Агын тойрогой зүүн урда, наранай мандаха зүгтэ оршодог Хүһөөшын дунда һургуулиин байгуулагдаһаар 90 жэлэй ойн баяр июниин 29-дэ болобо. Һургуулиин захирал Баир Бадмажапович Раднаевай элидхэлһээ Хүһөөшын һургуулиин багшанар, һурагшад һуралсалай ажалаа мүнөө сагай эрхэ нүхэсэлдэ тааруулан, шэнэлэлгын ба хүгжэлтын замаар ябуулна.
Һургуулида 19 багшанар һуралсал-хүмүүжүүлгын ажал хэдэг. Тэдэнэй олонхинь һуралсалай жэшээтэ ажалаараа шалгарһан, 3 багша Россиин эрхим багшанарай федеральна грантда хүртэһэн, хэды хүн дээдын зургаануудай шагнал хайрада хүртэһэн байна. Һургуулида 106 үхибүүн һурана.
Тэдэнэр уласхоорондын, хизаарай хэмжээндэ болоһон эрдэм- шэнжэлгын конференцинүүдтэ, фестивальнуудта эдэбхитэй хабаададаг, олимпиадануудта илалта туйладаг, шагналнуудта хүртэдэг юм.
Һургуулиин тамиршад элдэб янзын турнирнуудта түрүүлдэг, илалтатай нютагаа бусадаг юм.
“Ягаан далбаа” гэһэн аяншалгын клуб Үбэр Байгалай хизаарта зүг шэг бэдэрэн ололгын “Алханын азимут” гэһэн мүрысөөнүүдтэ жэл бүри шалгардаг байна.
Эдэ жэлнүүдтэ 8 һурагша алтан медальтайгаар, 27 һурагша мүнгэн медальтайгаар һургуулияа дүүргэһэн юм.
Хүһөөшын һургуули “Һуралсалай холдинг” гэһэн проект бэлэдхээд, Ононой, Оловяннын, Агын ба Могойтын аймагуудай һургуулинуудтай нягта холбоотой ажал хэрэгээ ябуулжа,“Һуралсалда хилэ байдаггүй”-“Global Education” гэһэн уласхоорондын конгресс-үзэмжэдэ лауреадай дипломдо хүртөө һэн. Могойтын аймаг соогоо, Агын Буряадай тойрог соогоо эрхим һургуули гэһэн нэрэ зэргэ хэдэн дахин абаһан байна.
Буряад арадтаа мэдээжэ хүнүүд - бэлиг талаантай уран зурааша Галсан Эрдэниин, алдар суута хүгжэм зохёогшо Даша-Дондог Жалсараев, эрхимэй эрхим багша Тимур Жалсарайн, бэлиг ехэтэй уран зохёолшо Самбу Норжимаев, дайнай ба ажалай ветеран Батомунко Лодонов, Россиин Ажалай баатар Цырендаша Цыдыпов, эрдэмтэн Гомбо Гончиков болон бусад Хүһөөшын һургуулида һураһан байна.
Хүһөөшын һургуулиин уурхайһаа далижан гараһан хүбүүд, басагад хаа-хаагуур нэрэтэй түрэтэй болонхой ажал хүдэлмэри хэжэ ябана гээд нэрлэбэл, Буряадай гүрэнэй ехэ һургуулида эрдэмэй кандидадууд Будажаб Нимаев Андрей Цыдыпов хоёр багшална, ирагуу найрагша, сэтгүүлшэн Бутит Тумурова шүлэгөө зохёоһоор, оршуулгын ажал амжалтатай хэдэг, ирагуу найрагша Элбэг Зандраев “Алтарганада» ирагуу найрагай тэмсээндэ хабаадахаа бэлдэжэ байна.
Могойтын аймагай хүтэлбэрилэгшэ Б.Ц.Нимбуев, Агын нэгэдэхи дунда һургуулиин захирал Д.Д.Доржиева болон бусад олон мэргэжэлтэд Хүһөөшын һургуули түгэсэһэн Ага, Могойто, Улаан-Үдэ, Шэтэдэ ажаллана.
Хүһөөшын һургуули Ага тойрог соогоо эгээн түрүүн 1 сая түхэриг мүнгэ Президентын грант абажа шадаһан юм.
Түрэл һургуулиингаа 90 жэлэй ойн баярта холо ойроһоо Урта нютагаархин ерэбэ. Тэдэнэр баярай жагсаалда алхалалдаба, хүндэтэ багшанараа золгобо, үнинэй уулзаагүй нүхэдтэеэ уулзаба.
Хүһөөшын һургуулиин багшанарые, һурагшадые алдарта ойгоор амаршалаад, амжалта түгэс ажалаа хэхыень хүсэе!
Намжилма БАЛЬЖИНИМАЕВА, Ага тойрогто “Буряад үнэн” сониной тусхай сурбалжалагша
Авторай гэрэл зурагууд