Гэрэл зураг selhoz.guru
Эрхүү можодо, Буряад Уласта болоод Үбэр Байгалай хизаарта һүүлэй жэлнүүдтэ хоморой мал үсхэбэрилдэг болонхой гээд, олондо мэдээсэлгын албанууд дуулгана. Олзотойл хадань олоор барина ха. Үсөөн тоотой иимэ үмсын ажахынууд тухай зураглал дурадханабди.
Унгар (венгр) үүлтэрэй эреэн гахайнууд буряад дайдада угаа таарадаг юм байна. Тэдэ гахайнууд ямаршье жабар тэсэнэд. Харин мяханиинь юрын гахайнуудта орходоо амтатай.
Унгар үүлтэрэй эреэн поршоонхын долоо хоноод байхада, зорюута ошожо харабабди. Байһан юумэ байһан соонь нэрлэжэ һураһан хадаа унгар мангалица үүлтэрэй поршоонхотой дайралдабабди гэжэ сэхэ руунь хэлэе. Тэдэниие эгээлэй гахайнуудһаа бэлэн мүртэйгөөр илгахаар. Жэрхинүүдэй нюрган гү, али бодон гахайн нюрган эреэн байгша гүб даа. Эгээл тэрээн шэнги мангалицануудай нюрган эреэн байна. Унгар үүлтэрэй гахайнууд дайралдаһан юумэ эдеэд, түргэн ургадаг, жабартай уларилда ядалдадаггүй, нилээн шэрхи амитад юм. Бэеэ хүсэһэн унгар гахай дүрбэн центнертэ хүрэдэг байхадань, буряад дайдада ажаһуугаа гахайшад тэрээндэнь орожо, мангалицануудые үдхэнэ.
- Унгар үүлтэрэй гахайнуудай мяхан түмэрөөр баян. Тэрэнэй өөхэн холестерингүй. Ушар иимэһээ дүшэ гарабал, эгээл иимэ гахайн мяха шанажа эдихэдэ зүйтэй. Зүрхэ муутай, үдхэн шуһатай, хүйтэ абаагүй аад, найтаажа зободог зондо энэ мяхан аюулгүй юм», - гэжэ тэдэниие үдхэдэг Эрхүү можын Братска аймагта ажаһуудаг Ирина Кускова зугаална.
Сагай һайн байхада, Чех гүрэнһөө хэдэн үүлтэрэй ямаануудые Буряад орон руу энэл айлайхин асаржа үрдеэ. Европоһоо ерэһэн ямаадай олонхинь мухар юм. Хэды тиимэ байбашье, һүөөрнь олон янзын амтатай гэгшын биһалаг сыр буйлуулагдана.
Буряадай Хори аймагта Василий Жимбуевич Бальжинов Цындыма Дымбрыловна Дашинимаева гэгшэд баһал венгр үүлтэрэй гахайнуудые тэжээнэ. Гадна вьетнам үүлтэрэй гахайтай болонхой. Үшөө тиихэдэ эдэ хоёр үүлтэрээ ороондо оруулаад, “кармалы” гэжэ шэнэ үүлтэр гаргаһан байна.
Анханһаа һонюуша Цындыма Дымбрыловна дүрбэн жэлэй саана Выдрино тосхондо эгээлэй бэшэ эдэ гахайнуудай наймаанда байhыень Интернет сүлжээнһээ мэдээд, ошожо асарһан юм. Түрүүшынхиеэ ороондо оруулхадань, аяар 13 поршоонхо түрэһэн байна. Тиигэһээр гахайнуудынь үдэжэ, олон боложо эхилээ бэлэй. Венгриһээ гарбалтай мангалица гахайн гол илгаань гэхэдэ, шэрүүн уларилые тэсэхээр ута үдхэн нооһотой, тэрэнь үбэлдөө буржыгаад байдаг юм. Тиихэдэ вьетнам үүлтэрэй гахайн хүлнүүдынь богони, гүзээнь газарта хүрэтэр һанжаад байдаг.
Теэд тон сэнтэйнь гэхэдэ, эдэ гахайнууд үбһэ ногоо эдидэг. Тэжээлдээ огородой ургамал нэмэхэдэ болоно. Тиихэдээ бага багаар хооллуулха хэрэгтэй.
Вьетнам үүлтэрэй гахайнууд ехэ ухаатай, сэбэршэ юм. Нэгэл газарта шабааһаяа орхидог тулань, заримашуул гэртээ үсхэбэрилдэг байна. Үбэлдөө түрэхэдэнь, гэртээ байлгаһамнай, үүдэ тоншоод, газаашаа гараад ерэдэг байгаа гэжэ Цындыма Дымбрыловна хөөрэнэ.