1140
Июлиин 20-21-нэй үдэрнүүдтэ Буряад уласай Загарай аймагай «Талын нүүдэлшэн» гэһэн аяншалгын комплексдо уласхоорондын «Нүүдэлшэдэй ая дуун» фестиваль 10-дахияа эмхидхэгдэхэ. Энэ хэмжээ ябуулгада мэдээжэ аяншалагша, этно-фотограф Александр Химушинай «Мир в лицах» гэһэн үзэсхэлэн дэлгэгдэхэ.
«Мир в лицах» гэһэн түсэлдэ дэлхэйн арадуудай соёл, ёһо заншал харуулагдагна. Дэлхэйн алишье зүгтэ ажаһуудаг арадуудай абари зан, үндэһэн хубсаһан, тэдэнэй ажабайдалай дүй дүршэл Александр Химушинай гэрэл зурагуудта харуулагданхай. Энэ түсэл дээрэ мэдээжэ аяншалагша хэдэн жэлэй туршада ажаллана. Эндэ дурадхагдаһан гэрэл зурагууд юрэ бэшэ, таагдагшагүй өөрын нюусатай. Тиихэдэ мүнөө сагта үгы болоһон шахуу үсөөн тоото арадууд гэрэл зураагуудта буулгагданхай.
Эдэ гэрэл зурагуудые буулгахын түлөө Александа Химушин ганса Сибириин хизаарта 60 мянган модонһоо дээшэ зай гаталһан байна. Тэрэ ямаршье харгы дабаха машина жолоодон, холо оршодог нютагуудаар ябажа, гэрэл зурагуудые буулгаа. Тэрэнэй ажалнуудта дэлхэйдэшье, Ородой Холбоото Улас доторшье хүсэд мэдэгдэхэгүй арадуудай ажабайдал зурагалгаданхай. Арбан жэлэй туршада аяншалагша дэлхэйн 86 гүрэнөөр ябажа, олон тоото үндэһэн арадуудай гэрэл зурагай онсо суглуулбари бүтээбэ.
«Энэ үзэсхэлэндэ минии бүтээһэн ажалнуудые хараха аргатайт. Ородой Холбоото Уласай дотор минии эгээл дуратай можо нютагуудай нэгэн болохо Буряад Уласта ажаһуугшадай гэрэл зурагууд олоор дэлгэгдэхэ», - гэжэ Александр Химушин хэлэбэ.
Мэргэжэлтэ фотограф Александр Химушинай гэрэл зураг бүхэндэнь үндэһэн арадуудай заншал, ажабайдал тодоор харуулагданхай гэжэ тэмдэглэлтэй.
«Хилэ гэжэ үгы шахуу болоһон оршондо ажаһуунабди. Тиимэһээ иимэ түсэлнүүд ехэ удха шанартай. Тэрэнэй ашаар дэлхэйн хаа хаанагүй ажаһуудаг арадуудтай танилсанабди. Александр Химушин дээдэ гарай мэргэжэлтэн, тэрэнэй буулгаһан ажалнуудые тон һайнаар хэблэхэ хэрэгтэй», - гэжэ Александр Химушинай түсэл дэмжэдэг Canon Россия компаниин маркетингын захирал Антон Зуевич хэлэнэ.
Буряад Уласай Засагай газарай хэблэлэй албанай гэрэл зураг
