниин онол арга хэрэглэл­гэ тухай дэлгэрэнгы хөөрэлдөөн үнгэрөө. Тус компаниин онол аргаар тусхай завод баригдабал, жэлэй туршада 72 мянган тонно хог хаядаһан ашаглагдаха арга олгогдохоор байна.

“Хоёр талаһаа аша үрэтэй, хэн хэндэ һонирхол түрүүлмэ энэ асуудалаар инвесторнүүдые бэдэрхэ хараа зорилготойбди. Эндэ ерэхэдээ, бидэ юумэ эри­хэеэ ерээ бэшэбди, суг хамта ажалаа ударидан ябуулха ба хоёр талын арга боломжонуу­дые элирүүлхэ һанаатайбди. Ти­игэжэ хилын саанаһаа хүрэнгэ оруулха аргын олдобол, манай нютагай саашанхи хүгжэлтэдэ, юрын ажаһуугшадай ажабайда­лай һайжаралгада горитойхон түлхисэ, һайн тээшээ хубилал­танууд харагдажа эхилхэл һэн ха”, - гээд, Алексей Цыденов то­дорхойлоо.

“Буряадта хилын саанаһаа хүрэнгэ оруулалта хадаа ехэ удха шанартай ажаябуулга бо­лоод байна. Энэ хэрэг ураг­шатай бэелүүлэгдэжэ эхил­бэл, алибаа ажаүйлэдбэридэ нэбтэрүүлэгдэжэ захалаа һаань, хэды олон ажалай һууринууд бии болохо аргатайб. Һайн са­лин абахадаа, хэн хэнэйшье ажаһуудал һайн тээшээ хубилха зэргэтэй бшуу. Тиимэ һэн тула бидэ ганса Япон гүрэндэ бэшэ, ондоошье можо нютагуудаар ба хари гүрэнүүдээр иимэ арга бо­ломжо бэдэрнэбди”, - гэжэ Буряадай Толгойлогшо онсолон тэм­дэглэхэ байна.

Буряад ороноо түлөөлжэ ябаһан делегациин гэшүүд Хок­кайдо префектурада оршодог хоёр заводой ажалтай дүтөөр танилсажа, хүнэй ажаһуудалай хаядаһа флотациин тусхай ар­гаар, тиихэдэ Аllin компаниин шанга бусалгагдаһан (субкри­тическэ) уһа хэрэглэлгын онол аргаар аюултай хаядаһа ашагла­даг үйлэдбэриин ажалые бодо­то дээрэнь хаража ерээ.

Япон гүрэн Буряад орон­до наймаанай талаар харилсаа холбооной эгээл шухала һуури эзэлдэг юм. Тиихэдэ табин дүрбэн харилсаата гүрэнүүдэй дунда Буряад Улас дотоодын наймаанай эрьесээр хоёрдохи һуурида тоологдодогынь эли. Манай шулуун нүүрһэн болон тайрагдаһан модон Япони руу эльгээгдэнэ.

Гүрэнэй тоо бүридхэлэй фе­деральна албанай Буряад Ула­стахи газар дэбисхэрэй зургаа­най мэдээсэһээр, 2017 ондо 893 хүн Япон гүрэнһөө ерэжэ, манай нютагаар аяншалһан байна.

“Буряад үнэн” мэдээсэлэй албан