Олимпиин наадануудта нэрээ нэрлүүлһэн Владимир Сафронов болон Велингтон Баранников гэгшэдэй мүнхэ дурасхаалда зорюулагдаһан бүхэроссиин урилдаан Улаан-Үдэдэ табан үдэрэй туршада үнгэрбэ. Буряадай дүрбэн боксёр чемпионой нэрэ зэргэнүүдтэ хүртөө.
“Байгал” гэжэ нэрэтэй энэ мүрысөөн хабаадагшадые 49-дэхиеэ суглуулаа. Энэ урилдаанай бүхэроссиин хэмжээнэй байбашье, хари гүрэнэй тамиршадай Улаан- Үдэ ерэһэниинь һайшаалтай. Монголой болон Казахстанай боксёрнууд Ородой 10 можо, хизаарай тамиршадтай шанга тулалдаануудта уулзаа. Бүхы дээрээ 78 хүн мүрысөө.
Түнхэн аймагай Охор- Шэбэр һууринһаа гарбалтай Баир Батлаев өөрын шэгнүүртэ түрүүлжэ гараа. Тэрэ бүхы гурбан уулзалгада илалта туйлаа, түгэсхэлэй шатада Казахстанай тамиршаниие шүүгээ.
- Тус мүрысөөндэ хабаадаха түсэбгүй байгааб. Оройдоол нэгэ үдэр үлөөд байхадань, минии һоригшод шаалдахаш гэжэрхёо. Хэды һайн бэлэдхэл хээшьегүй һаа, илалта туйлааб, - гэжэ Баир Батлаев баярлана.
60 килограмм хүрэтэр шэгнүүртэ Хэжэнгэһээ гарбалтай Радна Цыбиков түрүүлжэ шадаа. Финалда ороһон Казахстанай тамиршанай нюдэн дээрэхи ниидхэһээнь ехээр шуһа гарахадань, уулзалгаяа үргэлжэлүүлжэ шадаагүй.
Кабанскын аймагай Селенгинск тосхоной техникумдэ һурадаг Николай Грищук 64 килограмм хүрэтэр шэгнүүртэ түрүүлһэн байна. Тэрэ баһа Казахстанай тамиршаниие шүүгээ.
75 килограмм хүрэтэр шэгнүүртэ Улаан-Үдын Виталий Ананин хоёрдохи жэлээ удаа дараалан илалта туйлаа.
Захаамин аймагай Чингис Ширипов шангай хоёрдохи һуури эзэлээ. Чингис хадаа мүрысөөнэй үедэ дээдэ һургуули дүүргэжэ, дипломоо хамгаалһан байна. Энэ шалтагаанһаа боложо, һайн бэлэдхэл хээгүйб гэжэ Чингис Ширипов мэдүүлээ.
Николай Харанахоев, Евгений Иванов, Кирилл Баландин, Андрей Гармажапов болон Олег Елизаров гэгшэд гурбадахи һууринуудые эзэлээ.
Эрхүү можынхид гурбан алтан медаль абаа. Казахстанай тамиршад гэртээ хоёр алтан медальтай бусаа. Монголой, Үбэр Байгалай хизаарай тамиршад хоёр-хоёр чемпионуудтай болоо.
Мүнөө жэлэй мүрысөөн олон харагшадые юундэб даа суглуулаагүй. Үдэр бүри 20-50 харагшад байгаа. 1970-1980-яад онуудаар тус мүрысөөн Улаан-Үдын театрнуудай залаар дүүрэн хүнүүдые суглуулдаг байгаа.
2019 ондо “Байгал” мүрысөөн 50-дахияа болохонь. Тиимэһээ эмхидхэгшэд үндэр хэмжээндэ мүрысөө үнгэргэхэ, олон харагшадые суглуулха талаар бүхы арга шадалаа гаргахабди гэжэ мэдүүлнэ.
Буряадай боксын федерациин хүтэлбэрилэгшын орлогшо, Арадай Хуралай һунгамал Валерий Доржиевай хэлэһээр, һонирхол болон анхарал татуулхын түлөө ехэ ажал хэгдэхэ.
- “Байгалаа” нүгөө жэл яагаад хэхэбибди гэжэ хөөрэлдөө эхилээбди. Зарим хүн Байгал далайн эрьедэ үнгэргэе гэнэ. Нүгөө заримашуул Соведүүдэй талмай дээрэ финальна уулзалгануудые эмхидхэхэ тухай мэдүүлгэ оруулна. Тиибэ яабашье, бүхы юумэ, тэрэ тоодо байра байдал хаража үзэн, энэ урилдаагаа үндэр хэмжээндэ гаргахабди. Ганса манай Засагай газар тус мүрысөө эмхидхэжэ шадахагүй. Тиимэһээ мүнгөөр туһалха зониие бэдэрхэбди, - гэжэ Валерий Доржиев дуулгаба.
Авторай гэрэл зурагууд