Буряад арадай соёл болбосорол бодотоор харуулдаг “Наадан-Сурхарбаан” болбол хүнэй hүр һүлдэ үргэдэг шэдитэй гээд мэдэнэбди. Шуран бэрхэ тамиршаднай, уян нугархай хатаршаднай, ирагуу хоолойтой дуушаднай болон бусад эгээл энэ зунай найрта хаба шадалаа туршалсадаг, олониие гайхуулдаг гүб даа.
Энэ һайндэртэ Буряадай Засагай газарай улад буряад үндэһэн хубсаһаа үмдэжэ, олоной урда гараа. Ивалгын дасанай ипподромдо болоһон мори урилдаанда Буряадай Толгойлогшо Алексей Цыденов буряад энгэртэй костюм үмдэнхэй зогсоно һэн. Июниин 1-дэ спортын болон залуушуулай хэрэгүүдэй сайд Вячеслав Дамдинцурунов баһа буряад хубсаһа үмдөөд ябаа. Улаан-Үдэ хотын мэр Александр Голков жэл бүри Сурхарбаанай нааданда буряад дэгэлээр ерэдэг заншалтай. Тиихэдэ соёлой сайд Соёлма Дагаевае онсолмоор. Юуб гэхэдэ, тэрэ ажалдаашье буряад маягтай хубсаһа үмдөөд ябадагынь һайшаалтай. Мүнөө нааданда гоё гэгшын шэнэ буряад плати үмдэжэ ерээ. Нааданай үедэ стадион тойроод номууд, буряад дэгэлнүүдэй үзэмжэнүүд дэлгэгдээ. Тэдэниие худалдажа абаха дуратайшье хүн зон олоор ябаа.
Түрэл нютагаар аяншалга
Наадан-Сурхарбаанай үедэ соёлой талаар аяншалгын “Түрэл тоонтоёо мэдэ!” гэһэн уряа доро болоһон түсэлэй дүнгүүд согсологдоо. 10 аймагай ажалнууд түгэсхэлэй шатада оруулагдажа, мүнгэн шанда хүртэгдөө.
- Ехэ һонирхолтой түсэлнүүд харуулагдаа. Манай аймагай номой сангууд, соёлой байшанууд өөһэдөө аяншалгын түсэл зохёожо, олон тоото айлшадые, аяншалагшадые уриха аргатай гэжэ манай урилдаан харуулаа, - гэжэ соёлой сайд Соёлма Дагае- ва хэлэнэ.
Табан түсэл тус тустаа гол шанда-150 мянган түхэригтэ хүртөө. Северобайкальск хотын уран һайханай түүхэтэ нэгэдэл, Ярууна аймагай Эгэтын-Адагай соёлой байшан, Тарбагатай аймагай соёлой таһаг, Аха аймагай соёлой байшан, Хурамхаан аймагай соёлой байшан мүнгэн шангуудые абаа. “Эрхим гид” гэһэн тусхай шанда Северобайкальск хотын Инна Кривова хүртөө.
- Манай Эгэтын-Адагай түсэл хадаа “Маарагта голоор аяншалга” гэжэ нэрэтэй. Нютагаймнай номой сангай, соёлой байшанай болон һургуулиимнай буряад хэлэнэй багшанарай суг хамта хэһэн ажал гээшэ. Зандан Жуу бурхантай Эгэтын дасан, Маарагтын нуурнууд болон бусад нютагайнгаа гайхамшагта һайхан газарнуудаар аяншалагшадые ябуулжа, домогуудаа хөөрэжэ, дуу хатараа хангюурдажа баярлуулхабди, - гэжэ Эгэтын-Адагай сомоной дарга Цыден-Еши Лыгденов хөөрэнэ.
“Залуушуулай ёохор”
Иимэ гаршаг доро гурбадахи жэлээ зунай найрай үедэ залуу үетэнэй дунда ёохор нааданай урилдаан болоно. Энэшье удаа 20 гаран ансамбльнууд сугларжа, буряадай домогто хатарые олон тээһээнь харуулаа. Мүнөө жэлэй урилдаанда Монгол һайхан ороной «Сувдан хүлс», «Хүх толбот», «Чонон сүлд» гэжэ ансамбльнууд хабаадажа, найр наадые шэмэглээ гэхэдэ, алдуу болохогүй.
Мүнөө жэлэй урилдаанда шэнэ шатанууд оруулагдаа. Урдандаа хоёр шатаһаа мүрысөөн бүридэдэг аад, мүнөө дүрбэн шата болгогдоо. Ёохор наадан, таабари таалга, ташуур андалдаан болон дуу андалдаан гэһэн шатанууд олон сугларагшадта һайшаагдаа.
Хяагта аймагай аман зохёолой “Уряал” болон Зэдэ аймагай арадай аман зохёолой “Дэбэсэнэм” ансамбльнууд шалгараа. Урилдаанай Гран-при шанда Доодо Ивалга һууринай залуушуулай аман зохёолой “Хатараяа” ансамбль хүртөө.
- Арадай болон жэшээтэ гэһэн нэрэ солотой ансамбльнуудтай ана- мана тэмсэжэ, шүүжэ гарахадаа, ехэ баяртай байнабди. Урда жэлнүүдтэ бидэ 3-дахи, 2-дохи һууринуудые эзэлээ һэмди. Харин мүнөө илалта туйлаабди, - гэжэ хүтэлбэрилэгшэ Саяна Мупкина баяртайгаар хөөрэнэ.
Тус урилдаанда “Хатараяа” ансамблиин 26 хүн ёохор-наада харуулаа, тэдээн соохи 16 түлөөлэгшэ 20 наһанһаа залуу хүбүүд, басагад болоно.
- Доодо Ивалгада ажаһуудаг элдэб мэргэжэлтэй хүн зон сугларжа, энэ ансамбль байгуулаабди. Ёһо заншалаа, түүхэ домогоо мэдэ- хэеэ һанаһан олон залуушуул манай ансамбльда оролсоно, - гэжэ Саяна Мупкина хөөрөөгөө үргэлжэлүүлнэ.
Залуушуулда зорюулагдаһан үшөө нэгэ һонирхолтой урилдаан болоо. Мүнөө үеын сагта таарама, залуу һүрэгтэ һайшаагдадаг хатарнуудай батл үнгэргэгдөө. Тэндэ 100 гаран хүбүүд, басагад хабаадаһан байна. Эрхүү, Якутск, Шэтэ хотонуудай айлшадай хабаадаһаниинь һайшаалтай.
Авторай гэрэл зурагууд