Илдам налгай, ирагуу дуутай дангинанарай урилдаанда Буряадаймнай хоёр басагад түрүүшүүлэй тоодо орожо, олон тоото түрэл гаралаа, нютагаархинаа баясуулба.
Монголһоо, Үбэр Байгалай хизаарай, Эрхүү можын болон Буряад Уласай 16 сэбэр һайхан дангина дүрбэн шатаһаа бүридэһэн урилдаанда оролсоһон байна.
“Магтан дуулая угаа, нютагаа!” гэһэн түрүүшын шатада хабаадагшад өөр тухайгаа тобшохоноор хөөрэжэ үгөө. Эндэ баһа түрэл нютагаа магтаха гэһэн тусхай даабари байгаа. Харин ухаан бодолоо гүйлгүүлжэ, эрдэм мэдэсэеэ харуулжа шадаа хадаа “Оюун ухаанай уута” гэжэ нэрэтэй шата байгаа.
“Сэдьхэлэй баяр” гэһэн шатада басагад уян нугархай бэеэ харуулжа, хатарнуудаа харагшадта бэлэглээ. Мүн “Аялга дуунда” хонгёо һайхан хоолойгоороо дангинанар сугларагшадай шэхэ хужарлуулаа.
“Һаргама толондо” басагад буряад маягтай үдэшын хубсаһа харуулха даабари абажа, нугархай ябадалаар олоной һайшаалда хүртөө.
Уһан буряад хэлэн дээрэ дуугарһан Виктория Криволапова абаһаар лэ сугларагшадые гайхуулһан байна. Тэрэ Захаамин аймагһаа уг гарбалтай юм. Викториин аба Вадим Алексеевич ород угтай, харин эжынь, Цырендоржын Цырен-Дулма, буряад басаган гээшэ.
- Хоёр арадай бэлигые холбоноб даа улаан шуһандаа,
Минии гэртэхин болоһондонь, мүргэнэб даа бүхы бурхадтаа, - гэһэн үгэнүүдээр Виктория урилдаагаа эхилхэдэнь, альга ташалган зал соо нэрьешоо бэлэй.
Буряадай Үндэһэтэнэй 1-дэхи лицей-интернат һургуулиин 11-дэхи классай һурагша хадаа анха түрүүшынхиеэ дангина басагадай мүрысөөндэ хабаадана.
- Түрүүшынхиеэ иимэ томо тайзан дээрэ гарааб. Тиимэһээ нэгэ бага үбдэгүүдни һалганаад абаа. “Алтарганын” эхилтэр 2 үдэр үлөөд байхада, хатараа бэлдэжэ байгаад, хүлөө гэмтээгээб. Хэды тиигэбэшье, түрүүшын тоодо ороһондоо баяртайб. Эрхүү болбол һайхан хото байна, һайшаажа харааб. Ондоо хабаадагшадтай уулзажа, мүрысэжэ байхада, һонирхолтой гээшэнь. Тэдээнтэй танилсаһандаа баяртайб, - гэжэ Виктория Криволапова сэбэр буряад хэлээрээ хөөрөөд үгөө һэн.
Пётр Чайковскиин нэрэмжэтэ урлалай колледжын арадай хүгжэмэй зэбсэгүүдэй таһагта һурадаг Алина Дондукова үнгэрһэн үбэл уласай “Баатар-Дангина” урилдаанда гурбадахи һуури абаһан юм. Энэ басаган хадаа Буряадые түлөөлхын түлөө кастингда шалгарһан байна.
- Хэзээ хэзээнэйхиһээ аймшагтай байгаа. Хэды тиигэбэшье, бүхы бэлиг шадабарияа гаргажа, илалта туйлабаб, - гэжэ абаһаар лэ Алина Дондукова мэдүүлнэ.
Буряад Уласай хоёр дангина басагадһаа гадна Үбэр Байгалай хизаарай Арюна Доржиева болон Алтана Жамьянова, Эрхүү можын Анастасия Данилова гэгшэд эрхим табашуулай тоодо оролсоо.
Түнхэн аймагай “Сагаан Турлааг” гэһэн рок- бүлгэм бүхы сугларагшадые мүрысөөнэй забһарлалнуудта шэхыень хужарлуулаа.
Авторай гэрэл зурагууд