1341
Үсэгэлдэр, июлиин 18-да, Улаан-Үдэдэ «Асари ехэ торгон замда» гэһэн аяншалгын долоон хоног эхилбэ. «Асари ехэ Торгон замда аяншалгын долоон хоног» гэһэн хэмжээ ябуулга июлиин 18-һаа 22 болотор эмхидхэгдэхэ. Хэдэн үдэрэй туршада аяншалгын һалбариин мэргэжэлтэд болон айлшад Буряад уласай үзэсхэлэнтэй танилсажа, дэлхэйдэ мэдээжэ шеф-поварнуудай эдеэ амталха аргатай.
Ородой Холбоото Улас Азиин гүрэнүүдтэй Буряад Улас хэр угһаа хойшо холбоһон түүхэтэй. Торгон зам һэргээхэ талаар шухала үүргэ Буряад орон дүүргэнэ. Тиимэһээ «Асари ехэ торгон замда аяншалгын долоон хоног» гэһэн хэмжээ ябуулга улас дотор эмхидхэгдэнэ.
Фестивалиин нээлгын баяр ёһололдо Буряад орон онсо шухаг, баян түүхэтэй нютаг юм, тэрэнэй гайхамшаг үзэсхэлэнтэй танилсаха гээ һаа, нэгэнтэ бэшэ Буряад уласаар аяншалха хэрэгтэй гэжэ уласай хүтэлбэрилэгшэ Алексей Цыденов тэмдэглэбэ.
«Долоон хоногой туршада Буряадай гайхамшаг байгаали бүгэдыень хаража шадахагүйт. Тиигэбэшье суута Байгал далайн агаараар амилжа, Буряадай баян түүхэ, соёлтой танилсаха аргатайт. Байгал далай дэлхэйн зэндэмэни, тэрэ хүниие гайхуулха, һүрдөөхэ шэдитэй. Буряад уласта гүрэнэймнай олон тоото арадуудай соёл, заншал нэгэдэнхэй. Манай нютагай айлшадта Буряадай хүндэмүүшэ абари зан, Буряадай баян байгаали хаража баясажа, хүсэ шадал орожо, нүхэдөөрөө аяншалхыетнай хүсэнэб. Welcome to Buryatia!», - гэжэ Алексей Цыденов амаршалба.
«Асари ехэ торгон замда» гэһэн аяншалгын һалбариин хэмжээ ябуулгада Буряад уласай аяншалгын һалбариин арга боломжо, соёл, түүхэ, эдеэ хоол харуулагдаха. Тиихэдэ аяншалгашадые түүхэтэй замай баялигтай танилсуулжа, аяншалга улам хүгжөөхэ зорилго табигдана.
«Фестивалиин үедэ олон һонирхолтой хэмжээ ябуулганууд эмхидхэгдэхэ. Буряад улас ерэһэндээ баяртайб», - гэжэ ООН-ой дэргэдэхи Бүхэдэлхэйн аяншалгын эмхиин түлөөлэгшэ Патрик Фриц хэлэбэ.
«Асари ехэ торгон замда» гэһэн аяншалгын долоон хоногто үдэр бүхэн түсэблэгдэнхэй. Айлшад эрдэмэй семинарнуудта хабаадаха, музей болон үзэсхэлэн хараха, Буряад Уласта ажаһуудаг арадуудай заншалта эдеэ амталха аргатай.
«Буряад Уласта эдеэ хоолой һалбари аяншалгын долоон хоногой гол үйлэ болохо. «Буузын аха дүүнэр» гэһэн хэмжээ ябуулгада Буряадай, Эрхүү можын, Үбэр Байгалай хизаарай, Монголой шеф-поварнууд мүрысөөндэ хабаадаха», - гэжэ Буряад уласай аяншалгын сайд Мария Бадмацыренова хэлэбэ.
Аяншалгын долоон хоногой хэмжээндэ Буряад Уласай Сэлэнгэ аймагта Суурхайта нуурай эрьедэ «Талын аялганууд, мартагдаһан заншал яажа һэргээгдэнэб» гэһэн үндэһэн соёлой хуралдаан июлиин 20-до эмхидхэгдэхэ. Эндэ Буряад болон Монгол гүрэнүүдэй 108 морин хууршадай тоглолто үнгэргэгдэхэ юм.
Һүүлээрнь Ородой Холбоото Уласай үндэһэн соёлой эрхим 10 хэмжээ ябуулгануудай тоодо ородог, Загарай аймагай Асагадай «Талын нүүдэлшэн» үндэһэн соёлой комплексдо «Нүүдэлшэдэй ая дуун» гэһэн фестиваль «Асари ехэ Торгон замда аяншалгын долоон хоног» гэһэн хэмжээ ябуулгада хабаагшад хараха юм.
Анна Огороднигой гэрэл зурагууд
