1010
Буряад Уласай үйлэдбэриин болон худалдаанай яаман Харюусалгын жасатай суг хамта уласай дэбисхэртэ ажалладаг мүнгэн сангай урьһаламжын эмхинүүдтэй семинар-зүблөө үнгэргөө.
Зүблөөн дээрэ “Минии олзо эрхилэлгэ” гэжэ түсэл зүбшэн хэлсэгдэбэ. Мүн, бага болон дунда олзо эрхилэгшэдэй банкһаа урьһаламжа абахадань, уялгата харюусалга олгохо тухай хэлэгдээ. Энэ хэрэг шиидхэхэ талаар Харюусалгын жаса банкнуудтай хүдэлмэри ябуулха болоно.
Уласай үйлэдбэриин болон худалдаанай сайдай орлогшо Е.Н.Кочетова сугларагшадай урда элидхэл хээ. Тус яаман “Минии олзо эрхилэлгэ” түсэл бэлдэһэн байна. Шэнэ түбтэ “нэгэ сонхо” гэжэ заршамаар улас доторхи олзо эрхилэгшэ ажаябуулгадаа хэрэгтэй аша туһада хүртэхэ болоно. Түсэлэй бэелүүлгэ олзо эрхилэгшын саг, эд болон бусад аргануудта алмалтатай байха гээд тэмдэглэлтэй. Байгша оной ноябрь һарада, түсэл бэелүүлгэдэ эхи табигдаха.
Буряад Уласай үйлэдбэриин болон худалдаанай яаманай хэблэлэй албанай гэрэл зураг
