784
Ородой Холбоото Уласай Засагай газарай Түрүүлэгшэ Дмитрий Медведев июниин 27-до Буряад Уласай Толгойлогшо Алексей Цыденовтэй уулзаха үедөө, уласай һургуулинуудта гурбадахи халаан усадхаха тухай заабари үгэһэн байна. Тиихэдэ Ородой Холбоото Уласай Засагай газарай Түрүүлэгшын орлогшо Татьяна Голикова, Ородой Холбоото Уласай Болбосоролой болон эрдэм ухаанай сайд Ольга Васильева, Ородой Холбоото Уласай Засагай газарай Түрүүлэгшын орлогшо, мүнгэн һангай сайд Антон Силуанов болон Ород гүрэнэй Барилгын сайд Владимир Якушевтэ баһал иимэ заабари үгтэбэ.
«Буряад Уласай һургуулинуудта гурбадахи халаан богони болзорто усадхаха хэрэгтэй. Һургуули бариха тухай дурадхалнуудые оруулагты», - гэжэ премьер-министр хэлэһэн байна.
Буряадта хүүгэдэй сэсэрлигүүдые бариха талаар дурадхалнуудые оруулхыень Татьяна Голикова болон Ольга Васильевада Засагай газаарй түрүүлэгшэ даалгаба.
«3-тайһаа 7 наһа хүрэтэр үхибүүд юундэ ээлжээндэ байһаар бэ гэжэ шалгалта үнгэргэхэ. Хүүгэдэй сэсэрлигүүдые бариха талаар дурадхалнуудые оруулагты», - гэжэ Дмитрий Медведевэй даалгабарида хэлэгдэнэ.
Алексей Цыденовэй Дмитрий Анатольевичто мэдээсэһэнэй ёһоор, Буряад уласай 467 һургуулида 138 мянганһаа дээшэ үхибүүд һурана. 2017-2018 һуралсалай жэлдэ уласай 166 һургуулида хоёрдохи халаанда - 30409 үхибүүд, 6 һургуулида гурбадахи халаанда 1019 үхибүүд һураа. Үмхирһэн, аюултай болоһон 17 һургуулида 2628 һурагшад һураһан байна. 50 хубиһаа ехээр хуушарһан һургуулида 70 мянган үхибүүд һуралсал гараа.
2018-2019 һуралсалай жэлдэ үшөө гурбан һургуулида 220 һурагша гурбадахи халаанда һураха. Тиихэдэ уласай 9 һургуулида 1239 үхибүүд гурбадахи халаанда һураха болоно (эдэ булта шахуу һургуулинууд үмхирһэн, аюултай болоһон).
2016-2025 онуудта «Ородой Холбоото Уласай можо нютагуудта һуралсалай эмхинүүдтэ шэнэ һууринуудые байгуулха», Буряад Уласай һургуулинуудта гурбадахи халаан усадхаха гэһэн гүрэнэй программануудаар 2020 он болотор улас дотор 1660 һууритай дүрбэн һургуули баригдаха юм. Тэрэнэй барилгада 1 миллиард 390,8 сая түхэриг һомологдохо.
Тиигэбэшье эдэ программанууд улас дотор гурбадахи халаан усадхаха асуудал шиидхэнэгүй. Уласай бюджедэй дутагдал хараадаа абан, федеральна бюджетһээ нэмэлтэ 4 миллиард 37,5 сая түхэриг һомололгодо, тиихэдэ 2025 он болотор үндэһэн программануудаар улас дотор хүүгэдэй сэсэрлигүүдые барилгада мүнгэ һомололгодо туһа хүргыт гэжэ Алексей Цыденов Дмитрий Медведевтэ хандаба.
Буряад уласай хүүгэдэй сэсэрлигүүд һургуулиин наһа гүйсөөгүй бүхы үхибүүдые багтааха аргагүй. Тиихэдэ Ородой Холбоото Уласай можо нютагуудта 2 һаратайһаа гурбатай болотор үхибүүдые болбосоролой эмхинүүдтэ хабаадуулха «Болбосорол хүгжөөлгэ» программада Буряад улас оруулагданхай.
2018 ондо Буряад уласта федеральна бюджетһээ - 439,8 сая түхэриг, уласай бюджетһээ - 27,3 сая түхэриг, 2019 ондо федеральна бюджетһээ - 328,5 сая түхэриг, уласай бюджетһээ 320,9 сая түхэриг һомлогдожо, 1124 һууритай хүүгэдэй сэсэрлигүүд баригдаха. Тиигэбэшье Буряадта хүүгэдэй сэсэрлигэй дутагдалай асуудал шиидхэгдэхэгүй. Улас дотор үшөө 43 хүүгэдэй сэсэрлиг бариха хэрэгтэй. Барилгын сэн 9 миллиард 710,6 сая түхэриг болоно. Тэрэшэлэн хүүгэдэй 7 сэсэрлигэй барилга 2019 ондо эхилхээр хараалагдана. һургуулиин наһа хүсөөгүй үхибүүдэй 1600 һууритай болбосоролой эмхиинүүдэй барилгада 1 миллиард 660,6 сая түхэриг хэрэгтэй. 2020 онһоо 2 миллиард 60 сая түхэриг гаргашалжа, хүүгэдэй 8 сэсэрлиг барихаар түсэблэгдэнэ. Саашадаа 2015 он болотор 5 миллиард 990 сая түхэригтэ үшөө 28 сэсэрлиг баригдахаар хараалагданхай.
Буряад уласай бюджетдэ мүнгэнэй дутагдалай асуудалһаа боложо, хүүгэдэй сэсэрлигүүдые барилгада мүнгэн һомологдоногүй. Энэ асуудал ганса уласай бюджедэй хүсөөр шиидхэхэ аргагүй.
