​Ородой чемпионадай орьёлдо хүрэбэ

Калининград хотодо һур харбалгаар Ородой чемпионат июлиин 25-28 үдэрнүүдтэ боложо түгэсэбэ. Энэ мүрысөөндэ Буряадай тамиршад гурбан алтан медаль абажа шадаа.

Энэ мүрысөөндэ Ородой 30 можо хизаарнуудай 270 га­ран тамиршад хабаадаа. Илалта туйлаһан болон шангай һуури эзэлһэн тамиршад августын һүүл багаар Польшо­до үнгэргэгдэхэ Европын чемпионадта хабаадаха эрхэдэ хүртөө.

Эхэнэрнүүдэй дунда чемпионой нэрэ зэргэдэ Анна Балсукова хүртөө. Тэрэ финалда Үбэр Байгалай хизаарай түлөөлэгшэ Татьяна Плотниковае илажа гараа. Гурбадахи һуури мэдээжэ Инна Степанова эзэлээ.

Бусад алтан медальнуудые Буряадай тамиршад команд­на тоосоондо шүүгээ. Эрэшүүлэй командын бүридэлдэ Бальжинима Цыремпилов, Эрдэм Цыдыпов болон Баир Цыбекдоржиев гэгшэд оруулагдаа. Мүн эхэнэрнүүдэй түлөө Виктория Харитонова, Анна Балсукова болон Вик­тория Будаева гэгшэд харбаа.

Үшөө тиихэдэ Инна Степанова Московско можын, Ал­дар Цыбикжапов Москвагай командануудтай хамта хүрэл медальнуудые абаа.

Блочно һур номшоор харбалгада Буряадай түлөөлэгшэд хоёр медальда хүртөө. Тиихэдэ буряад һур номшоор хар­балгын талаар гүрэнэй һоригшо Дмитрий Галсанов анха түрүүшынхиеэ мүнгэн медаль абаба. Командна тоосоон­до Буряадай тамиршад гурбадахи һуурида гараа. Үнөөхил Дмитрий Галсанов, 17 наһатай Сергей Шенхоров, “Наадан-Сурхарбаан-2018” гэһэн уласай һайндэрэй абарга Олег Цы­бикжапов гэгшэд Буряадай командын түлөө харбаа гээд хэлэлтэй.

Буряадай Һур харбалгын Федерациин гэрэл зураг