​Ородой Холбоото Уласай болбосоролой ба эрдэм ухаанай сайдай орлогшо Татьяна Синюгина - Байгалай болбосоролой хуралдаанда

Ородой Холбоото Уласай болбосоролой ба эрдэм ухаанай сайдай орлогшо Татьяна Синюгина авгу­стын 15-һаа 17 болотор Улаан- Үдэ хотодо болохо VII Байгалай болбосоролой хуралдаанда ха­баадаха.

Хуралдаанай түрүүшын үдэр Засагай газарай зүблөөнэй заал соо болбосоролой байгуулга­да засагай хүтэлбэри шэнэдхэхэ асуудалнуудаар дүхэриг шэрээ үнгэрхэ. Татьяна Синюгина “Бол­босоролой байгуулгын засагай хүтэлбэри хүгжөөхэ. Нютаг можо­нуудай түхэл шэнжэ” гэһэн сэдэбээр элидхэл табиха.

Мүнөө дээрээ Буряад Улас Оро­дой Холбооной Уласай 20 нютаг можонуудай тоодо нютаг можону­удта болбосоролой хүтэлбэриин ашагтай аргануудые нэбтэрүүлхэ талаар туршалгын түсэл бэелүүлгэдэ хабаадаха. Тус түсэл болбол, нэн түрүүн болбосоролой байгуулгые хүтэлхэ ашагтай механизмуудые олохо зорилготой. Тэдэ механизмууд соо болбосоро­лой байгуулга һомололго, болбо­соролой ябаса эмхидхэхын тула хэрэгтэй нүхэсэл бии болголго ба тус асуудалда үргэн ниитые хабаадуулга юм.

Татьяна Синюгина тус түсэлэй үндэһэн болохо гол заршам­да онсо анхаралаа хандуулха­даа, болбосоролой ажал ябуул­гын хүтэлбэриие нэгэ тээшэнь түблэлгэ ба нютаг можонуудай өөрөө шиидхэлгэ хоёрые ухаантайгаар холбохо заршам тухай хэлэнэ.

Тус түсэлдэ Буряад Улас хабаа­дахадаа, өөрын хүтэлбэриин ажал ябуулгын бүхы шэлгэлнүүдтэ ху­билалтануудые оруулха: болбосо­ролой хүтэлбэриин зургаануудые, сангай-эдэй засагай зургаануу­дые ба хүнэй нөөсэ хүгжөөхэ зур­гаануудые шэнэлэлгэ болоно.

Мүнөө дээрээ туршалгын нютаг можонуудта болбосоро­лой хүтэлбэриин нютаг можын түхэлые хубилгаха дүрбэн янза дурадхагдана: болбосоролой эмхинүүдэй эмхидхэн байгуулагшадай бүрин эрхэнүүдые муниципальнаһаа нютаг мо­жын мэдэлдэ зөөритэйнь хамта дамжуулга; болбосо­ролой эмхинүүдэй эмхидхэн бай­гуулагшадай бүрин эрхэнүүдые муниципальнаһаа нютаг можын мэдэлдэ зөөригүйгөөр дамжу­улга; муниципалитедтэй хэлсээ баталха, тэндэнь болбосоролой стандартнуудые бэелүүлгэдэ, муниципальна байгууламжада тэдхэмжэ үгэхэ бүхы нүхэсэл хэ­лэгдэхэ; нютаг можын ба муници­палитедэй хоорондо болбосоро­лой эмхинүүдые хамта эмхидхэн байгуулга болоно.

2019 оной сентябриин 1-һээ туршалгын түсэл шэнэ шатада гаража, бүхы нютаг можонуудта нэбтэрүүлэгдэхэ юм.

Буряад Уласай Болбосоролой болон эрдэм ухаанай яаманай хэблэлэй албанай гэрэл зураг