Нэгэн гээ һаа, нэтэршэдэг, алтан дундыень яашье барижа шададаггүй орон нютагта түрэхэ табилантай байһандаа баярлахаар, али бархирхаар гү? Үндэһөөрнь үгы хэжэ, хүнэй зосоохиие гэнтэ урбуулан хубилгажа яашье боломоор бэшэ гүб даа. Гэбэшье сагаантан байһанаа, улаантан боложо, мүнөө болоходо, урданайнгаа заншал һэргээн, хүнэй һүзэг бишэрэл, һүлдые үргэһэн дасан дугануудаа дахинаа бодхоон байнабди. Хэды орёо байбашье, Бандида хамба лама Дамба Аюшеев хатуугайнгаа ашаар олониие хүдэлгэн, хэды ехэ ажал ябуулнаб даа...
Июлиин 27-до үдын хойно Загарайда оршодог Шулуутайн дасан руу зүг барин, хоёр сэтгүүлшэд хурдан “хүлэгөө унаад” табилуулбабди. Первомаевкаһаа холо бэшэхэнэ оршодог Шулуутай гэжэ һуурин хүрэхэтэй сасуу, шэб-шэнэхэн дасан добо дээрэһээ яларан толорон, бидэниие урижа байһандал үзэгдэбэ. Дасанай дэргэһээ үзэсхэлэнтэ һайхан байгаали харагдана: үргэлжэ нэмжыһэн тала, шугынууд, тээ саанахана хада гүбээнүүд...
Иимэ һайхан газарта оршодог дасан өөрын онсо түүхэтэй гэжэ мүнөөдэрэйнь шэрээтэ Чингис ламын хэлээшээр, гансата ойлгохоор байба. Теэд тиимэ байхын аргагүйл. 1888 ондо бодхоогдоһон Согшон дуган һалан һандаргагдабашье, шулуугаар баригдаһан тула нэгэдэхи дабхарынь үлэнхэй байгаа. 2013 онһоо хойшо шэнээр баригдажа эхилээд, байгша оной сентябриин 12-то Шулуутайн дасан үүдээ сэлин, уладаа угтахань гээшэ. Эгээл тиимэһээ бэлдэхэл ябуулагдаһаар...
Тиихэ үеэр жэгтэй һонин үйлэ ушарнууд болоно.
Июлиин хуушаар ехэ дархан Бата Дампилон Согшон дуганай хойто талаһаа түмэр олоо. Тиигээд энэм юун гээшэб гэжэ тухайлжа эхилээ. Боди гүрөөһэнэй шэхэн гэжэ ойлгоо... Өөрынгөө хэһэн боди гүрөөһэндэ тааруулаад үзөө. Таарашоо - тэрэл шэгтэй байжа байгаа. Июлиин 21-дэ дид-хамба лама Дагба Очиров манай барилга харахаяа ерэһэн. Тиихэдэнь Бата ахай тэрэ олоһон шэхэеэ харуулаа. Дагба ламын шэхэниинь үбдэжэ ябаһан тула шэхэндээ няагаад үзэхэдэнь, тэрэнь үбдэхөө болишоо.
Энэ хадаа жэгтэй, гайхалтай үзэгдэл мүн. Гэбэшье Чингис ламын тайлбарилһаар, Шулуутайн дасанһаа 3 хамба ламанар гараһан: Чойдор Мархаев, Чойнзон-Доржо Иролтуев, Гүрэ-Дарма Цыремпилов. Илангаяа Юрөөлтын хамба лама мэдээжэ эмшэ лама байһан. 1899 ондо Николай хаан манай дасан ерэһэн. Юрөөлтын хамбатай зорюута танилсаһан. Эндэһээ тэрэниие абаад ябашаһан. 2 жэл соо Россиин түб газарта байгаа. Николай хаанай хатаниииень эмшэлээд абаржа шадаһан. Уушхыень һэлгэжэрхиһэн түүхэтэй. Тэндэһээ ерээд, дасанай шэрээтэ болоһон. Харин 1895 ондо хамба лама болоһон. Ехэ арга хэдэг байһан. Боди гүрөөһэнэй шэхэн – Юрөөлтын хамбын адис гэжэ һанахаар байна.
Хуу юумэн ушартай, удхатай... Иимэ һонин үзэгдэлтэй танилсажа, адиста хүртэжэ, шэнэ барилга һайшаан, гэртээ бусаа бэлэйбди.
Авторай гэрэл зураг