922
Буряад уласай Засагай газарай хэблэлэй албанай гэрэл зураг
Буряад Уласай толгойлогшо Алексей Цыденов Ородой Холбоото Уласай спортын яаманай департаментын захирал Александр Росляковтай улас доторто баригдаха томо спортивна объектнүүд тухай зүбшэн хэлсэбэ.
Тодорхойлбол, Елүүрэй ордон ба лукодром бариха тухай тэдэ хөөрэлдөө.
Ородой Холбоото Уласай юрэнхылэгшэ Владимир Путинай даабаряар Елүүрэй ордон Улаан-Үдэдэ баригдаха. Тус түсэлые гүрэнэй – үмсын партнёрство хэрэглэжэ бүтээхэ. Иимэ аренэ 2 жэлэй туршада баригдахаар хараалагдана.
"Барилгын бүхы дансанууд Ородой уласай спортын яаман руу эльгээгдэнхэй. Һаядаа тэндэ тэмсээнэй хүсөөр түсэл бэелүүлэгшые элирүүлхэ. 2019 оной һүүл багта Елүүрэй ордон баригдажа эхилхэ", - гээд Ородой Уласай спортын яаманай гүрэнэй зөөри хүтэлбэриин ба мүнгэ һомолхо талаар департаментын захирал Александр Росляков тэмдэглээ.
Буряад уласай толгойлогшын тэмдэглэһээр, ордоной барилга 1,4 миллиард түхэригэй болохо. Мүнгэнэй 1,2 миллиард түхэриг федеральна бюджетһээ үгтэхэ, 200 сая түхэриг – үмсын инвестор дамжуулха тухай хэлсэнхэй. Энэ мүнгэ Буряад улас инвестортэ 12 жэлэй хугасаа соо бусааха. Тэрэнэй хажуугаар инвестор 10 жэлэй туршада Елүүрэй ордоной мүлжэлгэ ба байгалга өөртөө дааха ёһотой. Энэ уулзалгада уласай үшөө нэгэ томо спортивна объект барилга тухай хэлсэгдээ. Хаамал һур харбалгын газар барилгада ерэхэ жэлдэ 103 сая түхэриг федеральна мүнгэн дамжуулагдаха тухай зүбшөөгдөө. Тиихэ зуураа 42 сая түхэриг олоной спорт хүгжэлтэдэ, 13,8 сая түхэриг – спортивна хэрэгсэлдэ үгтэхэ.
Һүүлшын 10-д жэлнүүдэй хугасаада уласай спортивна объектнүүдтэ федеральна бюджетһээ 2,5 миллиард түхэриг Ородой Уласай спортын яаманай талаар дамжуулагдаа. Байгша оной сентябрь һарада Улаан-Үдэдэ Ородой Уласай спортын ба эд засагай хүгжэлтын яамануудай зүблөөн түсэблэгдэнхэй гээд Александр Росляков мэдүүлээ. Александр Росляков федеральна яаманай түлөөлэгшэдтэй суг хамта Түнхэн аймагта боложо байһан Хүдөөгэй нааданда байлсаа.
