1093
Малайзи, Урда Солонгос, Монгол, Хитад, Ородой Холбоото Уласай хүгжэмшэд «Нүүдэлшэдэй ая дуун» гэһэн хүгжэмэй уласхоорондын фестивальда июлиин 20-21-дэ хабаадаха. Энэ хэмжээ ябуулга Загарай аймагай Асагадай «Талын нүүдэлшэн» аяншалгын клмплексдо үнгэргэгдэхэ.
Байгша оной фестивальда олон һонирхолтой хэмжээ ябуулганууд хараалагданхай, хүгжэмдэ дуратайшуул дуратай шэглэлээрээ хүгжэм, дуу шагнаха аргатай.
Тиихэдэ анха түрүүшынхиеэ хоёр тайзан дээрэ тоглолто табигдаха. Үргэн талада тайзан табигдажа, хажуудань галерей нээгдэхэ. Эндэ мэдээжэ аяншалагша, фотограф Александр Химушинай «Мир в лицах» гэһэн үзэсхэлэн дэлгэгдэхэ юм.
- Фестивалиин эхилхэһээ урид эмхидхэгдэһэн OFF-программын үедэ һонирхолтой хүгжэмэй бүлгэмүүд элирүүлэгдээ. Тэдэнэр Асагадта хоёрдохи тайзан дээрэ тоглолто харуулха. Харагшад өөрынгөө дураар һонирхоһон хүгжэмөө шэлэн, шагнаха аргатай, - гэжэ Буряадай гүрэнэй филармониин уран һайханай хүтэлбэрилэгшэ Наталья Уланова хэлэбэ.
Фестивалиин түрүүшын үдэр мүнөө үдэшын 17 сагһаа эхилхэ. Эндэ Буряад, Хакас, Тывагай хүгжэмшэд хабаадаха. Гол тайзан дээрэ Буряадай «Сагаан Турлааг» бүлгэм, инди-хүгжэмшэн Макс Fилини, Дашима гэгшэд тоглолто эхилхэ. Тиихэдэ Малазиин The Venopian Solitude, Солонгосой 3rd line butterfly, Үбэр Байгалай хизаарай Хагани Гулиев гэгшэд хүгжэм дуу бэлэглэхэ.
Июлиин 21-дэ хэмжээ ябуулга үдэрэй 13 сагһаа эхилхэ. Эндэ Буряадай «Урагшаа», Эрхүү можын Happy Juzz фанк-бүлгэм, Хакасиин Khoоmei Beat ирагуу хүгжэм зэдэлүүлхэ. Үдэшэлэн Монголой хүгжэмдэ дуратайшуул The Colors, морин хууршадай ансамбль болон Niciton бүлгэмүүдэй хүгжэм дуу шагнаха аргатай.
19 сагай һүүлээр Хитадай мэдээжэ Hanggai бүлгэм харагшадые урмашуулха. Удаань Вячеслав Бутусов «Наутилус Помпилиус» бүлгэмэй дуунуудые харагшадта бэлээглэхэ. Тиихэдэ Ocean Jet, Shaman & Shartner гэгшэд үдэшэ үргэлжэлүүлхэ.
«Нүүдэлшэдэй ая дуун» гэһэн фестивалиин бага тайзан дээрэ «Хама Угы», Макс Fилини, marie_marie, Дашима, 10km, «ДАРИ» болон Partyfon, бүлгэмүүд тоглолто табиха.
«Талын нүүдэлшэн» хүрэтэр яагаад ошохоб?
«Нүүдэлшэдэй ая дуун» фестивальда хараха дуратайшуул Буряадай оперо болон баледэй дэргэдэхи театрай талмайһаа «Талын нүүдэлшэн» хүрэтэр автобусуудаар ошохо аргатай. Түрүүшын үдэр автобусууд Улаан-Үдэһөө үдэрэй 14 сагһаа үдэшын 20 болотор ябаха. Июлиин 21-дэ үглөөнэй 11-һээ үдэшын 18 болотор ябаха. Тиихэдэ Асагадһаа үдэшын 22 сагһаа 00:30 болотор хоёр үдэрэй туршада автобус ябаха. Биледэй түлбэри нэгэ зүг руу 120 түхэригтэ.
«Талын нүүдэлшэн» комплексын дэбисхэртэ майхануудые табиха талмайнууд, халуун хоол бариха, эдеэ хоол худалдан абаха газарнууд бэлдэгдэхэ.
Биледэй сэн июлиин 20-до - 1000 түхэриг, июлиин 21-дэ 1200 түхэригтэ юм. 5 наһатай болотор үхибүүд түлбэригүй орохо, 5-һаа 12 наһа хүрэтэр – 100 түхэриг, оюутад, наһанайнгаа амаралтада гараһан зон, эрэмдэг бэетэй хүнүүд, 12 наһанһаа дээшэ һурагшад 400 түхэригөөр билет худалдан абаха аргатай.
