998
Буряад Уласай барилгын болон гэр байрын ажахы шэнэдхэлгын сайдай орлогшын уялга дүүргэгшэ Евгений Коркин видеохолбоогой ашаар аймагай хүтэлбэрилэгшэдтэй суглаа үнгэргэбэ. Ородой Холбоото Уласай Юрэнхылэгшын «Болбосон түхэлтэй хотын оршон байгуулга» гэһэн түсэлөөр аймагууд дотор ажал ябуулагдана гэжэ нютагай засагай байгууламжануудай дарганар тоособо. Байгша ондо Буряадай 104 нютаг федеральна түсэлдэ хабаадана.
Мүнөө жэлдэ олон байратай гэрнүүд шадар 45 талмай болбосон түхэлтэй болгогдохо гэжэ түсэблэгдэнхэй. Тэрэнэй 15 газарта ажал хэгдэбэ. Гараха долоон хоногто хотын ажаһуугшадай һунгаһан газарнуудта заһабарилгын ажалнууд эхилхэ.
Буряадай Ярууна аймагта 800 мянган түхэригтэ олониитын газарнууд болбосон түхэлтэй болгогдобо. Эндэ аймагай ТОС-ууд ехэ туһа хүргэһэн байна. Хяагта аймагта паркын һэльбэн шэнэдхэлгэ үргэлжэлүүлэгдэһээр. Үнгэрһэн жэлдэ паркда һонтан заһабарилагдажа, һандалинууд болон бог шорой суглуулха һабанууд табигдаа.
Хойто-Байгалай аймагта гэрнүүд шадарай долоон газар болон олониитын нэгэ газарта заһабарилгын ажал хэгдэһэн байна. Северобайкальск хотодо Ленинградский прспектдэ оршодог парк болбосон түхэлтэй болгохо талаар ажал эхилэнхэй. Байгша ондо 4 сая түхэригэй заһабарилгын ажал хэгдэжэ. Тиихэдэ гэрэлтүүлгэдэ нэгэ сая түхэриг һомологдоо. Үнгэрһэн жэлдэ сэрэгшэдэй хүшөөгэй заһабрилга, хүүгэдэй сэнгэхэ хэрэгсэл, тамирай хэрэгсэл, бог шорой углуулха һабанууд гэхэ мэтэ табигдаа. Энэ ажалнуудта 3,4 сая түхэриг һомологдоһон байна. Буряад Уласай барилгын болон гэр байрын ажахы шэнэдхэлгын яаманда мэдээсэһэнэй ёһоор, сентябриин эхинһээ парк ажаһуугшадаа угтан абаха.
- Жэлэй һүүл болотор улас дотор энэ түсэлөөр ажалнууд дүүрээд байха ёһотой, - гэжэ Евгений Коркин тэмдэглэбэ.
