“Буряад үнэн” сониной архивһаа
Мэнэ һаяхана “МК в Бурятии” сониндо анхан Улаан-Үдын мэр байһан Геннадий Айдаевай “Бронзовый век Бурятии” гэжэ статья толилогдожо, олониие гайхуулаа.
Сэлэнгын хүүргээр Улаан-Үдэ орожо ерэхэдэ, һүртэй һайхан “Эхэ Буряаднай” угтажа байдаг. Теэд энэ бүтээлые Геннадий Архипович А.М. Миронов бүтээһэн гэжэ бэшээ.
-Үнэхөөрөө болбол, суута “Эхэ Буряадые” Эрдэни Дамбаевич Цыденов зохёон бүтээһэн юм. Энэ ехэ бүтээлэйнгөө түлөө уран барималша Эрдэни Цыденов тэрэ сагаар 4 мянган түхэриг абажа, сагһаа урид наһа бараһаншье һаа, Буряадай АССР-эй Верховно Соведэй дипломдо, дурасхаалай тэмдэгтэ хүртэһэн юм гэжэ Цыренжаб Сампиловай нэрэмжэтэ музейн дансанууд гэршэлнэ, - гэжэ буряад уран зохёолшодой уран зохёолнуудые хэблэгшэ Батор Тумунов “Буряад үнэндэ” мэдээсэбэ.