Гэр бүлын архивһаа гэрэл зураг
Хүн бүхэн энэ алтан дэлхэй дээрэ ажамидаржа ябахадаа, Эхэ орондоо, түрэл нютагтаа, арад зондоо туhатай ябаха гэжэ оролдодог. Манай үсөөн тоото буряад арадта урдаа хараха, залиршагүй одон мэтэ яларжа, Буряад нютагаа суурхуулhан, суурхуулжа ябаhан хүнүүд олон. Нютагтаа мэдээжэ, арад зондоо хүндэтэй Чимитцыренов Цыренжаб Ширеторович тэдэнэй нэгэниинь болоно гэхэдэ алдуугүй.
Хүн болохо багаhаа…
Минии нагаса Чимитцыренов Цыренжаб Ширеторович 1948 ондо июлиин 16-да юрын ажалша малша Ламажап Цыренович Дулгар Эметхеновна хоёрой бүлэдэ гурбадахи үхибүүн боложо түрэhэн намтартай. Дайн дажарай хойнохи хүшэр жэлнүүдтэ түрэhэн хадаа элдэб юумэ яhала үзэhэн юм. Табатайхан байхадаа, хайрата абаяа гээжэ, Буянто Ширеторович Екатерина Ширеторовна хоёр аха, эгэшэеэ дахажа, ажал хэжэ, хубсаhа хунарайнгаа, ном сударайнгаа алта мүнгэ өөрөө оложо эхилhэн. Аха эгэшэ хоёрhоо дутуугүй ажал хэжэ, Цэдэнжэб, Цыбикжап дүүнэрээ хойноо дахуулжа, эжын тулга түшэг болохо гэжэ ехэтэ оролдодог бэлэй.1955 ондо Хонхинын эхин hургуулиин богоhо алхажа, эрхим багшанарай дали доро абтажа, ехэ шударгыгаар, оролдосо, эрмэлзэл ехэтэйгээр эрдэм номоо шудалжа эхилээ hэн. Һүүлээрнь 1965 ондо Бархан нютагта дунда hургуули нээгдэжэ, түрүүшын дальбараануудай тоодо орожо, наhанай үргэн харгыда гараа бэлэй. Бүри жааханhаа минии нагаса эрхим, талаан бэлигтэй, дүй дүршэлтэй мэдээжэ багшанарай дали доро эрдэм номдо hуража байха үедөө багшын мэргэжэлдэ ехэтэ дурлажа, багша болохоб гэжэ hанадаг hэн.
Эрхим хүндэтэй, бэлиг ехэтэй хүтэлбэрилэгшэ
Түрэл hургуулидаа технологиин багшаар ажаллажа байха үедөө Сэрэгэй албанда татагдажа, «старший сержант» гэhэн нэрэ зэргэтэй нютагаа бусаhан юм. Эрхим бэрхээр албаяа дүүргэжэ ерээд, түрэл Ленинэй нэрэмжэтэ колхозой комсомольско организациин секретаряар, hүүлээрнь комсомолой путёвкоор түрэл hургуулидаа сэрэгэй эхин бэлэдхэлгын багшаар эльгээгдэhэн байна. Эгээл энэ үеhөө ажалайнь баян намтар эхилээ гэхэдэ алдуугүй.
«Һанаhандаа хүрэжэ, hарбайhанаа абаха» гэhэн мэргэн үгэ нагасадамни хабаатай гэжэ hананаб. 1979 ондо Буряад АССР-эй Эрдэм ухаанай министерство 31 наhатай залуухан хүбүүнэй ажалша, оролдосо ехэтэй, урагшаа hанаатай, үнэн сэхэ, онсо журамтайень мэдэжэ, Барханай hургуулиин толгойлогшоор томилоо юм. Толгойлогшын тушаалда байха үедөө Буряадай гүрэнэй багшанарай дээдэ hургуулида түүхын hалбари дүүргэжэ, түүхын хэшээлнүүдые заажа эхилээ бэлэй. Цыренжаб Ширеторович ударидагшын, багшын тушаалда ажаллахадаа, hургуулиин ажабайдал hонирхолтой болгохо, ерээдүйн халааниие дүрбэн тэгшээр хүмүүжүүлхэ гэжэ ехэтэ оролдодог байгаа. Ударидагшын тушаалда ябахадаа, колхозой дарга Цыренов Владимир Дармаевичтай эб хамта ажаллажа, шэнэ спортын байшан, машина-тракторай байра, түхэреэн жэлдэ хүдэлхэ теплицэ, хүүгэдэй сэсэрлиг гэхэ мэтые ашаглалгада оруулжа, hургуулиин ажабайдалда яhала ехэ олон шэнэ юумэ нэбтэрүүлһэн юм. Энэ ехэ харюусалгата тушаал даажа ябахадаа, үхибүүн бүхэнэй зүрхэ сэдьхэлдэ онсо түлхюур оложо, түрэлхидтэйнь урин хандасатайгаар хөөрэлдэжэ, коллектив соогоо аятай зохид байдал тогтоожо шадаха онсо бэлигтэй хүтэлбэрилэгшэ байhан юм. Богонихон саг соо ударидажа ябаhан hургуулияа Буряад орон, аймаг дотороо суутай болгожо шадаhан юм.
Аалин даруу зантай, хурса бодолтой, ажалай жолоо шангаар барижа шадахыень сэгнэжэ, нютагайхидынь 1990 ондо hомоной түрүүлэгшээр hунгаа бэлэй. Тэрэ хүндэ жэлнүүдтэ Цыренжаб Ширеторович нютагайнгаа хүгжэлтын орёо асуудалнуудые шиидхэжэ, зоной байдал hайжаруулха гэжэ ехэтэ оролдожо, тэрэ сагай эрилтын хэмжээгээр нютагаархидтаяа эб хамта ажаллажа, тэдэнээ зүбөөр ударидажа ябаhан габьяатай. Энэ тушаалда ажаллаха үедөө нютагтаа олониитын ехэ ажал ябуулжа, аймаг дотороо нэн түрүүн ветерануудай Совет, эхэнэрнүүдэй совет, ТОС-уудые байгуулаа. Мүнөө hомоной залуу ударидагша Шагшаев Баяр Михайлович энэ эхилhэн ажалыень амжалтатайгаар үргэлжэлүүлжэ, нютагаа суурхуулжа байнхай.
Арадайнгаа алтан түүхын абдарые арад зондоо дамжуулагша
Чимитцыренов Цыренжаб Ширеторович 1992 ондо hургуулияа бусажа, хэшээл заахаhаа гадуур, Барханайнгаа түүхын, нютаг ороноо шэнжэлэлгын музейн ударидагшаар ажаллажа эхилээ бэлэй. Багшанарай, hурагшадай, нютагаархидай хабаадалгатайгаар музей hэргээлгын ехэтэ ажал ябуулагдажа, баргажан буряадууд тухай түүхын материалнууд, hонирхолтой 2500 гаран урданай ба мүнөө сагай экспонадууд суглуулагдаа. 1996 ондо Цыренжаб Ширеторовичэй үүсхэлээр, багшанарай коллективэй дэмжэлгээр, музейн байгуулагдаhаар, 40 жэлэй ойдо зорюулагдажа, музейн үндэhэ hуури табигша Г-Д.Э.Дамбаевай нэрэ олгогдоо бэлэй. Мүнөө Бархан нютагаймнай Г-Д.Э. Дамбаевай нэрэмжэтэ арадай музейдэ гансашье аймагайхидhаа гадна, хари гүрэнhөө ерэhэн айлшад, аяншалагшад орожо, музейн баян дансануудаар hонирхон, баяраа мэдүүлжэ ошодог. Ударидагшын оролдолгоор музей соо этнографиин, түүхын, hомоной, колхозой, сэрэгэй ба соёл болон искусствын 5 таhаг эмхидхэгдэнхэй.
Олон жэлэй хугасаа соо иимэ үрэ дүнтэйгөөр ажаллаhан, оролдосотой, харюусалгатай, шадамар бэрхэ ударидагшын хүсэ шадалаар Барханай арадай музей республикын эрхим музейнүүдэй тоодо ороhониинь гайхалгүй.
Цыренжаб Ширеторович түрэл hургуулиингаа 100 жэлэй ойдо зорюулжа, «Барагханская средняя школа – лидер образования» гэhэн ном 2008 ондо, «Живая память поколений» гэhэн хоёр ном Агууехэ Эсэгэ ороноо хамгаалгын дайнай 65-дахи, 70-дахи ойн баярнуудта зорюулан, хэблэлдэ гаргаа бэлэй. Энэ хоёр ном соогоо Агууехэ дайнда мордоhон, дайнhаа бусаагүй, нютагтаа ажаhуужа байhан дайнай ба ара талын ветеранууд тухай тон дүүрэнээр, эли тодоор бэшэжэ, нютагай, аймагай, республикын ажаhуугшадай, засаг зургаанай үндэр сэгнэлтэдэ хүртөө. 47 жэл соо аймагайнгаа «Огни Курумкана» сониной штатна бэшэ корреспондентээр ажаллажа, залуушуулые хүмүүжүүлгэ, дайнай болон ара талын ветерануудай ажаябуулга, нютагайнгаа, аймагайнгаа социальна-экономическа хүгжэлтэ, тоонто нютагайнгаа арад зон ба түүхэ тухай hонин статьянуудые хэблэжэ байдаг. 2015 ондо нагасымни ехэ эдэбхи үүсхэлээр, Бархан нютагта Илалтын 70 жэлэй ойдо зорюулагдаhан, дайнда унаhан сэрэгшэдэй нэрэнүүдые мүнхэлүүлхэ гэhэн түсэбтэйгөөр мемориальна комплекс баригдаа, Алдар солын аллей нээгдээ, Элhэн нютагта хүшөө һэльбэн шэнэлэлгэдэ ороо. Олон жэлэй хугасаа соо бэдэрэлгын, шэнжэлэлгын аргагүй ехэ ажалай ашаар, Агууехэ дайнда hураггүйгөөр үгы болоhон Бархан нютагай 52 сэрэгшэдэй унаhан, хүдөөлүүлэгдэhэн газарнууд олдогдоһониинь сэгнэшэгүй.
Арад зондоо аша габьяатай
Минии нагаса багахан Хонхино тоонто нютагайнгаа хүгжэлтэдэ ехэхэн лэ хубитаяа оруулhан. 2001 ондо Цыренжаб Ширеторовичэй үүсхэлээр, «Зориг» колхозой 70 жэлэй ойдо зорюулагдаhан «День малого села Хонхино» гэhэн hайндэр түрүүшынхиеэ үнгэргэгдэжэ, мүнөө заншалта болонхой. Энэ хэмжээ ябуулгын ашаар Хонхино нютагта ехэ hэргэлгын ажал бүтээгдээ: хүдөөгэй соёлой байшан, номой сан, фельдшерскэ-акушерскэ пункт заhабарилгада ороо, стадион баригдаа, үйлсэнүүд hэргээгдээ. Энэнь хонхинойхидто ёhотойл бэлэг болоо бэлэй. Мүнөө үедэ түрэл тоонто Хонхино нютагайнгаа түүхэ, арад зон тухай номоо хэблэлдэ бэлдэжэ байнхай. Хүйhөөрөө холбоотой тоонто нютагайнгаа хүгжэлтөөр, байра байдалаар мүнөөшье hанаата боложо байhан иимэ зоноор одоол омогорхомоор лэ!
Мүнөө нагасамни үндэр 70 наhанай дабаанда хүрэбэшье, олониитын ажаябуулгада, нютаг нугынгаа ажабайдалда хабаадажа, ургажа ябаа залуу үетэнэй ёhо заншалаа, түүхэеэ, уг гарбалаа мэдэжэ, нютагайнгаа аха захатаниие танижа, хүндэлжэ ябахын талаар хүмүүжүүлгын ажал ябуулhаар зандаа. Энэ бүхы ажалдаа тон харюусалгатайгаар, үрэ дүнтэйгөөр, элэшэгүй эрмэлзэлтэйгээр ажаллаhанайнгаа түлөө Буряад Уласай, Россиин олон тоото хүндэлэлэй грамотануудаар, медальнуудаар шагнагданхай. «Отличник народного просвещения», «Заслуженный работник народного образования РБ», «Ветеран труда», «Лучшие люди Баргузинской долины» гэhэн үндэр нэрэ зэргэнүүдтэ хүртэhэн юм. 2018 ондо «Трудовая доблесть» гэhэн орденоор, Бүхэроссиин ветерануудай хорооной президиумhээ «Хүндэлэлэй тэмдэг» гэhэн медаляар шагнагдаа.
Yнэр баян, үлзы хэшэгтэй гэр бүлэ
Онсо журамтай, олон үгэ зугаагүй, сагаан сэдьхэлтэй, урагшаа hанаатай, зөөлэн харасатай нагасамни олон бүлэнүүдтэ жэшээ боломоор аба, нагаса баабай, хүгшэн аба гэжэ hанадагби. Наhанайнгаа нүхэр Сурена Санжиевнатаяа суг хамта олон жэлдэ багшаар ажаллажа, 46 жэл соо аятай зохидоор ажабайдалаа зохёожо, 5 үхибүүдые үргэжэ, дээдэ мэргэжэл үгэжэ, 11 аша зээнэрэйнгээ дулаахан дүхэриг соо жаргажа, түрэл тоонто Бархан нютагтаа ан бун ажаhууна.
Людмила ЖИГЖИТОВА