Владимир Молчанов
Буурал сагһаа хойшо тахын түбэрөөн һүлдэтэй тоонто нютаг - түхэреэн сагаан Түгнэ! Дүрбэн зүг, найман хизаарай алишье талаһаа ороходо, Түгнын дайда уужам үргэн хүхэ ногоон дэбисхэрээ дэлгэн, баян бардамаар угтадаг... Мэдээжэ уран зохёолшо, аха нүхэр Сергей Доржиевай энэ үгэнүүдээр һаяхана ошоһон замайнгаа тэмдэглэлнүүдые эхилхэмни.
Мухар-Шэбэр аймагай засаг дарга Владимир Молчановтай хэһэн хөөрэлдөөнһөө хэһэг та олондоо дурадхаһуу.
ҮБҺЭ ТЭЖЭЭЛЭЭ БЭЛДЭЖЭ ЭХИЛЭЭ
Байгша ондо хура бороо нилээд орожо, һүүлэй жэлнүүдтэ гантаһан Түгнын талые яһала уһалаа гэхэдэ болоно. Энээндэнь нютагай ажалша малша зон ехэ баяртай гээд, Владимир Николаевич энеэбхилэн угтаба. Тиихэдэнь иигэжэ асуубаб:
- Түгнымнай талада хэды ажахы тоологдоноб, үмсэдөө мал баригшадай тоо хэлыт?
- Мүнөө дээрээ 3 мянга гаран зон үмсэдөө адуу мал үсхэбэрилнэ, 6 томо ажахы хүдэлнэ. Тэдээн 15 мянга гаран гектар талмайда шэниисэ, обёос... тарина.
- Үбһөө сабшажа эхилээ гү, эдэмнай?
- Үбһэ тэжээлээ бэлдэжэ эхилээбди. Наратай сэлмэг үдэрнүүдэй тудабал, адуу малдаа хүрэмэ үбһэ тэжээл бэлдэхэбди. Арайл үбһэнэй үедэ бороо ороод һаладаггүй гүб даа... Һайн тээшэнь лэ бодоод байя!
- Удангүй үбэлнай болоод байха. Дулаагаар хангалгын хаһада бэлэдхэл ябуулагдана гү?
- Дулаа дамжуулгын хаһада бэлэдхэл хэхын тулада 10 гаран сая түхэриг һомоглогдоод, заһабарилгын ажалнууд ябуулагдажа байна. Һуралсалай, соелой болон эмнэлгын эмхинүүдэй байшангууд ээлжээтэ хаһада гүйсэд бэлэн байха!
- Тиихэдэ аймагай хуушарһан һургуули болон соёлой ордонууд заһабарилагдана ёһотой.
- Боомой, Суулгын, Шаралдайн һургуулинууд һэльбэн шэнэлэгдэнэ. Тиихэдэ Һэбэлдээн, Мяхуусхын, Боомой соёлой байшангууд заһабарилагдажа байнхай. Гадна Хүсөөтэдэ соёлой шэнэ ордон үүдээ сэлин нээгдэхэ.
- Зунай амаралта үргэлжэлһөөр. Һургуулиин үхибүүд юугээ хэнэб?
- “Берёзка”лагерьта 90 гаран үхибүүд амаржа байнхай. Тэдээн үдэр бүри сэбэр агаараар амилжа, газаа дураараа наадана. Бэедээ аша туһатайгаар сүлөө сагаа үнгэргэжэ байнхай.
- Хүдөөгэймнай зон үшөө юугээ хэнэ бэ? Футбол хараа юм ааб даа…
- Футболоор Бүхэдэлхэйн Чемпионадта нютагаймнай зон баhал хубитаяа оруулаа. Дотоодын хэрэгүүдэй яаманай Мухар-Шэбэрэй таһагай 3 мэргэжэлтэн Самара хотодо аюулгүй байдал сахижа байһанаа бусаа. Тэдэндээ аймагай захиргаанай зүгһөө Баярай бэшэгүүдые барюулаабди.
ЗАЛУУШУУЛ, УРАГШАА!
Мухар-Шэбэрэй залуушуулай эблэл байгуулагдажа эхилбэ. Нютагаархинаа эдэбхижүүлһэн энэ хүдэлөө Даша Гомбожапов, Цырен-Пунсэк Будаев, Зоригто Доржиев, Дугар Жалсанов гэгшэд хүтэлжэ байна. Эдэ хүбүүдэй хүсэ оролдолгоор залуу халаан нэгэдэжэ, аймагайнгаа хүгжэлтэдэ хубитаяа оруулан, нютагтаа аша туһатай байхын тулада шармайн, түрүүшынгээ хэмжээ августын 12-то эмхидхэнэ.
Мухар-Шэбэрэй залуушуул
Залуушуулай үдэртэ зорюулһан энэ һайндэртэ бэлэдхэл ябуулагдажа эхилээ. Илангаяа Мухар-Шэбэрэй засаг даргын орлогшо Андрей Рычковой хүтэлбэри доро түрүүшын зүблөөн үнгэрөө,һайндэрөө яагаад үнгэргэхэ тухай хэлсэбэ. Ута унжагай амаршалгын үгэнүүд байхагүй, залуушуулай ёһотой һайндэр болохо ёһотой гээд тэмдэглэгдэбэ. Аквагрим, тир, дартс, караоке, селфиин урилдаан, квест, воркаут, батл, флешмоб, бэнтэн, лоторей болон бусад хэмжээ ябуулганууд шэмээшэгүүдэй ёохороор түгэсэхэ юм. Бүри дэлгэрэнгы мэдээ удаадахи дугаартаа тунхаглахабди.
НЮТАГТАА МЭРГЭЖЭЛТЭДЫЕ БЭЛДЭҺЭЭР
Мүнөө Буряадай Ойн ажахын колледжын филиал болонхой Мухар-Шэбэрэй ПТУ 24 жэлэй саана нээгдэһэн. Хүдөөдэ эрилтэ ехэтэй залуу халаанда мэргэжэл олгуулдаг һуралсалай энэ эмхиин захирал болохо Зоригто Цыбикжаповтай хөөрэлдэбэбди.
-
Зоригто Цыбикжапов
Зоригто Даржаевич, ажал хэрэгтнай хэр бэ?
- Бараг. Жэл бүри һурагшадаймнай тоо нэмэгдэжэл байдаг. 180-200 үхибүүн үргэлжэ һурана.
- Ямар мэргэжэл шудална бэ?
- Хододоо эрилтэтэй мэргэжэлнүүд лэ даа. Тогоошон, наймаашан, жолоошон, автомеханик… Юрын ажабайдалда хэды ехэ хэрэгтэй мэргэжэлнүүд бэ? Тиимэһээ манай һурагшад ажалгүй һуудаггүй. Саашаа һураха дуратайшуул, дээдэ һургуулинууд руу ядамаггүйгөөр ородог, юундэб гэхэдэ, мэргэжэлээ мэдэхэтэй - дипломтой байна ха юм.
- Танай һургуули түгэсхэгшэд хаагуур хүдэлнэ бэ?
- “Искра”, “Түгнэ” болон бусад ажахынуудта, Түгнын шулуун нүүрһэнэй уурхайда...
- Хэды жэл һуража гаранаб?
- Олонхинь 9-дэхиин һүүлдэ ерэнэ. 4 жэл үзэдэг. Хамтын байратай, халуун хоолтой, стипендитэй һурана. Хүдөөдэ манай филиал ехэ хэрэгтэй. Зарим гэртэхин үхибүүдээ город эльгээхэ арга боломжогүй ха юм. Нютагтаа һурахадань дээрэ ааб даа. Хажуудахи Бэсүүр аймагһаа, Үбэр Байгалай хизаарай зарим һууринуудһаа ерэжэ һурадаг лэ даа.
- Багшанартнай хэды бэ?
- 27 хүн хүндэлнэбди, 11-ниинь багшанар болоно. Һуралсалайнгаа программа шэнэлхэ гэжэ оролдонобди. Гадна заадаг хэрэгсэлнүүднайшье шэнэлэгдэхээр болонхой. Тиимэһээ энэ талаар ажал ябуулагдана.
- Ажал хэжэ һурганат...
- Тиигэнэбди. 100 гектар талмай дээрэ шэниисэ таридаг аад лэ, энэ жэл шадал хүсэмнай хүрөөгүй. Гэбэшье 5 гектар поли дээрэ бүүльбээ (хартаабха) һуулгаабди. Огород таринабди. Ургуулһанаа үхибүүднай өөһэдөөл эдинэ. Бүри ехые һуулгаха аад, хадагалха газаргүйбди.
- Теэд янза бүриин категоритой жолоошодые түлбэритөөр бэлдэнэт.
- Тиинэ. Жэлэй туршада 2,5 сая түхэригэй һурасал хээбди. Бульдозерист, экскаваторщик болон бусадые һурганабди. Арайл техникэмнай хуушаржа байна. Шэнэ үеын техникэ хэрэгтэй болоо.
- Бэеын тамирта баһал онсо анхарал хандуулагдана аабза.
- Гирь үргэлгэ, конькигаар һолжорхые дэмжэнэбди. Шэнэ шэглэл – шорт-трек хүгжөөхэ хүсэлтэйбди.
- Тогоошодые бэлдэнэт... Эдеэ хоол буйлуулха шадабаритай болгонот.
- Үнгэрһэн жэлдэ 500 мянганай оньһон түхеэрэлгэнүүдые абаабди. Тогоошодые бэлдэхэдэ, баһал бэлэн бэшэ. Оньһон хэрэгсэлнүүд хэрэгтэй болоно.
Һуралсалай энэ гуламтые Илья Степанович Миронов байгуулан, 14 жэлэй туршада амжалта түгэс хүтэлбэрилһэн. Арбан жэлэй саана Зоригто Даржаевич даан абажа, улам хүгжөөһөөр. Байгша оной январиин 1-дэ ПТУ Ойн ажахын мэргэжэлтэдые бэлдэдэг колледжын бүридэлдэ ороод, үшөө ойн ажахын шэглэлээр мэргэжэлтэдые бэлдэжэ эхилхэнь. Амжалта хүсэе!
Авторай гэрэл зурагууд