740
Буряад Уласай Арадай Хуралай хэблэлэй албанай гэрэл зураг
Мүнөөдэр Арадай Хуралай Зүблэлэй зүблөөндэ һунгамалнууд “О земле” (“Газар тухай”) хуули ёһоной 12.1 статья зүбшэн хэлсэбэ.
Үнгэрэгшэ жэлэй май һарада Арадай Хуралай сессидэ гүрэнэй ба муниципальна мэдэлэй газарнуудые түлбэригүйгөөр ба наймаагүйгөөр арендэдэ үгтэхэ шиидхэбэри гаргагдаа. Тус хуулиин шэнэ нэмэлтэ ажахын эрьесэдэ газарай олон талмайнуудые хэрэглэхэ эрхэ үгэнэ. Тиимэһээ газарай талмайнуудай бага ба ехэ зэргын хэмжээн тогтоогдоо. Газарай талмайн бага зэргын хэмжээн 3 га, ехэ зэргын – 20 га.
Газарай асуудалнуудай, аграрна бодолгын болон эд хэрэглэлгын дэлгүүрэй талаар Арадай Хуралай хорооной түрүүлэгшын орлогшо Баир Гармаевай тэмдэглэһээр, энэ хуули ёһон үни удаан зүбшэн хэлсэгдэжэ абтагдаа. Хуули ёһые баталхын талаар дурашьегүй зон байгаа. Газарай талмай дамжуулгын хэмжээнэй асуудал ехэ арсалдаатай байһан. Жэшээлбэл, Ярууна аймагта сүлөө газарай талмай ехэ, тиимэһээ тэдэнэр 50-100 га газар дамжуулха аргатай.
Зүблэлэй урда Арадай Хуралай тус хорооной һунгамалнууд Кабанск ба Тарбагатай аймагуудта хүдэлмэри ябуулжа, зонтой уулзаа.
Тиин энэ асуудалаар 5 жэлдэ ажаллаһан фермернүүдэй хүдөө ажахынуудта туһалхаар шэнэ нэмэлтэнүүдые оруулха тухай һунгамал һанамжатаяа хубаалдаба. Арадай Хуралай түрүүлэгшэ Цырен-Даши Доржиев тус асуудалаар бодомжолжо үзэхэ гээд тэмдэглээ. Тэрэ хуули ёһонууд тухай зондо ойлгуулха хүдэлмэри үргэнөөр ябуулха тухай һануулба. "Мүнөөдэр арад зоной дунда гүрэнэй хуули ёһонууд тухай мэдэхэшьегүй байха", - гээд тэрэ тэмдэглээ.
Байгша оной майн 1-дэ энэ хуули ёһоор Буряад уласай таряашадай ба фермернүүдэй ажахынуудта 580 га талмайтай 67 хэһэг газарнууд дамжуулагдаа гээд гол элидхэгшэ зөөриин, газарай харилсаанай сайд Маргарита Магомедова хэлэбэ. Һомон нютагуудта ажалладаг мэргэжэлтэдшье хэһэг газарта хүртэхэ аргатай. Харин тэдэнэрэй талаһаа эдэбхитэйгээр газарта хүртэһэн зон үсөөн.
Тиин ехэ мүнгэ һомололготой түсэл бэелүүлгэдэ туһалхаар хэһэг газарнуудые миинтээр үгэлгые бүри нарижуулжа, зууршалгануудые нэмэхэ гээд хэлэгдэбэ. Барилга хэхэдээ зүбшөөлтэ данса удаан саг соо хэгдэнэ. Тиимэһээ түсэл бэелүүлгын болзор 1,5-2 жэл бэшэ, 6-10 жэл болгоохо тухай Маргарита Магомедова хэлээ. Энэ мэдүүлгые Цырен-Даши Доржиев дэмжэбэ.
Һунгамалнууд зүбшэн хэлсэжэ, Арадай Хуралда, Буряад Уласай засагай газарта, нютагай өөрын захиргаануудта зууршалгануудай түсэл бэлдэбэ.
