Сэнгэ Ринчиновэй гэрэл зураг
Үндэһэн буряад үхэрэй үдэхэ сагынь ерээ юм гү, али хʏн зомнай ойлгожо эхилээ юм гʏ - бʏ мэдэе. Энэ хэрэг ехэ дэмжэгдэжэ эхилбэ. Болоол гүб даа, – гэжэ Һасаранай Булад һая дуулгаба.
Юуб гэбэл, зургаа һарын 13-да буряад үхэр һэргээхын тула олон жэлдэ оролдожо ябаһан энэ хүн Ород гүрэнэй Хүдөө ажахын яаманай үүлтэртэ малнуудые үсхэлгын ажалай түлөө харюусадаг академик, амидарал шэнжэлдэг эрдэмэй доктор Харон Амерхановтай уулзаа юм. Уулзалгын үедэ Гүрэнэй Дүүмын һунгамал Алдар Дамдиновһаа “Хоморой, үгы боложо байһан амитадай уг шуһанай ажахы” байгуулаял гэһэн хандалга-бэшэг барюулһан байна.
Энэ хэрэг бүхы зондо амин шухала гэжэ Вавиловай нэрэмжэтэ Россиин академиин шэнжэлхы дээдэ һургуулиин эрдэмэй талаар орлогшо захирал Юрий Столповский, Үндэһэн соёлнуудай Байгалай Буряадай түбэй түрүүлэгшын орлогшо Ринчин Гармаев гэгшэд оролсоо. Баһал энэ дэмбэрэлтэ хэрэгтэ манай Бандида Хамба лама Дамба Аюшеевэй туһаламжые юугээр сэгнэхэб?
- Харон Амерханов заатагүй туһалхаб, үгэеэ үгэнэб гэжэ ехэ найдуулаа. Хэлэһэн үгэдөө хүрөө һаань, үндэһэн буряад үхэрнай гүрэнэй тэдхэмжэтэйгээр үсхэгдэхэнь гэжэ найдамтайгаар һанаад, амжалта түгэс бүтэхэ гэжэ бултадаа бодоёл даа, - гэжэ Һасаранай Булад хэлээ.
Энэ ехэ хэрэгтэнь амжалта хүсэе.