636
Июлиин 25-да Буряад Уласта Ородой Холбоото Уласай болон Монгол гүрэнэй авиациин бэдэрэлгэ-абаралгын албануудай уласхоорондын һуралсалда зуунһаа дээшэ мэргэжэлтэд хабаадаа. Энэ хэмжээ ябуулга 5-дахияа үнгэргэгдэнэ.
Һуралсалай ёһоор, замбуулинда ниидэхэ онгосодо аюул ушаржа, космонавтнууд Улаан-Үдэ шадар бууһан байна. Тэдэниие бэдэрхэеэ абаралгын-десантна бүлэгүүдтэй хоёр вертолёт гараа. Абарагшад, удаань Ородой Холбоото Уласай эмшэдэй-биологическа федеральна агентствын эмшэд парашюдаар газарта буунжа, десантнигууд космонавтнуудые аргаахан онгосоһоонь гаргажа, майхан хүрэтэр тэлүүрээр (носилки) абаашана. Тэндэ эмшэд тэдэнэй бэеын тамир шалгана. Монголой космонавтда эмнэлгын туһа хүргэжэ, тэрэниие реанимобильдо һуулгажа, эмнэлгын газар хүргэнэ. Абарагшад Дмитрий Безродный болон Цэрэн-Очир гэгшэд космонавтнуудай уялга дүүргэбэ.
Ородой Холбоото Уласай авиациин хүтэлбэрилэгшын орлогшо Александр Ведерников Улаан-Үдэ ерэжэ, һуралсал хүтэлбэрилбэ. Тэрэ Буряад Уласай Засагай газарта һуралсал үнгэргэлгэдэ туһа хүргэһэндэнь баяраа мэдүүлээ.
- Бэдэрэлгэ-абаралгын албануудта үдэр бүри хүнүүдые абардаг. Ородой Холбоото Уласта ганса 2017 ондо абаралгын 27 операци эмхидхэгдэжэ, 76 хүнүүдые абарһан байнабди, - гэжэ Александр Ведерников тэмдэглэбэ.
Буряад Уласай Засагай газарай Түрүүлэгшын орлогшо Евгений Луковниковой хэлэһээр, хари гүрэнүүдэй хоорондо суг ажал ябуулгада энэ һуралсал ехэ удха шанартай.
Уласхоорондын хэмжээ ябуулгада мэдээжэ космонавтнууд, СССР-эй хоёр удаа Герой Владимир Джанибеков болон Ородой Холбоото Уласай Герой Олег Котов хүндэтэ айлшад болоһон байна.
- Замбуулинай онгосодо онсо байдал ушаржа, бэдэрэлгэ-абаралгын албанууд туһа хүргэжэ шадаха гэжэ һуралсалай үедэ ажал ябуулагдана. Ямаршье ушарта онсо байдал ушаржа болохо. Энэ хэмжээ ябуулгада бүхы албануудай мэргэжэлтэдэй хабаадаһаниинь һайшаалтай, - гэжэ Олег Котов хэлэбэ.
Бэдэрэлгэ-абаралгын албануудай һуралсалай удаа хабаадагшадта дипломууд болон баярай бэшэгүүд барюулагдаа.
Буряад Уласай Засагай газарай хэблэлэй албанай гэрэл зураг
