886
Уласай толгойлогшо албанай хэрэгээр Хэжэнгэ аймагаар ябахадаа, хүдөө ажахын үйлэдбэриин зургаануудые, спортивна объектнүүдые, һуралсалай эмхинүүдые хүрэбэ.
Нютагай ажаһуугшадтай уулзалгын дүнгүүдээр уласай толгойлогшо засагай газарта хэдэн шухала даабари үгэбэ. Тус даабаринууд Хэжэнгэ аймагай ажабайдал һайжаруулха аргатай.
Нэн түрүүн, уласай толгойлогшо Могсохоной хүүгэдэй сэсэрлиг хүрэбэ. Уласай болон нютагай бюджедһээ 21,2 сая түхэриг хүүгэдэй сэсэрлигэй һэльбэн шэнэлэлгэдэ һомологдоһон байна. Тиин 1,5 сая түхэриг хэрэгсэл болон гэрэй бараанда дамжуулагдаа. Август һарада заһабарилагдаһан хүүгэдэй эмхи руу 68 үхибүүд ябаха аргатай болохо.
Тэрэнэй удаа уласай толгойлогшо арадай хүсөөр Могсохондо баригдажа байһан барилдаашадай һэеы гэр болон Чисаанада баригдажа байһан спортивна заал хараба. Алексей Цыденов уласай бюджедһээ энэ барилга дүүргэхэ талаар мүнгэ һомолхо арга бэдэрхэ тухай даабари үгэбэ.
Уласай толгойлогшо хэдэн шухала объектнүүдые шалгаа. “Хэжэнгэ-Хүртэй” гэһэн нютагай харгыгаар үбэлэй сагта машинаар гарахаар бэшэ хүндэ болодог. Тиимэһээ 12 километр утатай харгын барилгада 140 сая түхэриг хэрэгтэй болоно.
“Түсэлэй оршо гаршын данса аймагай бүтээхэдэ, “Хүдөө дэбисхэрэй тогтонги хүгжэлтэ” гэһэн федеральна программада орожо болохобди”, - гээд уласай толгойлогшо хэлэбэ.
Нютагай ажаһуугшадай ехэнхи асуудалнууд Хэжэнгын лицей тухай табигдаа. Тэрэнэй байшанда ехэ заһабари хэрэгтэй. Уласай толгойлогшо тус асуудалые федеральна бюджедэй һомололгын талаар шиидхэхэ хэрэгтэй гээд тэмдэглээ. Уласай барилгын ба гэр байрын ажахын шэнэдхэлэй яаман 176 хүнэй һуралсалай шэнэ байшан бариха тухай дурадхал гаргаба.
“Бидэнэр хүүгэдэй сэсэрлигүүдэй ээлжээнэй асуудал шиидхэхэ ёһотойбди. 3 наһанһаа эхилээд, 7 –той болотор 26 мянган хүүгэд иимэ ээлжээндэ байна. Шухала асуудал шиидхэхын талаар шэнэ 43 хүүгэдэй сэсэрлиг бариха болонобди. Урьһаламжа хэрэглээд, энэ асуудалые шиидхээд үзэхэбди. Юрэнхы сайд Дмитрий Медведевэй тэдхэмжээр бидэ мүнгэндэ хүртөө һаа, ээлжээнтэй байдал үгы хэхэ аргатайбди. Тиигээд һандархай, тулюур байшантай хүүгэдэй сэсэрлигүүдтэ анхаралаа хандуулхабди".
Хэжэнгэ тосхондо Алексей Цыденов спортивна түбэй барилга шалгаа. Тэрэнэй барилгада 101 сая түхэриг уласай бюджедһээ үгтэнхэй. 5,5 сая түхэриг хэрэгсэл абахаар һомологдоо.
“Ажал түсэбэй ёһоор хэгдэжэ байнхай. Бүхы ажал хүдэлмэринүүд болзор соогоо һайн шанартайгаар хэгдэхэ гээд ажалда хүлһэлэгшэ найдуулаа. 2020 ондо эндэ зунай хүдөөгэй нааданууд үнгэргэгдэхэ ёһотой. Тиимэһээ аймагта спортивна түбһөө гадна, стадион баригдана.
“Иимэ аргаар аймаг спортивна объектнүүдтэй боложо, ажаһуугшад бэеын тамирые сахидаг болохо”, - гээд толгойлогшо тэмдэглээ.
Аймагай фермернүүдтэй уулзалгада Алексей Цыденов нютагай хүдөө үйлэдбэрилгын хослолой хүгжэлтэ тэмдэглээ. Аймагта бүхы улас дотор жэшээ болгоогдохоор машинно-тракторна станци нээгдэнхэй. Эндэ газар элдүүрилгын, тарилгын болон таряа хуряалгын хүдөө ажахын шэнэ техникэ хэрэглэгдэнэ. Техникэ худалдан абалгада 36 сая түхэриг аймагай хүдөө ажахыда туһаламжын жасаһаа урьһаламжа хэгдээ.
“Комплексын хүсөөр 600 га талмай газар элдүүрилэгдээ. Энэ түсэл жэшээтэ болоно. Аймагай засаг болон нютагай олзо эрхилэгшэд уласай Засагай газарай тэдхэмжэтэйгээр хүдөө ажахын хүгжэлтэдэ шэнэ аргануудые нэбтэрүүлээ. Ондоо аймагууд энэ ажалыень жэшээ болгоод, хэрэглэжэ туршаха гээд найдагдана”, - гээд Алексей Цыденов хэлээ.
Һү наймаалха сэн дээшэлүүлхэ талаар һанамжаяа уласай толгойлогшо фермернүүдтэ дурадхаба. Тиигэбэл нютагай хүдөөгэй үйлэдбэри эдэбхитэйгээр наймаалха тухай тэрэ хэлээ.
“Бултанда хэжэнгын айруул тухай реклама хэхэб. Абагты, манай, түрэл, өөрын”, - гээд уласай толгойлогшо хэлэбэ.
Байгша ондо, уласай бюджетһээ Хэжэнгэ аймагай ниигэмэй болон эдэй хүгжэлтэдэ 92,91 сая түхэриг, тиин олониитын хангалгын байгууламжада 6,1 сая түхэриг һомологдохо. Тодорхойлбол, Дээдэ Худанай спортзалай заһабарилгада 3,8 сая түхэриг, Хөөрхэ тосхоной ФАП барилгада 4,4 сая түхэриг, Хүртэй нютагай соёлой байшанай ехэ заһабарида – 1 сая түхэриг һомологдохо.
Буряад уласай Засагай газарай хэблэлэй албанай гэрэл зурагууд
