Буда Ачитуевич Агбанов 1918 ондо Хэжэнгэ аймагай Хөөрхэ нютагта түрэhэн. Эсэгын дайнай эхилхэлээр 1941 оной август һарада Хори аймагай сэрэгэй комиссариадаар Улаан Армида татагдаhан.
Эсэгэ ороноо хамгаалгын Агууехэ дайнай байлдаануудта 1942 оной май hарын 23-hаа 1944 оной февраль болотор Баруун, Брянска болон 1-дэхи Белорусска фронтнуудай сэрэгэй бүридэлнүүдтэ хабаадаhан байдаг. Тэрэ дайн байлдаануудта эрэлхэг зоригтойгоор хабаадаhанайнгаа түлөө 33- дахи Армиин артиллериин командалагшын 1943 оной сентябриин 9-эй захиралтаар Эсэгэ ороноо хамгаалгын 2-дохи шатын орденоор шагнагдаба. Тэрэнэй зууршалгадань иигэжэ бэшээтэй hэн: «Верховье шадар немецүүдэй бэхижүүлгые сүмэ сохилгондо эршэ хүсэтэй буудалдаан соо өөhэдынгөө буугаа болюулангүйгөөр буудажал байгаа, саг соогоо байень олохоhоо гадна, буудалгаяа тон зүбөөр оноохо, тэдэнэй сэхэ шагаажа буудахада, 1943 оной августын 8-да хоёр пулемёт, нэгэ противотанкова пушка ба дайсадай 15 солдадууд хосороогдоо, үглөөниинь хоёр блиндаж hалгаагаа, самоходно нэгэ оруди тэhэлээ ба немецүүдэй хорёод гаран офицер болон солдадуудые алаhан байна».
Тэрэ орденhоо гадна сержант, РГК-гай 55-дахи гаубична-артиллерийскэ полкын командир Буда Ачитуевич «Дайшалхы габьяагай түлөө», «1941-1945 онуудай Эсэгэ ороноо хамгаалгын Агууехэ дайнда Германиие илаhанай түлөө» гэhэн медальнуудаар шагнагдаhан.
1945 ондо түрэл нютагаа бусажа, 2000 ондо наhа баратараа «Манай ажал», «Победа» колхозуудта ба «Первомайский» совхоздо малшанаар ажаллаhан намтартай.
Бато-Цырен ДУГАРОВ