​Ариг сэбэр Байгалай түлөө анха түрүүшынхиеэ урилдаба

Августын 12-то Байгал далайн эрьедэ анха түрүүшынхиеэ марафон-урилдаан үнгэргэгдэбэ. Буряадай мэдээжэ тамиршан, дэлхэйн чемпион Наталья Соломинская энэ хэмжээ ябуулга “Бидэ ариг сэбэр Байгалай түлөөбди!” гэһэн уряа доро эмхидхээ.

Марафон хадаа Баргажан болон Прибайкалиин аймагуудта болоһон байна. Эдэ Байгал далайн дэргэдэ оршодог аймагууд гээд мэдэнэбди. Тиигэжэ Байгалай эрьеэр гүйлдэхэеэ 5 гүрэнэй, Ородой хэдэн можо хизаарнуудай болон Буряадай 500 гаран тамиршад хабаадаһан байна. Эмхидхэгшэд тамиршадта дүрбэн зайда харгы гаталхыень дурадхаа. Эгээл утань 42 километр 195 метр болоно бшуу. Мүн дуратайшуул 21, 10 болон 3 километр зайда гүйхэ аргатай байгаа.

Классическа марафоной зай (42 км.195 м.) эгээл түргөөр Монголой тамиршан Олдбаяр Болдоо гаталаа. Илаһан тамиршанай саг гэхэдэ, 2 час 31 минута болоно. Мүн эхэнэрнүүдэй дунда Новосибирск хотын Елена Рухляда 2 час 44 минута сагтайгаар түрүүлээ. Эдэ хоёр гол шанда - 150 мянган түхэригтэ хүртөө. Буряадай тамиршад сооһоо 7-дохи саг Николай Вербицкий харуулаа.

40-49, 50-59, 60-69 наһанай бүлэгүүдтэ Аркадий Белоусов, Владимир Мункоев, Евгений Лапшин, Олеся Нургалиева гэгшэд нэгэдэхи һууринуудые эзэлээ.

Хахад марафоной зай 21 километр 95 метр юм. Эндэ Дмитрий Гаврилов болон Наталья Руденко гэгшэд түрүү һууринуудые эзэлээ. Андрей Климов, Анна Самарцева, Цырен Чирнинов, Геннадий Мармушев болон 73 наһатай Булат Зарбуев гэгшэд өөрын наһанай бүлэгүүдтэ түрүүлээ. Дээрэхи гэрэл зураг буулгаһан Дмитрий Алтаев 60-69 наһанай бүлэгтэ шангай хоёрдохи һуурида гараа.

10 километр зайда Роман Троценко болон Анастасия Гумарова бусадһаа урид гүйжэ гарабад. Эндэ боксоор Ородой чемпионадта мүнгэн медальда хүртэһэн Людмила Воронцова гурбадахи һуури эзэлээ.

2019 ондо бүри олон хүнүүд тус хэмжээ ябуулгада хабаадаха бэзэ гэжэ Наталья Соломинская найдан үлөө.

Дмитрий Алтаевай гэрэл зураг