1003
2018-2019 һуралсалай жэлдэ һургуулинуудай бэлэдхэлэй талаар Буряад Уласай Толгойлогшо Алексей Цыденовэй хүтэлбэри доро суглаан үнгэргэгдэбэ. Буряад уласай һургуулинуудта ехэ заһабарида һомологдоһон мүнгэн май һарада үгтэжэ, аймагуудай 10 һургуулида заһабарилгын ажал эхилээдүй гэжэ болбосоролой болон эрдэм ухаанай яаман түлөөлэгшэд мэдээсэбэ. Тиимэһээ сентябриин нэгэн болотор һургуулинууд бэлэн бэшэ байжа болохо. Буряад Уласай Толгойлогшо Алексей Цыденов заһабарилгын ажал хинажа, саашадаа мүнгэнэй һомололго удаашаруулхагүй гэжэ захирба.
Буряад уласай болбосоролой болон эрдэм ухаанай сайдай нэгэдэхи орлогшо Галина Фомицкаягай хэлэһээр, уласай 26 һургуулида ехэ заһабари хэгдэхэ. Буряад Уласай Засагай газарай 2018 оной майн 4-нэй 226-дахи «2018 ондо нютагай засагай байгууламжануудай бюджедтэ болбосоролой эмхинүүдэй ехэ заһабарилгада тэдхэмжэ хубааха тухай» гэһэн тогтоол бэелүүлэн, аймагуудта 174,3 сая түхэриг һомологдоо.
- Заһабарилгын ажалда ехэ мүнгэн һомологдоо, сентябриин нэгэн болотор һургуулинуудта заһабарилга хэжэ үрдихэгүйдөө болохобди, - гэжэ Галина Фомицкая хэлэбэ.
Нютагай засагай байгууламжануудтай хэлсээн баталагдажа, май һарада мүнгэн дамжуулагдаа.
- Ямар ушарһаа мүнгэ дамжуулха хэлсээн май һарада баталагдааб? - гэжэ уласай хүтэлбэрилэгшэ асууба.
Буряад уласай болборолой болон эрдэм ухаанай яаманай мэдээсэһээр, мүнгэ һомолхо тухай апрелиин сессидэ баталагдаа, тэрээнһээ урид уласай бюджетһээ һомологдохо мүнгэнэй хэмжээн эли бэшэ байгаа. Энэ асуудалаар ажалаа гуримшуулха тухай болбосоролой болон эрдэм ухаанай яаманай түлөөлэгшэд хэлэбэ.
- Декабрь, февраль һарануудай сессидэ энэ асуудал юуундэ шиидхэгдээгүйб? Мүнөө заһабарилгын ажалнуудые августын 15 болотор хэхэ гэжэ эрилтэ табинат. Энэ асуудалаар дансануудые таанар бэлдэнэт. Жэлэй эхинһээ тоололгонуудые хэжэ эхилхээр бэшэ гү? Хойто жэлэй февраль һарада аймагуудта мүнгэн дамжуулагдаад байха ёһотой. Нютагай засагай байгууламжануудта ехэ заһабарилгада хэхэ эмхи шэлэлгын мүрысөөн эртээнһээ үнгэргэхэ аргатай байха. Бабантын аймагта заһабарилга хэхэ хэрэгсэлнүүдээ эртээнһээ абахаар байхаар. Мүнөө һомологдоһон мүнгөөр, аймагай байдал хараадаа абабал, хойто жэлдэ заһабарилга ажал хэгдэхэ. Энэ танай ажал! – гэжэ Алексей Цыденов хэлэбэ.
Июлиин 18-най мэдээгээр, заһабарилга хэхэ эмхиин мүрысөөн үнгэргэгдэжэ, Мухар-Шэбэр, Аха, Сэлэнгэ, Тарбагатай, Түнхэн аймагуудта хэлсээн баталагдажа, 14 һургуулида заһабарилгын ажал эхилээ.
Зэдэ, Захаамин, Хурамхаан, Хори, Тарбагатай, Хойто-Байгалай аймагууд болон Улаан-Үдын болбосоролой 8 эмхинүүдтэ заһабари хэхэ эмхи шэлэлгын мүрысөөндэ гомдол орожо, хэлсээн баталагдаадүй. Нютагай засагай байгууламжануудай болбосоролой хүтэлбэринүүдэй дарганарай мэдээсэһээр, заһабарилгын ажал һуралсалай эхилтэр хэгдэхэ.
Бэшүүр аймагай Окино-Ключи болон Байгал шадарай аймагай Нестеровэй һургуулинуудта заһабарилга хэхэ эмхи шэлэлгын мүрысөөн үнгэргэгджэнэ. Эдэ һургуулинуудта август һарада хэлсээн баталагдаха.
Бабанта аймагай Уакидай һургуулида заһабарилга хэхэ тухай хэлсээн сентябрь һарада баталагдаха. Юундэб гэхэдэ, заһабарилгын хэрэгсэлнүүдые үбэлдөө Ббабнта аймаг хүрэтэр абаашахаар. Тиимэһээ Бабанта аймагта заһабарилгын ажал хабар эхилжэ, 2019 оной июлиин 1 болотор дүүргэхэ болзортой.
Буряад Уласта бүхыдөө болбосоролой 463 эмхи бии. Һуралсалай шэнэ жэлдэ һурагшадай тоо 143 238 хүн.
Анна Огороднигой гэрэл зураг
