903
«Мираторг» компани Буряад Уласай хүдөө ажахыда мүнгэ зөөри һомолжо, улас дотор ажалаа үргэлжэлүүлһээр. Кабанск аймагай хзизаарламал харюусалгатай «Бин-Агро» бүлгэм федеральна холдингтой бод мал худалдажа абаха тухай хэлсээ баталба. Һаян сагта казах үүлтэрэй 300 толгой бодо мал худалдахаар түсэблэгдэнхэй гэжэ Буряад Уласай хүдөө ажахын яаманда мэдээсэнэ.
«Буряадта мяхан үүлтэрэй бодо мал, энэнь бидэндэ удха шанартай. Эндэхи мал манай эрилтэнүүдтэ таарана. Уласай бүхы хүдөө ажахынуудта шалгалта үнгэргэһэнэй удаа, үхэр мал худалдажа абахаар бэлэмди. Тиихэдэ хүдөө ажахы эрхилэгшэдэй эмэ малай тоо дээшэлүүлээ һаань, һайшаалтай», - «Мираторг» холдингын бодо мал худалдан абаха таһагай хүтэлбэрилэгшэ Иван Козляев хэлэбэ.
Тиихэдэ «Афанасьев С.Б.» гэһэн ажахыһаа 140 толгой бодо мал худалдажа абаха тухай уридшалһан хэлсээн баталагданхай. Мүнөө Бэшүүр аймагай хизаарламал харюусалгатай «Победа» бүлгэм болон Ярууна аймагай «Үльдэргэ» ажахытай хэлсээ баталха талаар «Мираторг» компани ажал ябуулна.
2017 оной январиин 18-да Бэшүүр аймагһаа казах үүлтэрэй залуу бодо мал «Мираторг» компанида ябуулагдаа гэжэ һануулнабди. Сергей Афанасьевай ажахы 70 толгой буруу федеральна компанида худалдаһан байна. Удаань эдэ буруунуудһаа шэлэн абажа, Тулын можодо тэжээлдэ эльгээгдээ. Буряад Уласай Толгойлогшо Алексей Цыденовэй хүтэлбэри доро хүдөө ажахын болон эдеэ хоолой яаманай 2017 оной ноябриин 22-то мал ажахы хүгжөөхэ асуудалнуудаар үнгэргэгдэһэн суглаанда «Мираторг» компанитай суг ажал ябуулха тухай хэлсэгдээ. Энэ суглаанда «Мираторг» агрохолдингын захиргаанай асуудалнуудай талаар захиралай орлогшо Михаил Якубовский ажал суг ябуулха тухай дурадхал оруулаа.
