Һасаранай Булат
Булат Лхасарановай альбомһоо гэрэл зураг
Аяар холын Италида байгша оной апрелиин 27-до “LaRepubblica” гэһэн сониндо үндэһэн буряад үхэр тухай Карло Петрини гэгшын статья гараһан байна. Энэ хүн манай гүрэндэ бүхыдөө хүдөө ажахын үндэһэн мал һэргээхэ талаар ямар эрдэм-шэнжэлгын ажал хэгдэжэ байнаб гэжэ тодорхойгоор бэшэхэһээ гадна, удха шанарыень тайлбарилаа.
Үшөө 1917 оной хубисхалай урда тээ дэлхэйдэ мэдээжэ академик Николай Иванович Вавилов үндэһэн мал шэнжэлдэг ажал ябуулдаг байһан гэжэ һануулая. Эрдэмтэнэй нэрэ зүүһэн Юрэнхы генетикын дээдэ һургуули энэ аша туһатай хэрэгыень үргэлжэлүүлһээр.
Булат Лхасарановай альбомһоо гэрэл зураг
Гадна Англида дэлхэйн тон хүндэтэй эрдэмэй сэтгүүлнүүдэй нэгэн болохо “Heredity” гэһэн сэтгүүл соо үндэһэн буряад үхэр тухай статья баһа толилогдоо һэн. Иихэдээ буряад эрдэмтэн Булад Лхасарановай оролдолго үүсхэл тухай суу Буряад оронойнгоо түхэреэнһээ ходоро гаража, алас холын газарнууд хүрэтэр тарабал даа.
Мүнөө Карло Петриниин оршуулагдаһан статья хуряангыгаар буряадшалжа, уншагшадайнгаа анхаралда дурадханабди.
Юрий Столповскиин ковчег
Үнэн дээрээ Ород гүрэн хизааргүй баян юм: дэбисхэр дээрэнь үндэһэн гэрэй амитадай 200 гаран үүлтэр тоологдодог. Гэбэшье олон үнэтэ үүлтэрнүүд үгы болохо тооной шахуу. Жэшээлхэдэ, суута романовска үүлтэрэй хонид 1850 ондо хоёр сая толгой тоотой байһан һаа, ХХ зуун жэлэй 90-ээд онуудаар гансал Ярославска можодо хэдыхэн лэ ажахынуудта үлэнхэй һэн. Һонин юумэниинь гэхэдэ, энэ үүлтэрэй хонидые мүнөө бүхы Европоор үсхэбэрилнэ.
Биологиин эрдэмэй доктор, Н.И.Вавиловай нэрэмжэтэ Юрэнхы генетикын дээдэ һургуулиин лабораториин хүтэлбэрилэгшэ Юрий Столповский – үндэһэн үүлтэрэй амитадые хюдуулхагүйн түлөө бүхыгөөрөө оролдодог үсөөхэн хүнүүдэй нэгэн. Тэрэ үндэһэн үүлтэрэй амитадые үсхэбэрилдэг фермернүүдтэ али болохоор туһалдаг юм. Үшөө залуу байхадаа, украин боро үүлтэрэй үхэр абаралсаһан габьяатай. Мүнөө тэрэнь тульска үүлтэрэй галуунтай, романовска хонинтой, яхад, ярославска, тагильска үүлтэрнүүдэй үхэрнүүдтэй, орловско тахяатай хамта Слоу-Фудай Амтанай Ковчегтэ* оруулагданхай.
Хэр угһаа хойшо элинсэг хулинсагуудайнгаа хаража байһан амитадые ганса хамгаалха бэшэ, харин шанар һайтай, элдэб муу-һайн холисогүй, “сэбэр” эдеэ хоолоор өөһэдыгөө гүйсэд хангахын тула тэдэниие үсхэбэрилэн олошоруулха, дэлгэрүүлхэ шухала гэжэ Юрий Столповский тоолодог юм. Тиин иимэл һаналтай хүнүүдтэй хүсэ шадалаа элсүүлэн хүдэлжэ, хэдэн зуугаад фермерскэ ажахынуудай болон үйлэдбэринүүдэй ажал залан хүтэлбэрилнэ. Мүнөө Ород гүрэнэй олонхи можо нютагуудта хэрэгыень дэмжэдэг болонхой.
“Янза бүриин амитад хадаа дундаршагүй баялиг гээшэ гэжэ ехэ компанинуудайшье түлөөлэгшэдтэ ойлгуулха хэрэгтэй, - гэжэ эрдэмтэн хэлэнэ. - Жэшээнь, Буряад орондо голштино- фризскэ болон бусад хариин үүлтэрнүүдэй үхэрнүүдтэ орходоо, үндэһэн буряад үхэр үсхэбэрилхэдэ, алишье талаар аша үрэтэй. Тэрэниие тэжээлээр хангаха хэрэггүй: үбэлдөөшье саһан дороһоо эдихэ хоолоо олодог хадаа, түхэреэн жэл соо өөрөө хоолойгоо тэжээдэг. Мүн тиихэдэ тусхай байрашье хэрэггүй: 60 градус хүйтэниие дабажа гарадаг юм".
Байдал заһаруулхань бэлэн бэшэ. Зүблэлтэ үедэ үндэһэн үүлтэрнүүд тоогдохоёо болиһон гэжэ мэдээжэ. Хэрбээ Ород гүрэндэ 1930-аад онуудта ехэнхидээ үндэһэн үүлтэрэй амитад үсхэбэрилэгдэдэг һаа, 1980 ондо аяар 80 хубинь хариин үүлтэрнүүдэй байгаа.
Гэбэшье Юрий Столповскиин һанамжаар, бүгэдөөрөө нэгэдэн оролдобол, зориһондоо хүрэхөөр. Тэрэ гүрэнэйнгөө үндэһэн үүлтэрнүүдэй гэрэй амитадай уг гарбалай нөөсэ байгуулха һаналтай.
Булад Бастуевич Лхасаранов нилээд удаан нэтэрһэнэйхиие одоол ехэ гэгшын хадые байраһаань хүдэлгэжэрхибэл даа. Уһаншье аалихан шолшогоноһоор, шулуу мүлижэрхидэг гэдэгтэл, буряад үхэр һэргээхэ гэһэн һаналаа бөөмэйлэн, түрүүшэгээр ори гансаараа шахуу оролдожо, ябажал, хэлэжэл, һануулжал, гуйха сагтань гуйжа байгаад, буряад арадайнгаа аша туһада ехэхэн хэрэг бүтээжэ байна.
Һая уулзахадамнай, Булад Бастуевич: “Гүрэнһөө дэмжэдэг болоо”, - гэжэ урматайхан ябаа һэн. Болоол даа. Хэрэгынь урагшатай байгуужан.
*Слоу-Фуд – медленная еда – яаралгүй хоол, удхань – нютагай шанар һайтай зүйлнүүдээр бэлдэгдэһэн эдеэн;
Ковчег Вкуса – Амтанай Ковчег – үндэһэн арадуудай үгы боложо байһан хоморой эдеэ хоол хамгаалгада шэглүүлэгдэһэн түсэл.