Хэдыхэн жэлэй саана намарай сагай нэгэ һайхан үдэр минии һайханбагайн юртэмсэ дэлхэй дээрэ мүндэлһөөр зуун наһанайнгаа алтан ойе тэмдэглэхэ гэһэн болзоото үдэр хүрэжэ ерэбэ. Үри хүүгэдынь, ашанар зээнэрынь, гушанарынь энэ һайхан үдэртэ аргагүй һайханаар бэлдэжэ, түхеэржэ, Хэжэнгынгээ түбтэ оршоһон хоол баридаг газарта түрэл гаралаа, нүхэдөө урижа, баяр баясхалангай оршондо сайлалга эхилбэ. Иимэ үндэр наһатай хүнэй баярта ерэһэн зоной сэдьхэл хүлгөөтэй байнгүй яахаб! Иимэ ойн баяр тон үсөөн болодог ха юм. Һайханбагаймнай зорюута бэлдэгдэһэн креслэ соо түбхинэжэ һуунхай, сугларһан зониие миһэрэлээр дүүрэн нюдөөр нэгэ нэгээр шэртэжэ, дуугай һууба.
Энэ үндэр наһатай хүнэй ойн баярта хабаадаһан нютагай дарганар баярай үгэнүүдые, үреэлнүүдые хэлэжэ, бэлэг сэлэгүүдые барюулба. Дарганарай хойноһоо һубаряад, дүтын түрэлэй зон сэдьхэлэйнгээ гүн сооһоо гараһан баяраа мэдүүлжэ, үреэлнүүдые хэлээд, һайханбагайда дүтэлжэ, гарыень сайлганад, тааланад, өөһэдөө үнэсүүлнэд, толгойгоо эльбүүлжэ, сэдьхэлээ ханаанад. Энэ баярта ерэһэн олон үеын зон һайханбагайн халуун сайень уужа, удха баянтай, урин дулаахан үгэнүүдыень, заабари, һургаалыень шагнажа, шэбэгшэдээ хабшуулаад, ажамидаралдаа хэрэглэжэ ябаһан лэ ха юм.
Уран тодо хэлэтэй хүтэлэгшын ударидалга доро ойн баярай найр түлэг дундаа хүрэжэ, уянгата һайхан дуунууд зэдэлнэ. Дээрэ дээрэһээ үреэлэй үгэнүүд хэлэгдэжэ, альга ташалган аадарай уһандал шааяса наяраад, ойн баярые үндэр дээдэ хэмжээндэ гаргана. Эгээл энэ үедэ һайханбагайһаа холо бэшэ түрэл гаралайнь дунда һуухал ёһоороо һууһан хурса һонор харасатай, сэбэр сагаан шарайтай, сарюун тэгшэ бэетэй хүндэ үгэ үгтэбэ. Энэ хүн хоо- лойгоо заһажа, сэдьхэлһээ гараһан дулаахан үгэнүүдые һайханбагайда зорюулба. Үнгэрһэн сагуудые, эдир наһаяа, Шойсорон гэжэ нэрэтэй ехэ хүбүүнтэйнь эдирхэн наһандаа үелжэ наададагаа, бэеэ хүсэхэдөө, аха дүүһээ үлүүгээр нүхэсэһэн нүхэсэл тухайгаа дурсажа, үреэлэй һайхан үгэнүүдые һайханбагайда зорюулжа хэлэхэдэнь, баярай үдэшын эхилһэнһээ хойшо аманһаа нэгэшье үгэ унагаагаагүй эсэжэ, шалажа һууһан һайханбагаймнай:
- Энэ Бадаали гүш даа? – гэжэ нэгэл асуудал гэнтэ һэргэһэн мэтээр һуражархёод, ехэл дулааханаар, өөрынгөө хүбүү хараһандал энхэрээд, баярайшье, уйдхарайшье дуһалнуудые хасар дээгүүрээ мухарюулжа:
- Хүбүүмни, Шойсоромни мэндэ ябаа һаа... – гээд, һайхамбагай дуугай болошобо. Эдэ хоёрой хоорондо тогтожо үрдиһэн дулаахан харилсаа анхаралтайгаар адаглажа һууһан зон шэмээгүй болошобо. Бадаалитай сасуу Шойсорон хүбүүгээ алдаһан эхэ, хүбүүнэйнгээ үүриие харахадаа, сэдьхэлынь баярлангүй, уярангүй яахаб. Эхын нимгэн сэдьхэл булта адли ха юм. Тэнсүүриеэ оложо ядан тогтоһон онсохон байдалые ондоо урасхалда оруул- ха хүсэлтэй Бадаали хоолойгоо заһажа, “Холын харгыда ябахадаа...” гэжэ дуу һайхан хоолойгоороо аалиханаар дуулажа эхилбэ. Бадаалиин һайхан хоолойһоо зэдэлэн гараһан дуунай аялгада һайханбагайн сэдьхэл үлгыдүүлжэ, уһатаһан нюдэ- ниинь энеэбхилэлээр дүүрэжэ, баяр баясхалангай оршон байдал дахяад лэ түхөөбэ. Зуу наһа наһалһан һайхамбагаймни баярлаба, һэргэбэ.
Энэ Бадаали гэжэ нэрэтэй хүмнэй Хэжэнгын аймагай Ушхайта нютагта түрэһэн Балдан-Доржо Дашиевич Цыдыпов лэ даа. Бадаали гэжэ нютаг нэрэнь. Дабхар нэрэтэй буряад хүбүүд олон ха юм. Тэдэнэрэй нэгэн – Бадаали. Харамтайнь гэхэдэ, Бадаали мүнөө манай дунда үгы. Яахыншье аргагүй хогоосон юртэмсэ. Халагни гэхээр... Гэнтэ ябашоо. Хүлеэгдээгүйгөөр... Эмнэлгын газарта ороод байнаб гэхэдэнь, ошоходомни:
- Бишни барагби. Нүгөөдэр гарахамни, - гээ һэн.
- Ерэжэ гаргахаб гэхэдэмни:
- Һанаагаа бү зобо. Бишни хүлөөрөө гэшхээд, гэртээ хүрэшэхэб, - гэбэ. Шарайнь тиимэшэг, һахалаа табинхай... Хахасалган дээрээ би юундэшьеб шангаар тэбэрибэб. Хэды хоноод хонходоходомни:
- Дахин халууршабаб, - гэбэ. Дахин эмнэлгын газарта ороод:
- Барагби. Һанаагаа зобохо юумэн үгы...
Тиигээд лэ... Һанагдаа, хүлеэг- дээгүйгөөр... Һүүлшынхиеэ тэбэ- риһэн байгааб. Һүүлшынхиеэ... Һүүлшынхиеэ гэжэ ямар аймшагтай үгэб.
1960 гаран оноор анхан танилсаабди. Үхибүүд ябахадаа. Намһаа хэды наһа аха һэн.
- Хүбэнтэй дэгэл хүрхытэр үмдэнхэй, затагар хара хүбүүн зогсоо бэлэйш, - гэдэг һэн.
Улаан-Үдэ хотын 1-дэхи интернадта хамта һураһан Баяр Эрдынеев Шойсорон ахай хоёртой нүхэсэжэ ябаһанаа һонирхолтойгоор хөө- рэдэг һэн. Баяр Эрдынеевэй бэшэһэн олон тоото зүжэгүүдынь Буряад драмын театрай тайзан дээрэ найруулагдажа, харагшадай сэдьхэл зүрхэ буляажа шадаһан. Шойсорон ахай зайн галай инженер мэргэжэлтэй, зон нүхэдтөө хүндэтэй, ехэ хурса бодолтой, урин зантай хүн ябаһан юм. Эдэ хоёр нүхэдынь эртэ ябашоо. Балдан-Дор- жо ехэл шаналжа хөөрэгшэ бэлэй. Ёһотой нүхэсэл – хоморой ябадал. Нүхэсэхэмни гэжэ баалалтын хүсөөр хүнтэй нүхэсэхэгүйш. Һайн нүхэр бэдэрэлтэгүй, өөрөө шамтай ерэжэ уулзадаг, ушардаг, нүхэсэдэг. Матаа һаа – матаршагүй бүхэ, таһалха гэбэл – хэзээдэшье таһархагүй, бата найдамтай нүхэд болодог. Иимэ нүхэд уулзажа хөөрэлдөөгүйдөө сэдьхэлынь дүүрэдэггүй, һанааниинь амардаггүй. Ямар бэ нэгэ дээдын хүсөөр хоорондохи харилсааниинь хүгжэжэ, бэе бэе тээшээ улам эршэтэйгээр таталдадаг. Уулзахадаа ганса хэлээрээ хөөрэлдэжэ, сэдьхэлээ ханаадаг бэшэ, аяг аашаараа, шог ёгтоороо, нэгэ шанга, нэгэ аалихан дуугаараа, гар бэеынгээ хүдэлэсөөр, нюдэнэйнгөө харасаар һаналаараа андалдажа үрдидэг, хадхуу, хурса үгэнүүдые хэлэжэ, бэе бэеэ догоододог, гасаалдаг, ёгтолдог, хүхидэг, баярладаг, сэдьхэлээ нээдэг, бэе бэеэ дэмжэдэг, найрладаг, хатуу үгэнүүдые хэлсэхэ сагай болобошье, бэе бэедээ гомдодоггүй, гомдохо гэжэ мэдэхэшьегүй сэдьхэлэй юртэмсэтэй. Балдан-Доржо иимэл хүн байгаа. Сэдьхэлэй хөөрэлдөө үүсхэжэ шададаг ёһотой нүхэр. Сэдьхэлээ нээжэ хөөрэлдэхэ – хоморой хэрэг. Үдэр дунда гал аһаагаад бэдэрээ һаа, олдохогүй – шухаг хэрэг!
Балдан-Доржо Дашиевич Хуса Намсараевай нэрэмжэтэ нютагайнгаа дунда һургуули алтан медальтай дүүргээ. Түбһэн хүн иимэ амжалта туйладаггүй. Москва хотодо аспирантурада һураа. Физикэ-математикын эрдэмэй кандидат болоо. Буряадай эрдэмэй түбтэ амжалтатай ажаллаа.
1994 ондо Хэжэнгэ аймагайнгаа нютаг зоной эблэлэй түрүүлэгшээр томилогдоод, эршэмтэй ажал ябуу- лаа. Би орлогшонь боложо дахасалдааб. Энэ сагһаа эхилээд, манай нүхэсэл аргагүй һайханаар үргэлжэлхэ үйлэтэй байгаа. Ямар олон дэмбэрэлтэй үйлэ хэрэгүүдые үүсхэжэ, Сагаалганай һайндэрһөө эхилээд, ямар олон баярай үдэшэнүүдые үнгэргөөбибди, хабаадаабибди, нютагайнгаа зониие элсүүлээбибди...
“Бэлигэй толи” гэжэ гайхамшагта зохёол бэшэһэн дооромбо лама Эрдэни-Хайбзан Галшиевта зорюулжа, түрэһэн Ород нютагтань субарга барюулая гэжэ дурадхал оруулхадамни, Балдан-Доржо дуратайгаар дэмжэжэ, ехэ ажал эхилээ бэлэйбди. Хэдэн удаа Ород нютаг ошообди, зонтой уулзаабди. Ехэ һайхан арамнай болоо, олон зон суг- лараа, мүргөө, найрлаа. Ешэ-Лодой римбүүшэ багша түрүүтэй хамта 29 ламанар уншалга бүтээгээ. Энэ дэмбэрэлтэй, буянтай үйлэ хэрэгтэ Балдан-Доржын оруулһан хубита аргагүй ехэ.
Физикэ-математикын эрдэмэй доктор болоо. Аргагүй ехэ амжалта туйлаа. Баярлаабди. Буряадай эрдэмэй түбтэ амжалта түгэс ажалаа эрхимээр үргэлжэлүүлээ. Хэбэд номхон Хэжэнгэ нютагһаамнай эрдэмтэй хүбүүд олон гараһан. Тэдэнэй нэгэн - Балдан-Доржо. Ганса би омогорхоно бэшэб, олон тоото нүхэдынь, нютагаймнай зон үндэр туйлалтануудаарнь омогорходог, баясадаг. Саашадаашье омогорхожо ябаха.
Дуу дуулаха дуратай һэн. Бүхы сэдьхэлээ үгэжэ дууладаг уянгатай һайхан хоолойтой һэн. Мэдэхэгүй дууниинь үгы, хүсэжэ дуулаха зоншье үсөөн юм һэн. Дуулаһан дууниинь мүнөөшье шэхэндэмни сонос- тоходол гэнэ. Элихэнээр...
“Томо юумэ, туужа бэшэ. Бэшэхээр болоош гэхэ. Бэшээд туршааб. Балдан-Доржые зохёолойнгоо эхэ бэшэгтэй танилсуулааб. Удаан хөөрэлдөөбди. Һанамжаяа хэлээ, заһабаритай гээ. Заһааб. Ном болоо. Нүхэрни баярлаа, амаршалаа. Намайе баалажа, найдал түрүүлээгүй һаань... Мэдэгдээгүй...
Намхан даруухан зантай наһа- найнгаа нүхэр Сэсэгтэй хоёр хүүгэдые хүн болгожо, гарыень ганзагада, хүлыень дүрөөдэ хүргөө. Амидаралай үргэн замда гаргаа. Алтанһаа сэнтэй хоёр зээнэрынь үбгэн абаяа һанажа, дурсажа ябана.
Гар утаһанайнь дугаар унтараахада - хэсүү байгаа... Хэзээдэшье энэ дугаар дарахаяа болёоб гэжэ һанахада бүришье... Холодон ошоһонһоонь хойшо жэл үнгэршэбэ. Бүхэли жэл. Жэлнүүд үнгэржэл, һубарижал байха. Зуу наһа наһалһан һайхамбагайемни баярлуулһан нүхэрэймни нэрэ мартагдахагүй! Мэндэ ябаһан сагтамнай Бадаа- лиин нэрэ мартагдахагүй! Балдан-Доржын нэрэ... Дурсанаб! Уярнаб! Эсэгынгээ нэрэ нэрлүүлжэ, үндэр дээрэ үргэжэ ябагты гэжэ үхибүүдтэнь захинаб, үреэнэб!
- Энэ Бадаали гүш даа? – гэжэ асууһан һайханбагаймнишье үгы. Иимэл хорбоо юртэмсэ ха юм даа...
Гэр бүлын жасаһаа абтаһан гэрэл зурагууд
Доржо СУЛЬТИМОВ