530
Буряад уласай элүүрые хамгаалгын яаманай хэблэлэй албанай гэрэл зураг
Буряад уласай бүхы аргын олониитэд сугларжа, бэе бэеэ мэргэжэлтэ һайндэрөөр амаршалаа. Эмшэдые уласай болон засагай, шажан мүргэлэй түлөөлэгшэд амаршалһан байна. Уласай элүүрые хамгаалга 95 жэлэй ойн баярые тэмдэглэнэ. Энэ хаһадаа тус һалбари һайн дүнтэйгээр дүтэлөө. Һүүлшын хоёр жэлэй хугасаа соо улас дотор хүүгэдэй больницын хирургиин корпус тушаагдаа, перинатальна түбэй барилга үргэлжэлүүлэгдээ. Ядерна аргын түб бариха түсэл дэмжэгдэнхэй. Фельдшерскэ-акушерскэ пунктнуудай, һомоной элүүрые хамгаалгада шэнэ амисхаал оруулагдаа.
Буряад уласай элүүрые хамгаалгын сайд Дамбинима Самбуев сугларагшадые мэргэжэлтэ һайндэрөөрнь амаршалаа.
Элүүрые хамгаалгын 90 хүдэлмэрилэгшэд үндэр шанда хүртэбэ. “2018 оной эрхим эмшэн” бүхэроссиин мүрысөөнэй уласай шатын дүнгүүд согсологдоо. “Жэлэй эрхим педиатр” гээд Улаан-Үдэ хотын 3-дахи поликлиникын 2-дохи педиатрическа таһагые даагша Екатерина Жигжитова нэрлэгдэбэ. “Эрхим залуу эмшэн” шатада түрүүшын шан уласай перинатальна түбэй нарайлха эхэнэрнүүдэй акушерскэ патологиин таһагай акушер-гинеколог Аурика Ли-Ван-Хайда үгтэбэ.
Эрхим анестезиолог-реаниматолог В.В.Ангаповай нэрэмжэтэ түргэн аргын туһаламжын уласай клиническэ больницын интенсивна терапиин ба реанимациин таһагта хүдэлнэ. Диагноз шэнжэлгын талаар эрхим эмшэнээр В.В.Ангаповай нэрэмжэтэ түргэн аргын туһаламжын уласай клиническэ больницын эмшэн-рентгенолог Владимир Ханеев нэрлэгдээ. “2018 оной арадай эмшэн” нэрэ зэргэдэ Мухар Шэбэр аймагай түбэй больницын эмшэн Сергей Щеглетов хүртэбэ. “2018 оной арадай фельдшер» гээд Хори аймагай түбэй больницын Наран нютагай фельдшер Евгения Машанова нэрлэгдээ.
“2018 оной эмшэн Оскар” гээд уласай видеоролигуудай мүрысөөн түрүүшынхиеэ үнгэрөө.
Энэ мүрысөөнэй илагшад:
“Ажал – манай 2-дохи гэр”: хотын 4-дэхи больница.
«Аргалалга – минии хуби заяан»: Н.И.Семашкогой нэрэмжэтэ уласай клиническэ больница.
«Мэргэжэлэй омогорхол»: Хурамхаан аймагай түбэй больница.
“Элүүр эмшэн – элүүр аргалуулдаг хүнүүд”: “Диамед” аргын түб.
“Шог ёгто зураглалнууд”: Доодо Ангара аймагай түбэй больница.
«Бултанай һайшаалда хүртэгшын шан”: уласай шүдэ аргалалгын поликлиникэ.
