684
Буряад Уласай хүдөө ажахын болон эдеэ хоолой яаман Мухар-Шэбэр аймагай захиргаантай хамта «Полиин үдэр-2018» гэһэн хэмжээ ябуулга августын 10-да үнгэргэбэ. «Колхоз Искра» ажахыда 150-яад хабаадагшад уласай хэмжээ ябуулгада хабаадаһан байна.
«Полиин үдэрэй» хэмжээндэ гурбан талмай хүдэлөө. Тиихэдэ уһалууриин асуудалнуудаар талмай эмхидхэгдээ. Буряад Уласай хүдөө ажахын болон эдеэ хоолой сайдай орлогшо Сергей Брыковай хэлэһээр, жэлэй дүүрэтэр уһалагдадаг газарай талмай мянганһаа дээшэ гектараар дээшэлүүлэгдэхэ. Һүүлэй 6 жэлэй туршада федеральна болон уласай бюджетһээ талха, таряа, үбһэ ногоо уһалха хэмжээ ябуулгануудта 103 сая түхэриг һомологдоо. Тэрэнэй ашаар, 2 мянганһаа дээшэ гектар талмай уһалагдадаг болоһон байна.
Тиихэдэ суглаанда хабаадагшад полинуудта гаража, агротехникын дүримүүдээр үрмэдэһэ түүхэ арга хараба. Хүдөө ажахы эрхилэгшэдэй хэлэһээр, мүнөө жэл хура бороотой байжа, эдэ арганууд ехэ аша үрэтэйгөөр хэрэглэгдээ.
Хэмжээ ябуулгын түгэсхэлдэ үрэһэ һайжаруулха, сортнуудые туршаха талаар суглаан үнгэргэгдэһэн байна. Эрдэмтэд, хүдөө ажахынуудай хүтэлбэрилэгшэд, засаг зургаанай түлөөлэгшэд агропромышленнэ комплекс хүгжөөхэ тухай хэлсэбэ.
«Газар нютагуудай уларил хараалан, аймагуудта тааруу үрэһэтэй болхо хэрэгтэй онсо анхарал хандуулагдаха ёһотой. Ган, хура бороогүй жэлдэ талха таряан ургажал байха. Иимэ үрэһэтэй болохо талаар эрдэмтэд ажал ябуулна», - гэжэ Буряад Уласай Засагай газарай Түрүүлэгшын орлогшо – хүдөө ажахын болон эдеэ хоолой сайд Даба-Жалсан Чирипов хэлэбэ.
Буряад Уласта «Полиин үдэр» гэһэн хэмжээ ябуулга арбаад жэл шахуу үнгэргэгдөөгүй. 2019 онһоо хойшо хүдөө ажахын һалбариин хэмжээ ябуулга жэл бүри үнгэргэгдэхэ. Хойто жэлдэ Буряад Уласай Тарбагатай аймагта «Полиин үдэр» эмхидхэгдэхэ.
Буряад Уласай Хүдөө ажахын болон эдеэ хоолой яаманай хэблэлэй албанай гэрэл зураг
