Сэлгеэ һайхан түрэл нютаг Үлэгшэндөө һургуулияа дүүргэһөөр 45 жэлэйнгээ ойн баярые 60 наһаяа дабаһан шабинар үргэнөөр угтаба. Мүнөө сагта олон аша зээнэрэй таабай төөбии болоһон, олон жэлдэ нютагтаа хамтын ажахыда, эмхи зургаануудта амжалтатай хүдэлһэн: Дарма Очиров, Сергей Очиров, Виктор Дондоков, Виктор Цыбенов, Леонид Банзаракцаев, Нима Цыденов, Дамба Ульзетуев, Валентина Дондокова, Цырен Бадмаева гэгшэд түрэл һургуулидаа сугларба.
Һургуулиин һуралсалай талаар орлогшо захирал Бальжидма Баяновна Дамдинова халуунаар угтажа, түүхын, хизаар ороноо шэнжэлгын музей харуулжа, һургуулиингаа һүүлшын һонинууд, амжалтанууд тухай дэлгэрэнгыгээр хөөрэжэ үгөө.
Эдэ үетэн нүхэд миин найрлахаяа суглараа бэшэ, харин нютагайнгаа арад зондо арадай наадануудые эмхидхэжэ харуулаа. Жараяа дабахадаа, одоол жаргалаймнай заха үзэгдэбэ, залуушуулдаа жэшээ боложо, дэрэеэ дэрлэшэнгүй, урагшаа һанаатайгаар, эбтэй эетэйгээр ажаһууя гэжэ нютагайнгаа зониие хүгшэн залуугүй уряалба.
Иигэжэ Үлэгшэн нютагта түрүүшынхиеэ “Арадай нааданай эрхим” гэжэ мүрысөө эмхидхэжэ харуулбад. Энэ мүрысөөндэ нэгэ хүн тамирай 3 зүйлөөр хабаадаа: һур харбаан, шагай наадан, мори урилдаан, даам наадан. Эдэ нааданууд юундэ шэлэгдээб гэхэдэ, ямаршье наһанай хүн эдэ зүйлнүүдтэ хабаадаха аргатай.
Үдэрэй ааяма халуунда һургуулиин тамирай талмай дээрэ Улаан-Үдэһөө бууһан болон нютагай ажалайнга амаралтада гараһан арбаад тамиршад арга шадалаа харуулаа. Шагай наадан, мори урилдаан, даам наадан ехэ һонирхолтойгоор, шог зугаатайгаар, хүхюу энеэдэтэйгээр үнгэржэ, һур харбаанай мэргэниие элирһэнэй һүүлдэ Россиин габьяата хүмүүжүүлэгшэ, ахамад шүүгшэ Шагдуржап Хазагаев дүнгүүдые соносхобо:
Мори урилдаан – I һуури – Тунжинов Дугар, II – Дамдинова Бальжидма, III – Амуров Шагдар; даам наадан – I һуури – Амуров Шагдар, II – Ульзетуев Дамба, III – Тунжинов Дугар; Һур харбаан – I һуури – Ульзетуев Дамба, II – Хазагаев Шагдуржап, III – Дамдинова Бальжидма. Тамирай зүйл бүхэнөөр илагшадта грамота, медаль, мүнгэн шан баригдаа.
Эсэсэй дүнгүүд тоологдожо, “Арадай нааданай “Эрхим абаргада” шангай һууринууд олгогдобо: I – Ульзетуев Д., II – Амуров Ш., III – Тулжинов Д. Тамиршадта диплом, медаль, кубок, мүнгэн шангуудые үгөө, бэшэ хабаадагшадта гарай бэшэгүүд баригдаа.
Нурта нютагһаа уг гарбалтай Арадай дархан Валерий Цыбиков шагай наадалгаар мастер-класс үхибүүдтэ харуулаа, һүүлдэнь шагайнуудаа һургуулида бэлэг болгон барюулаа.
Тэдэ 45 жэлэй ойе тэмдэглэжэ, “Арадай нааданай эрхим” мүрысөө үнгэргэхэдэ, аша туһа хүргэжэ, сэгнэшэгүй хубияа оруулһан хани нүхэдөө тэмдэглэнэд: Арадай дархан алдартай В.Д. Цыбиков, А.А Цыденов; В.М. Бадмаев, Б.В. Гомбоев, Ц.Д. Дансарунов, һургуулиин, соёлой байшангай ажалшад болон нютагай зон туһа хүргэгшэд болоно.
Ниигүүлэсхы сэдьхэлтэй эдэ зондо үнэн зүрхэнэй баяр баясхаланиие хүргөөд, арадай уран зурааша, ирагуу найрагша Цыбикжаб Найдановай шүлэгэй мүрнүүдые зорюулая:
Хурса нюдэтэй, хурдан ухаатай,
Һонор шэхэтэй,
һонин зугаатай,
Хүл хүнгэн, хүдэр солбон,
Гар уран, ганзага баян,
Бии бэлигтэй, бэе элүүр,
Дүрбэн тэгшэ, дүүрэн хэшэгтэй
Ажаһуухатнай болтогой!
Мүнөө сагта элдэбын ойнуудые, баярай ушарнуудые олоор тэмдэглэдэг болонхой. Тиимэһээ ганса сайлалга үнгэргэнгүй, зондоо туһатай хэрэг үйлэдэел гэжэ уряалая!
Д. Ульзетуевай гэрэл зурагууд