1118
Буряад Уласай транспортын, элшэ хүсэнэй болон харгын ажахы хүгжөөлгын сайд Сергей Козлов өөрынгөө дураар тушаалһаа бууха тухай мэдүүлгэ бэшэжэ, 2018 оной августын 16-һаа тушаалаа сүлөөлхэ юм. Энээн тухай захиралта Буряад Уласай Толгойлогшо Алексей Цыденов абаба. Тиихэдэ уласай хүтэлбэрилэгшэ Сергей Козловто суг хамта аша үрэтэйгөөр хүдэлһэнэй түлөө баяраа мэдүүлбэ.
- Буряад Уласай ниигэмэй-эдэй засагай хүгжэлтэдэ горитой хубитаяа оруулһанайнь, үнэн сэхэ ажалайнь түлөө Сергей Юрьевичтэ баяраа мэдүүлнэб. Уласай ажаһуугшадай болон суг хүдэлдэг нүхэдэйнгөө дунда хүндэтэйт. Транспортын яаманай харгын, элшэ хүсэнэй, авиациин, гар утаһанай, интернет холбоогой һалбаринууд хүгжэжэ, улас дотор ажабайдал дээшэлүүлэгдэнэ, - гэжэ уласай хүтэлбэрилэгшэ тэмдэглэбэ.
Августын 16-һаа Транспортын сайдай орлогшо Сергей Белоколодов сайдай уялга дүүргэхэ, гараха долоон хоногһоо энэ тушаалда сайдай нэгэдэхи орлогшо Алексей Назимов томилогдохо.
Буряад Уласай Транспортын, элшэ хүсэнэй болон харгын ажахы хүгжөөлгын сайд Сергей Козлов, энэ тушаалда 9-һөө дээшэ жэл хүдэлөөб гэжэ тэмдэглэбэ.
- Мүнөөдэр намда баяртайшье, гунигтайшье үдэр. Би Буряад Уласай транспортын сайдай тушаал өөрынгөө дураар сүлөөлнэб. Һайса бодомжолоод, энэ шиидхэбэри абтаа. Транспортын сайдай тушаалда 9 жэлһээ дээшэ хүдэлжэ, уласай хангалгын байгууламжа, ажаһуугшадай байдал һайжаруулха талаар зорилгонууд үдэр бүри бэелүүлэгдээ.
Буряад Уласай Толгойлогшо Алексей Самбуевич Цыденовтэ намда үзүүлһэн дэмжэлгэ, найдал болон аша үрэтэйгөөр суг хүдэлһэнэй түлөө баяраа мэдүүлнэб. Тиихэдэ суг хүдэлһэн нүхэдтөө, Вячеслав Владимирович Наговицындэ баяр хүргэнэб.
Эдэ жэлнүүдтэ транспортын яаманда ехэ ажал ябуулагдаа, хэдэн зуугаад модоной зайда харгынууд баригдаа, Байкал аэропортдо ниидэлгэ-буулгын зуруудай һэльбэн шэнэдхэлгэ хэгдэнэ, зайн галай түлөө түлбэри доошолуулугдана, һайн шанартай интернет болон гар утаһанай холбоо татагдана. Буряад Уласай ажаһуугшад, олониитын эмхинүүд, олондо мэдээсэл тараадаг хэрэгсэлнүүдтэ баһал баяраа мэдүүлнэб. Һайн даа! – гэжэ Сергей Козлов хэлэбэ.
Буряад Уласай Засагай газарай хэблэлэй албанай гэрэл зураг
