​​Һунгамалнууд Буряад уласай “түрүүшын һоригшодые” болон абарга тамиршадай һоригшодые һара бүриин түлбэритэй болгообо

Анна Огороднигой гэрэл зураг

 Буряад Уласай табадахи зарлалай Арадай Хуралай ээлжээтэ 30-дахи сессидэ һунгамалнууд “Бэеын тамирай соёл болон спорт тухай” уласай хуулида нэмэлтэ оруулаа. Шэнэ нэмэлтэнүүдэй үүсхэл гаргагша, Арадай Хуралай һунгамал Валерий Доржиев бултанай урда үгэ хэлэбэ.

2019 оной июниин 1-һээ хари гүрэнүүдэй, СНГ-эйн, Ород Уласай, СССР-эй бүлэгүүдэй бүридэлдэ Олимпиин, Паралимпиин,Сурдлимпиин наадануудта хабаадажа, мүнгэн, хүрэл шагналда хүртэһэн тамиршадай һоригшодто болон “түрүүшын һоригшодто” һара бүри уласай түлбэри түлэгдэжэ эхилхэ.

Абарга тамиршадай “түрүүшын һоригшодто” һара бүри 5 мянган түхэриг түлэгдэхэ, абарга тамиршадай һоригшодто – 13 мянган түхэриг. Тиин мүнгэн шагналай түлөө – 10 мянган түхэриг, хүрэл шагналда – 7 мянган түхэриг.

Тамиршанай абарга нэрэдэ хүртэхэдэ, тэрэнэй һоригшо улас дотор 5 жэлэй туршада ажаһууһан байбал, иимэ түлбэридэ хүртэхэ эрхэтэй болоно.

Ородой Холбоото Улас дотор гансал Буряад уласта “түрүүшын һоригшо” гээд нэрэ зэргэ үгтэжэ, һара бүриин түлбэритэй болгоогдоо.