Ислам Фатыковта медаль зүүлгэгдэнэ
94 наhатай Фатыков Ислам Файзутдинович Эсэгын дайнай дүүрэhээр, 73 жэлэй үнгэржэ байгаашье hаань, «Эсэгын дайнай хабаадагша» гэhэн үнэмшэлгэтэй болохын түлөө оролдожо, олохон саарhа гуурhануудые бүтээжэ, бэе бэедээ мэдэлтэй гүрэнэй элдэб шатануудаар нилээд ябаа. Он жэлнүүд үнгэржэ, 1942 ондо оройдоол хахад жэлдэ сэрэгэй албанда ябаhыень зүбшөөхэ зонууд булта наhа барашоо шахуу.
Сталин багша тухай муу үгэ алдаhан
Ислам Файзутдинович 76 жэлэй саана түрэһэн тоонто нютагаа болон түрэл түтимүүдээ орхижо, аяар холын Байгал шадартахи Буряад-Монгол сүлэгдэһэн гэхэ гү, али зөөлгэгдэһэн байха юм. Үндэр наһатын хөөрэһэнэй ёһоор, энэ сүлэлгэнэй шалтагааниинь гэхэдэ, Эсэгын дайнай урда тээ нютаг дээрээ ажаһууһан, Граждан дайнда эдэбхитэйгээр хабаадаһан Мавлетдинов гэжэ ветеран иигэжэ хэлэһэн гэдэг: «Сталин багшамнай немецүүдтэ бүхы талха орооһоёо, эдеэ хоолоо үгэжэ, мэхэлүүлжэ байна даа». Эдэ үгэнүүдые хэлэһэнэйнь түлөө бүхы татаарнуудые арадай дайсад болгожо, иишэ тиишэнь зөөлгүүлһэн байдаг. СССР гүрэнэй элдэб нютагууд руу энэ тэрэ ажал хүдэлмэринүүдые хэхэ ажалша бүхэриг зон хэрэгтэй гээд, олон тоото арадуудые ябуулжа эхилһэн.
Тиигэжэ 1941 оной майн 9-дэ Буряад-Монгол нютаг руу зөөлгэгдэһэн татаарнуудһаа бүридэһэн 10-аад гаран айлнууд Хэжэнгэ нютаг хүрэжэ ерэбэ. Энэ үеэр холын замда хүйтэ нойто абаһан Исламай түрэһэн эхэ Шейхисламова Геленбике хүндөөр үбшэлжэ, Хэжэнгын больницада наһа бараба. Тиихэдэ больницамнай хуушан һууридаа багахан гэр соо түбхинэһэн байгаа.
Алишье хэлэ hайн мэдэхэгүй байгаа
Татаар нүүгшэдые (переселенцүүдые) Тураасгайда угтан абажа, элдэб тээһээ шэрэжэ асарагдаһан хуушан гэрнүүдтэ оруулба. Тиихэдэ нэгэшье шэнэ гэрнүүд бодхоогдоогүй байгаа. Тэрэ үеэр колхозой түрүүлэгшээр Базаржапов Дашасэрэн хүдэлөө һэн. Удангүй Эсэгын дайн эхилжэ, нилээд шанга саг тохёолдобо. Үглөөнһөө үдэшэ орой болотор, буряад , ородшье хэлэ мэдэхэгүй татаар яһатан элдэб шанга хүдэлмэринүүдтэ нэгэн шэнгеэр бултантай хамта ажаллажа эхилһэн.
Өөрын улаан гараар болон морёор колхозой бүхы ажал хүдэлмэринүүд хэгдэдэг байһан. Морёор газар хахалаа, борнойлоо, үбһэ сабшаа. Боолто боогоод, бухал болгохо. Сэбэр талада гаража, овин галдаад, тэндээ орооһоо молотилкаар сохёод сэбэрлэхэ. Сэбэрлэһэн бүхы орооһоёо сар болон морёор Хори нютаг абаашажа тушаадаг байһан. Хоёр бригада боложо, 20-30-аад улаа гэхэ гү, али тэргэнүүдые абаашаха.
- Түрүүшээр хэлэ мэдэхэгүй, нилээд зобообди. Нэгэтэ намтай иимэ нэгэ ушар тохёолдоо һэн. Эсэһэн тулиһанаа болон элдэб шалтагаануудай болоошье һаань, тэрэнээ хэлэжэ, дуулгажа шадахагүйш. Нэгэтэ ехээр хүдэлжэ тулиһандаа, би эсээд, һүниин халаанда талха сохижо байтараа, барабан руугаа талханай хэдэн боолто хаябаб. Машинынгаа ехээр хахашахадань, ойлгожо ядаад, ошожо һолоомон доро унташаһан байгааб. Барабанай абяа шэмээгүй болоходонь, зон тухайлаад, булта ерэжэ намайе бэдэрбэ. Гэр байрануудаар, хорёо хото соогуур, харгы шанаагаар нилээд бэдэрээ. Зон ехэ айһан байгаа, - гэжэ үндэр наһатай ветеран, «Хүндэлэлэй тэмдэг» орденой кавалер И.Ф. Фатыков хөөрэбэ.
Хахад жэлэй туршада зүүн хилэ сахилсаа
1942 ондо, Эсэгын дайнай түлэг дунда Ислам Файзутдиновичые сэрэгэй албанда татаба. Түрэхэ гарахаһаа үлбэр бэетэй байһан Исламда повесткэ ерэжэ, Тураасгайн Ваанхитанай Бата-Мүнхэтэй жолоошоной hургуули дүүргээд, хоёр тээшээ тараһан. Удангүй тэрэ Бата-Мүнхэнь 1943 ондо дайнда наһа бараа, харин Ислам Файзутдинович (Ислам гэжэ лалын шажанай бурханай нэрэтэй байһандаа юм гү) зүүн тээшэ, Хада-Булаг руу эльгээгдэжэ, хилэ сахилсаа. Хада-Булагта караулда ябаха. 6 һарын туршада тэндэ байхадань, газар дороһоо самолёдууд гаража, саг зуура ниидэһэн болоод, һөөргөө тиишээ орошохо. Ислам хүбүүхэн тэндэ алба гараха үедөө шэнэ нютагайнгаа буряад хүбүүдээр танилсан, мүн Тураасгайһаа ошоһон Сампилов Дамдинжаб Доржиевичтай суг ябаа.
Наһаараа трактор жолоодоо
Хахад жэлэй туршада алба гаража байтараа, ехээр үбдөөд, албанһаа табигдаба. Тураасгайгаа бусажа ерэһээр, Алтайда бүтээгдэһэн, керосинаар ябадаг үнөөхил мөөрэтэ трактораараа колхозойнгоо хүдэлмэри хэжэ эхилээ. Дайнай һүүлһээ , Илалтын удаа наһанайнгаа амаралтада гаратараа, 40 жэлэй туршада Ислам Файзутдинович Фатыков барюулаар эрьюулжэ дуугардаг тракторһаа эхилэн, дизельнэ МТЗ-5, Т-25 гэһэн түхэлэй тракторнуудаар һая болотор, Хори руу орооһо зөөдэг байһан, тиихэдэ манай эндэ үшөө орооhоной склад гэжэ үгы байгаа.
Удаань Могсохондо түбхинэжэ, 1925 ондо хүршэ Михайловкада сабшагдаһан, өөрынгөө наһантай сасуу гэр худалдажа абаад табиһан байдаг. Тиигэжэ 1948 ондо Татарстанһаа хамта зөөжэ ерэһэн Абдрахманова Хажиря Абдрахмановнатай гэр бүлэ болоһон. Хани нүхэрынь Астраханиин багшанарай училищи дүүргээд, мэргэжэлээрээ хүдэлөөгүй, бүхы наһан соогоо Тураасгайда ба Могсохондо ажаһуухадаа, нютагай зониие нэгэшье илган барингүйгөөр аргалжа гараа. Санитаркын болон медсестрагай хүнгэн бэшэ ажалые хэжэ гараһан, тиигээд харамтайнь гэхэдэ, оройдоол 72 наһа хүрэһэн.
1925 оной июль һарада Татарстанай Сабинска районой Саба нютагта Ислам Файзутдинович дунда шадалтай Файзутдин Геленбике Фатыковтанай гэр бүлэдэ гурбадахи үхибүүниинь боложо түрэһэн. 1923 ондо түрэһэн ахань Ахмад-Нур Файзутдинович Эсэгын дайнай эхилхэдэ, Татарстанһаа сэрэгэй албанда татагдаа һэн. Танкист болоод, дайлалдажа ябатараа шархатаад, Челябинск хотын госпитальдо аргалуулһанайнгаа удаа, Баруун фронтоёо бусажа, һураггүйгөөр үгы болошоо гэдэг. Харин Роза Файзутдиновна гэжэ эгэшэнь иишээ зөөлсэжэ ерэһэн аад, 1948 ондо уһанай модондо Загарайн Онохой шадар хүдэлжэ байтараа, уһанда шэнгэшоо. Тиин хайрата абань Фатыков Файзутдин 1-дэхи Дэлхэйн дайнай үедэ Австро-Венгридэ плендэ ябажа ерээд, удаань нютаг дээрээ Граждан дайнда эдэбхитэйгээр хабаадаһан, оройдоол 58 наһатайдаа Тураасгайда наһа бараһан юм.
Ислам Файзутдиновичай 94 наһанайнь 45-ниинь ниитэ ажалай стажда ороно, тиин 40 жэлынь элдэб түхэлэй тракторнуудые жолоодожо, нилээд ехэ хүдэлмэри хэжэ, саанань гараһыень харуулна. Үшөө залуу, хүнгэн ябахадаа, нэгэ үдэр соо гэхэ гү, али сүүдхын туршада 40-50 гектар газарта гансаарханаа үбһэ сабшажархидаг байгаа, харин Чимитдоржиев Нимбуутай хамта 120 гектар газарта үбһэ сабшадаг байгаабди гэжэ хөөрөө һэн.
– Би нэгэшье хара ажал хүдэлмэриһөө далтираагүйб, бултыень дүүргээд ябахые оролдооб. Трактор соогоо эдеэ хоолтой, амаа норгохо уһатай ябахаб, - гэжэ үндэр наһатан хөөрэнэ. Наһатай болоод байхадаа, залуу зондо туһа хүргэхэ туйлдаа хүрөөд ябахадаа, гаражые даагшаар хүдэлөө һэн.
Дахин һануулжа хэлэбэл, Ислам Файзутдинович Фатыков түрэл болоһон совхозойнгоо ба аймагайнгаа хүдөө ажахын һалбарида аша габьятайгаар ажаллаһанайнгаа түлөө, түсэбтэ даабаринуудаа үлүүсэ һайнаар дүүргэһэнэйнгээ түлөө гүрэн түрынгөө зүгһөө үндэр хайра болохо «Хүндэлэлэй Тэмдэг» орденоор шагнагдаһан байдаг.
Ислам Файзутдинович хани нүхэр Хажиря Абдрахмановнатаяа хамта 5 үхибүүдые түрэжэ, хүлыень дүрөөдэ, гарыень ганзагада хүргэлсэһэн байха юм. Ехэ Роза, Соня басагадынь хадамда гаража, Хэжэнгын почтодо ажаллаад, пенсидэ гаранхай, мүнөө өөһэдөө эжынэр болонхой. Рая басаганиинь Хэжэнгын түбэй больницада ахалагша медсестрагаар ажаллаhан, Мансур хүбүүниинь нютагтаа тракторта хүдэлөө, харин эгээн бага басаган Савьяа Улаан-Үдэдэ айл болонхой, хүүгэдэй сэсэрлигтэ ажалладаг юм.
Гэр бүлөөрөө Ислам Файзутдинович манай нютаг руу байжа, ёһо заншалаа хэды мартабашье, түрэл хэлэеэ мартаагүй байһаар. Хоёр-хоёр дахин Татарстан болон Казахстан айлшалжа ошоод, түрэл гаралнуудаараа уулзажа, мэдэлсэжэ ерэһэн байдаг.
«Казань – хонхогор тогоон»
Татарстанай ниислэл болохо Казань хото тухай һонин мэдээсэл мэдэхэ һэн хойноо, тэрэнээрээ И.Ф. Фатыков хубаалдалсахые оролдоо. «Казань – гээшэмнай хонхогор тогоон, хонхор тогоон» гэжэ тайлбарилба. «Урдандаа заха хизааргүй уужам талада булгарнууд гэһэн урда үеын арад өөрынгөө хото бодхоохо гэжэ зорибо. Тэндэнь булгарнуудтай нэгэ эди шэдитэн уулзажа, иигэжэ хэлээ гэдэг: «Гүнзэгы газарта тогоо булагты, ямаршье галгүйгөөр тогоон соотнай уһанай бусалаа һаань, ёһотой һайн хото болохо!» Элдэб олон газарнуудаар эрэшүүл тогоонуудые булаа, мүнөө үеын Казань хотын һуурида, Кабан гэжэ нуурай эрьедэ гансал нэгэ газарта уһаниинь өөрөө бусалһан түүхэтэй».
Эсэгын дайн соогуур хамта зүүн хилэ сахилсаhан нyхэдэйнь булта наhан болошоhон байгаашье hаань, бурхан хаража, үнэн зүб юумэниинь диилэхэ байха гэжэ зальбараябди.
Гэр бүлын альбомһоо гэрэл зураг абтаба
Бато-Цырен ДУГАРОВ