1086
Мүнөөдэр, июлиин 20-до, «Нүүдэлшэдэй ая дуун-2018» фестивалиин айлшан Вячеслав Бутусов Улаан-Үдэдэ бууба. Арбадахияа эмхидхэгдэхэ хэмжээ ябуулгада Вячеслав Бутусов хүгжэмшэдтэеэ хамта алдарта Nautilus Pompilius хамталигай дуунуудые гүйсэдхэхэ. Энэ тоглолто июлиин 21-дэ Загарай аймагай “Талын нүүдэлшэн” аяншалгын комплексдо үдэшын 20 сагһаа эхилжэ, час хахадай туршада хүгжэмдэ дуратайшуулые баясуулха. Мүнөөдэр үдэшын 17 сагта хэмжээ ябуулга эхилхэ.
Вячеслав Бутусовые “Байгал” аэропортдо Буряад Уласай соёлой сайд Соёлма Дагаева, Буряадай филармониин уран һайханай хүтэлбэрилэгшэ Наталья Уланова гэгшэд угтаба.
“Вячеслав Бутусов бууба! Бултанииетнай «Нүүдэлшэдэй ая дуун-2018» фестивальда хүлеэнэбди”, - гэжэ Наталья Уланова сүлжээндэ бэшэһэн байна.
Байгша оной хүгжэмэй уласхоорондын хэмжээ ябуулгада Индонези, Солонгос, Монгол, Хитад, Ородой Холбоото Уласай болон Буряад уласай хүгжэмшэд хабаадаха.
«Нүүдэлшэдэй ая дуун» гэһэн фестиваль хадаа хүгжэмэй уласхоорондын хэмжээ ябуулга болоно. Тэрэ 2009 ондо байгуулагданхай. Фестивальда арадай ёһо заншал оршон байдалай хотын соёлтой холбон, үндэһэн арадай хүгжэм шэнээр найруулан, үргэн талын уудамда хүн зонтой танилсажа, харилсажа, мэдээжэ хүгжэмшэдтэй танилсаха арга олгогдоно.
Урда жэлнүүдэй хүгжэмэй хэмжээ ябуулгада Украинын «ДахаБраха» этно-хаос бенд, Испани-Америкын Холбоото Штадуудай Brazzaville, Москва хотын Пётр Наличай хүгжэмэй коллектив, Хитадай Nova Heart, Франциин Colt Silvers, Кениин GarGar, Грузиин Bani, Мгзавреби,Япониин АSKA, Борис Гребенщиков, Москва хотын VOLGА, «Калинов мост», Болгариин Irfan, Испаниин Давид Сорроче, Мария Бертос, Солонгосой Jambinai бүлгэмүүд хабаадаа.
Фестиваль эмхидхэн байгуулагша хадаа Буряад Уласай Засагай газарай дэмжэлтээр соёлой яаман болоно.
