901
Буряад Уласай Засагай газарай хэблэлэй албанай гэрэл зураг
Уласай толгойлогшо Алексей Цыденов засагай газарай делегацитай суг хамта Хори аймагаар албанай хэрэгээр ябаһанай удаа, мүнөөдэр Хэжэнгэ аймагта хүдэлнэ. Уласай толгойлогшын Хори аймагаар албанай хэрэгээр ябаһан тухай тодорхойгоор хөөрэе.
Үглөөгүүр уласай толгойлогшо арадай хүсөөр Баян голдо баригдажа байһан соёлой болон спортивна комплекс хүрэжэ хараба. Нютагай ажаһуугшад хамтадаа 4 сая түхэриг суглуулжа, КСК барижа эхилээ. Шэнэ байшан соо универсальна заал, номой сан, музей нээгдэхэ. Алексей Цыденов тус объект сэгнэжэ хараад, комплекс барилгада 2 сая түхэригэй уласай тэдхэмжэ дамжуулха тухай засагай газарта даабари үгэбэ. Нютагай ажаһуугшадай хандалгаар, уласай толгойлогшо бага бүридэлэй һургуули үлеэхэ тухай захирба. Баян голдо 360 хүн ажаһуудаг юм. Тосхон “100 шухаг тосхонууд” түсэлдэ оруулагданхай.
ТОС-уудай түлөөлэгшэдтэй уулзалгада уласай толгойлогшо эрхимлэһэн ударидагшадые мүнгөөр, үнэмшэлгэнүүдээр урмашуулба.
“Намайе ходо ТОСууд гайхуулдаг юм. Хүн зоной суг хамта суглараад, һайн хэрэг бүтээхэ хүсэниинь. Иимэ олон эдэбхитэй зоной байһандань, ехэ баяртай байнаб. Саашадаашье бидэ ТОСуудта туһалхабди. Энэ жэл 60 сая түхэриг бүхы уласай ТОСуудта һомологдохо. Хори аймаг үнгэрһэн жэл 2,5 сая түхэригтэ хүртөө һэн, мүнөө жэл 3,5 сая түхэригтэ хүртэнэ”, - гээд уласай толгойлогшо хэлэбэ.
Алексей Цыденов Шүбгэ һуурин газарта байрладаг фермерскэ ажахы хүрэжэ, Хори аймагта хүдөөгэй аяншалга хүгжөөхэ тухай дурадхаба.
Тэрэнэй удаа уласай толгойлогшо Анаа дасан хараа. Тэрэнэй һэльбэн шэнэлэлгэ 6,2 сая түхэригэй болохо. Федеральна программын аргаар энэ мүнгэн дасанай һэльбэн шэнэдхэлгэдэ дамжуулагдаха.
Хоридо Алексей Цыденов түбэй эмнэлгын газарай хүдэлмэрилэгшэдтэй уулзажа, байшанай ехэ заһабари тухай хөөрэлдэбэ. «Ерэхэ жэл мүнгэ һомололгын талаар туһалхабди», - гээд уласай толгойлогшо түбэй хүтэлбэрилэгшэдые найдуулаа.
Нютаг газарнуудаар залуу мэргэжэлтэдэй дуталдажа байһан тухай асуудал уулзалга дээрэ эмшэд бодхообо.
“Бидэ хэрэгтэй мэргэжэлтэдые аймагай ФАПуудта эльгээхэбди”, - гээд толгойлогшо найдуулаа.
Хоридо Алексей Цыденов хүүгэдэй болон эдиршүүлэй түбэй шэнэ таһагай нээлгын ёһололдо хабаадаба. Тэндэ нютагай үхибүүд роботехникэ, 3D, авиамоделировани хэжэ һурадаг юм. Ябалганай дүндэ уласай толгойлогшо ажаһуугшадай шухала болоһон асуудалнуудта харюусаа.
Уласай толгойлогшын хэлэһээр, байгша ондо Хори аймагай ниигэмэй болон эдэй хүгжэлтэдэ 52,25 сая түхэриг һомологдохо. Хотын таатай байдал бүрилдэлгэдэ 1,42 сая түхэриг үгтэхэ.
"Тээгдэ-Тохорюугта" харгын барилгада 160,4 сая түхэриг һомологдоно. Тэрэнэй 94,4 сая түхэригынь – байгша ондо дамжуулагдаха. Хори тосхоной үйлсэнүүдэй, гудамжануудай хүбөөтэй харгынуудта 2,4 сая түхэриг һомологдоно.
Уласай толгойлогшо “Цифровой тэгшэ бэшэ байдал зайсуулга» федеральна түсэлэй улас доторто бэелүүлгэ тухай хөөрэжэ үгэбэ. Тус түсэлэй хүсөөр ерэхэ жэл Хори аймагай 3 тосхон түргэн ябадалтай интернедтэй ба һайн шанартай мобильна утаһатай болохо. Нэрлэбэл, Зүүн-Хуурай, Аалан, Майла. Үшөө 2 тосхон интернедтэ тропосфернэ утаһанай түрүү түсэлөөр интернедтэй болгоогдохо.
Хориин 1-дэхи һургуулиин һурагшадай эхэ эсэгэнэр уласай толгойлогшоһоо спортзалда нэмэлтэ байра барилгада мүнгэ эрибэ.
- Сентябриин 1-һээ 8 һургуулинууд 3-дахи халаантайгаар хүдэлхэ. 3-дахи халааниие үгы хэлгэ түрүү асуудалнуудай нэгэн, бидэниие юрэнхы сайд Дмитрий Медведев энэ асуудалаар дэмжээ. Тиимэһээ бидэ энэ асуудал шиидхэхын түлөө федеральна хэмжээнһээ мүнгэндэ хүртэнэбди. Тэрэ урьһаламжын мүнгэндэ ондоо һургуулинуудые барихабди, танай һургуули баһа барилсахабди. Энэ нэгэ хэб шэнжын 176 хүнтэй түсэл болохо, спортзалтайгаар баригдаха, - гээд уласай толгойлогшо хэлэбэ.
Нютагай багшанарай гуйлтада Алексей Цыденов хамтын һомололгоной хэмжээн соо видеокамера, дискнүүдые худалдажа абаха хэрэгтэ 500 мянган түхэриг дамжуулха даабари үгэбэ. Аймагай һургуулинуудта болон хүүгэдэй сэсэрлигүүдтэ алажа һүүрдүүлэгшэдһээ хамгаалха талаар хэмжээ ябуулгануудай хэм соо тус хэрэгсэл абтаха ёһотой. Уласай бүхы һургуулинуудые вахтер-харуулшадаар, психологуудаар багсан хүсэлдүүлхэ ёһотой гээд һануулая.
Тэрэнэй удаа Алексей Цыденов албанай хэрэгээр Хэжэнгэ нютаг ябаа.
