Буряад Уласай Засагай газарай хэблэлэй албанай гэрэл зураг
Байгша оной июниин 27-до, уласай толгойлогшо Алексей Цыденов Московско можын Горки газарта Ородой Холбоото Уласай юрэнхы сайд Дмитрий Медведевтэй уулзаба.
Тус хөөрэлдөөнэй дүнгөөр, Ородой Холбоото Уласай Засагай газарта хэдэн даабаринууд үгтөө. Энэ уулзалгада 3 асуудал хараалагдаха байгаа.
“Уулзалгын дүн һанаһандаа хүрөө. Дмитрий Анатольевич нэмэлтэ асуудалнуудта саг нэмэжэ, шагнаһан байна. Зарим асуудалнуудаар шиидхэбэри тэрэ дары абагдаа, бэшэ бусадаарнь Ородой уласай Засагай газарта хамтын бэелүүлгэдэ даабари даалгагдаба”, - гээд уласай толгойлогшо Алексей Цыденов хэлээ.
Юрэнхы сайд һургуулиин урдахи һуралсалай эмхи зургаануудай ээлжээн, юрэнхы һуралсалай эмхинүүдтэ 3-дахи халаан бага болзор соо усадхаха тухай даабари үгэбэ.
Ниислэл Улаан-Үдэ хотын баруун эрьедэхи сэбэрлэлгын бодхолгонуудай барилгын дүүргэлтэдэ 520 сая түхэриг һомолхо тухай асуудал зүбшэн хэлсэгдээ.
Суг хамта 3 табилгын хослол (комплекс) барилгада 2,3 миллиард түхэриг хэрэгтэй. Федеральна бюджедһээ 1,8 миллиард түхэриг үгтэхэ гээд тэмдэглэлтэй. Дмитрий Медведев япон оньһон арга хэрэглэһэн бог шорой шатааха ажалаар завод Буряад улас дотор бариха тухай даабари даалгаа.
Үшөө нэгэ шиидхэбэри Галуута нуурай ГРЭС-тэ хабаатай. Юрэнхы сайд уһа хэрэглэхэ сэн бага болгоохо асуудал дээрэ бодожо үзэхэ тухай даабари үгэһэн байна. Иигээд зайн галай станци ажалаа үргэлжэлүүлхэ аргатай. Уулзалгын дүндэ Дмитрий Медведев 2023 ондо тэмдэглэгдэхэ уласай 100 жэлэй ойн баяр ёһололдо бэлдэхэ талаар эмхидхэлэй хороон байгуулха даабари даалгаба.