​Арадай дуунуудта абьяастай

Эрхүү можын Оһын аймагай Онгой һууринай ажаһуугша Наталья Тангасова анха түрүүшынхиеэ “Алтаргана” нааданда хабаадаһан байна. Тэрэ уран һайханаар арадай дуунуудые хангюурдаа.

Жаран табатай Наталья Апполоновна наһанайнгаа ама­ралтада гараад лэ, арадай дуунуудые дууладаг болоо. Урид тэрэ нютагайнгаа түлөө ёохорой дүхэригтэ оролсодог бай­гаа бшуу.

- 2017 ондо ямар бэ даа нэгэ найрта арадай дуу дуула­ха хүн олдоогүй. Тиихэдэнь намай дуулаад туршыш гэжэ ду­радхаа. Тэрэ гэһээр, ехэ тайзан дээрэ гаража эхилээб, - гэжэ Наталья Апполоновна хөөрэнэ.

Мүнөө жэл аймагайнгаа, тойрогой болон можын найр на­адануудта Наталья Тангасова ехэ эдэбхитэйгээр хабаадажа, “Алтарганада” оролсохо эрхэдэ хүртөө.

- Минии түрэлэй болохо Агафья Романовна буряад арадай дуунуудые заагаа. Дууладаг дуунуудыень бэшэжэ аба­ад сээжэлдээб. Мүнөө Агафья Романовна 95 наһа хүрэбэшье, маанадтаа бүхы мэдэхэ ёһо гуримуудаа дамжуулһаар зандаа, - гэжэ Наталья Апполоновна хөөрөөгөө үргэлжэлүүлнэ.

Удаадахи “Алтаргана” нааданда заабол хабаадахаб гэжэ хэлэһэн Наталья Тангасова үшөө һайхан дуунуудые бэлдэжэ, хүн зониие баярлуулхал байха. 

Авторай гэрэл зураг