Хүдөө ажахын яаманай мэргэжэлтэд
Буряад Уласай хүдөө ажахын ба хоол хүнэһэнэй сайд Даба-Жалсан Чирипов урда долоон хоногто Кабанскын аймагта ажаллаба. Тэндэ “Байгалай” гэһэн хүдөө ажахын гүрэнэй предприятиин дэргэдэ “Һү болбосоруулха шэнэ онол арганууд” гэһэн сэдэбээр хуралдаа үнгэргөө. Мүн баһа Ехэ Колесово нютагай “Рубин” ажахын малай тэжээл бэлэдхэхэ шэнэ технологитой танилсаа, Бага Колесово нютагта сабшалангай газар руу уһа татаха ажалай ябаса шалгажа ерэһэн байна.
Түрүү технологинуудтай танилсалга
- Һүнэй һалбариин ажалшадай мэргэжэл дээшэлүүлхэ ажал ходо ябуулагдажа байдаг, харин энэ түрүүшынхиеэ иимэ нүүдэл хуралдаае һүнэй заводой дэргэдэ үнгэргэжэ байнабди. Эндэ Буряад Уласай һүнэй заводуудай технологууд суглараа. Хуралдаагаа эхилхын урда тээ нэн түрүүн “Байгалай” гэһэн предприятиин мэдэлдэ ородог һүнэй заводой ажалтай дүтөөр танилсаабди. Һургалтада ерэһэн айлшаднай хоёр нюдөөрөө шэнэ завод хараба гээшэ. Тус заводто һү болбосоруулха тоног түхеэрэмжэнь хуу шэнэлэгдэһэн байна. Түрүү технологинуудые нэбтэрүүлжэ байһан завод болоно. Эндэ зөөхэй (сливки), сүсэгы (сметана), ээзгэй, тоһо, тараг ба йогуртнуудые үйлэдбэрилнэ.
Тус хуралдаанда хабаадагшад һү болбосоруулха һалбариин хүгжэхэ зам, һү болбосоруулха ба биһалаг (сыр) хэхэ шэнэ арганууд тухай хөөрэлдөө үүсхэгдэнэ. Буряад Уласта гүрэнэй талаһаа һү болбосоруулхада, ямар дэмжэлтэ хэрэгтэйб, сагаан эдеэнэй амта, шанар шэнжэ дээшэлүүлхэдэ, юун дуталданаб гэһэн асуудалнууд яригдана, - гэжэ хүдөө ажахын сайд Даба-Жалсан Чирипов хэлэнэ.
Даба-Жалсан Чирипов, Татьяна Полозова
Хүдөө ажахын сайдай хэлэһээр, иимэ түхэлтэй уулзалганууд ерээдүйдэ һүнэй үйлэдбэри дээшэлүүлхэдэ туһа болоно. Сагаан эдеэ элбэг дэлбэг болгохо хэрэгтэй. Хүн зоноо экологиин сэбэр эдеэ хоолоор хангаха, гадаада оронууд руу һайн шанартай хоол худалдажа, ашаг олзоо дээшэлүүлхэ гэһэн зорилгонууд табигдана. Хитадай олзын хэрэг эрхилэгшэд манай эндэ үйлэдбэрилэгдэһэн хоол абадаг болохо һанаатай байдаг. Юундэб гэхэдэ, эндэхи эдеэмнай экологиин талаһаа сэбэр юм.
Болбосоруулха һүн дуталдана
Үмсэдэ үнеэнэй һү һааха ажалые яажа урмашуулхаб гэһэн асуудалда Хүдөө ажахын яаман бодолгото болоно. Манай уласта ууха һүн, болбосоруулха һүн дуталдана. Үмсэдэ һү һаадаг болгохын тула нэн түрүүндэ һүнэй сэн дээшэлүүлхэ хэрэгтэй. Хэрбээ үмсэһөө һү худалдан абаха сэнгыень 25 түхэригтэ (1 литрэй түлөө) хүргэжэ шадаа һаа, һү һааха ажал ашагтай болохо гэжэ сайд һанамжална һэн.
Тус хуралдаанда Красноярскын хизаарай “СТВ- Сервис” гэһэн компаниин түлөөлэгшэд хабаадалсаа. Тэрэ компани Буряад Уласай һүнэй заводуудтай 15 жэлэй туршада нягта холбоотойгоор ажалладаг юм байна. Һү болбосоруулха тоног түхеэрэмжэнүүдые зохёожо үгэдэг томо компанинуудай нэгэн болоно. Красноярскһаа ерэһэн технолог Юлия Смирнова болбол хуралдаанда сугларһан хүнүүдтэ зөөлэн биһалаг (сыр) хэхэ аргануудые харуулжа үгөө. Мүн баһа шэнэ технологи тухай һонирхолтой хөөрөө дэлгээһэн байна.
«BAIKALMILK» гэһэн бренд
Кабанскда эмхидхэгдэһэн суглаанда «BAIKALMILK» гэһэн уласай урилдаанай дүн согсологдоо. Тус урилдаанда Буряадта бүтээгдэһэн һүнэй зүйлнүүд үзүүлэгдэжэ, амталагдаһан, нарин шэнжэлэгдэһэн байгаа. Урилдаанай дүнгөөр, ФГУП «Байгалай», ООО «Берилл», ООО “Коопроизводство», СППоК Закамна-Агропродукт, ООО «Бэшүүрэй тоһоной завод» гэһэн үйлэдбэринүүдэй сагаан эдеэн эрхим шанартай гэжэ элирүүлэгдэжэ, «BAIKALMILK» гэһэн үнэмшэлгэнүүдтэ хүртэбэ.
«BAIKALMILK» гэһэн бренд хожом саашадаа Буряад Уласай һүнэй зүйлнүүдэй эрхим шанарай тэмдэг болохо гэжэ Хүдөө ажахын яаманай таһагай дарга Татьяна Полозова мэдүүлээ.
Малайнгаа тэжээл нөөсэлхэ ажалаа һайжаруулна
Хүдөө ажахын сайд Д-Ж. Чирипов Кабанскын аймагта “Рубин” гэһэн ажахын малай тэжээл бэлэдхэхэ ажалаар һонирхобо. Тус ажахынхин шэнэ аргаар үбһэ тэжээлээ нөөсэлдэг болоһон байна.
ООО “Рубин” - Буряадтаа түрүү ажахынуудай нэгэн. Мал олоор баридаг, һаалиин фермэтэй, һүнэй заводтой юм. Ажалдаа түрүү технологинуудые хэрэглэжэ хүдэлнэ.
Ехэ Колесово сомоной газар дэбисхэртэ фермэрэй ажахы байгуулһаар, 8 жэл боложо байна. Энээхэн саг соогоо малайнгаа тэжээлые бэлэдхэхэ ажалаа нилээн һайжаруулаа, абаһан тэжээлээ һайнаар хадагалжа һураа. Тэжээл һайтай байхадаа, малынь үдэсэтэй, һү һаалинь нэмэжэл байна.
- Манай эндэ хэрэглэжэ байһан технологи олигой ехэ ухаанай юумэн бэшэ, зүб мүрөөр, саг соогоо ажалаа таһалдуулангүй хүдэлнэбди. Бидэ сенаж хэдэг болоһомди. Ногоогоо сабшажа унагаагаад, ногооной шиигые 50 процент хүрэтэр хатааһан болоод лэ, хуряажа абанабди. Бүхы үбһэмнай пленко соо бүтүүгээр орёогдожо, рулон болгоогдоно. Иимэ аргаар бүтүү орёогдоһон үбһэмнай сенаж гэжэ нэрлэгдэдэг. Сенаж соо ногооной шэмэнь 90 процент хүрэтэр хадагалагдадаг. Манай хэһэн сенаж болбол, сомоотой үбһэнһөө 2 дахин ехэ шэмэтэй тэжээл, - гэжэ “Рубин” ажахын захирал Александр Никонов хөөрэнэ.
“Рубин” ажахы сабшалангуудтаа люцернэ гэжэ таримал ногоо ургуулдаг. Жэлдэ нэгэ газарһаа хоёр ургаса абадаг юм байна. Жэлдээ хоёр дахин үбһэ сабшана гэһэн үгэ. Тиигэжэ нэгэ гектар газарһаа 50-60 центнер үбһэ хуряана. Бидэнэй ябаха соо тэдэнэр түрүүшын сабшалгаһаа гектарһаа 20 центнер үбһэ хуряажа абаад байба. Намар тээшэ хоёрдохи үбһэ сабшалгадаа гектарһаа үшөө 30-аад центнерые абаха һанаатай байһанаа мэдүүлнэ һэн.
Хүдөө ажахын сайд Д-Ж. Чирипов Кабанскда үшөө хоёр газарта хүрөө. Бага Колесово һууринһаа холо бэшэхэнэ сабшалангууд руу уһа татажа байһан ажал дээрэ ошожо, ажалшадтайнь уулзаба. Тэндэ 220 гектар газарта уһалууриин ажал ябуулагдана. Уһа оруулха ажалые хүдөө ажахын яаман тэдхэнэ. Сайдай хэлэһээр, Буряад Уласта жэлдээ 1000 гектар талмайда уһалууриин ажал ябуулагдажа байдаг. Бага Колесово һууринай хажуудахи сабшалан уһалагдадаг болоходоо, гектар талмайһаа 80 центнер хүрэтэр үбһэ тэжээл хуряагдадаг болохо. Тус сабшалангай эзэнэй үгөөр, эндэ хуряаһан үбһэеэ рулон болгожо, худалдаанда гаргажа, үмсын ба хамжаанай ажахынуудые һайн шанарай үбһөөр хангаха зорилготой.
Кабанскын аймагта һү үйлэдбэрилхэ, малай тэжээл бэлэдхэхэ, огородой ногоо ургуулха талаар ажахынууд, үнэхөөр, һайн ажаллана.
Авторай гэрэл зурагууд