Болот Цоктоевой гэрэл зураг
Буряадай барилдаашад сооһоо РСФСР-эй чемпион боложо шадаһан Михаил Елбаскинай мүнхэ дурасхаалда зорюулагдаһан бүхэ барилдаагаар мүрысөөн Ойхон нютагтань үнгэргэгдэһэн байна.
Михаил Елбаскин элүүр мэндэ ябахадаа, 1990-ээд онуудһаа абаад, өөрын нэрэтэ мүрысөө эмхидхэдэг байһан. Наһа бараһанайнь удаа үри хүүгэдынь, аха дүүнэрынь энэ заншалыень үргэлжэлүүлэн, буряад барилдаашадые суглуулдаг болоһон. Мүнөө жэл энэ тулалдаан гурбадахияа болобо гэжэ хэлэлтэй.
Залуушуулай дунда Эрхүү можын ургажа ябаа бэлигтэй барилдаашан Фёдор Балтуев илалта туйлаа. Тэрэ 2017 ондо эдиршүүлэй дунда Ородой, Европын болон дэлхэйн абарга болоһон намтартай.
Ехэшүүлэй дунда Балдан Цыжипов түрүүлжэ гараа. Һая болоһон Ородой чемпионадта тэрэ бирагүйдэбэшье, буряад бүхэ барилдаагаар илалтануудые туйлаһан зандаа. Балдан байгша ондо уласай “Наадан-Сурхарбаанай” болон бүгэдэ буряадуудай “Алтаргана” нааданай абарга болоо гээд һануулая.
Балдан Цыжипов Ойхондо түрүүшынхиеэ илалта туйлана бэшэ. Тэрэ 2016 ондо түрүүшын мүрысөөнэй абарга болоо һэн. Мүн Ёрдын наадануудта хэдэн дахин амжалта туйлаа.
Тус мүрысөөндэ эдиршүүл 10 шэгнүүртэ түрүү һуури эзэлхын түлөө тулалдаа. Ехэшүүл дүрбэн шэгнүүртэ эрхимүүдые элирүүлээ. Буряад Уласта ганса гурбан шэгнүүртэ барилдаан болодог гээд һануулая. “Алтаргана” гэһэн бүгэдэ буряадуудай һайндэр үнгэргэһэн Эрхүү можынхид барилдаанай мүрысөө баһа дүрбэн шэгнүүртэ хээ бэлэй.