666
Мүнөөдэр, июлиин 23-да, Советскэ Союзай Герой Г. Жанаевай нэрэмжэтэ паркда «Бурядай команда» гэһэн хуралдаан үнгэргэгдэбэ. Энэ хэмжээ ябуулгада Буряад Уласай Засагай газарай Түрүүлэгшын хүдөө ажахы хүгжөөлгын талаар орлогшо – Буряад Уласай хүдөө ажахын болон эдеэ хоолой сайд Даба-Жалсан Чирипов хабаадаба. Хуралдаанда хабаадагшад хүдөө ажахын хүгжэлтэдэ түрүүлэн бэелүүлхэ зорилгонууд тухай хэлсэбэ.
Буряад Уласай Толгойлогшо Алексей Цыденов, Улаан-Үдэ хотын засаг дарга Александр Голков, «Улаан-Үдын авиазавод» бүлгэмэй юрэнхы захирал Леонид Белых, Инна Ивахинова гэгшэд сугларагшадые амаршалба.
«Манай шухала зорилго хадаа улас дотор ажабайдал һайжаруулга болоно. Хүн бүхэн һайн салинтай, һайн ажабайдалтай байха ёһотой. Уласаа хүгжөөн, урагшаа дабшая!» - гэжэ Буряад Уласай Толгойлогшо Алексей Цыденов хэлэбэ.
Хуралдаанай хэмжээндэ үйлэдбэри, эдэй засаг, бага болон дунда олзын хэрэг эрхилэлгэ, болбосорол, хүдөө ажахы болон элүүрые хамгаалгын һалбари саашадаа яажа хүгжөөхэб гэһэн асуудалнуудаар талмайнууд эмхидхэгдээ.
Буряад Уласай хүдөө ажахын сайд Даба-Жалсан Чирипов «Яагаад хүдөө ажахы хүдөө нютагуудай эдэй засагай хүгжэлтын үндэһэн һуури болгохоб?» гэһэн секци хүтэлбэрилбэ. Хуралдаанда хабаадагшад энэ асуудалаар эдэбхитэйгээр һанаамжануудаараа хубаалдаба. Тус асуудал шиидхэхын тула, нэн түрүүн, агропромышленнэ комплекс эд хэрэгсэлэй талаар һэльбэн шэнэдхэхэ, мүнөө үеын МТС-үүдые байгуулха, үүлтэртэ мал хүгжөөхэ гүрэнэй албаан һэргээхэ, хүдөө ажахын эд үйлэдбэрилжэ, тэрэнээ худалдаха болотор ажал нарижуулха хэрэгтэй.
«Хүдөө ажахын үйлэдбэри, кооперацинуудые байгуулга - эдэ бүгэдэ дэлгүүрэй харилсаанда аша үрэтэй, байха ёһотой» - гэжэ Буряад Уласай хүдөө ажахын сайд Даба-Жалсан Чирипов хэлэбэ.
Хуралдаанай дүнгүүдээр, саашадаа ябуулха ажалай дурадхалнууд, холын хараата түсэбүүд табигдаа. Эдэ бүгэдэ Буряад Уласай Толгойлогшо Алексей цыденовэй хүтэлбэри доро бэелүүлэгдэхэ.
Буряад Уласай хүдөө ажахын болон эдеэ хоолой яаманай хэблэлэй албанай гэрэл зураг.
