666
Августын 19-дэ Буряад Уласай Толгойлогшо Алексей Цыденов албанай хэрэгээр Тарбагатай аймаг гаража, аймагай байгуулагдаһаар 95 жэлэй ойн баярта зорюулагдаһан хэмжээ ябуулгануудта хабаадаба.
«Тарбагатай аймагта, үнэхөөрөө, шэмээшэгүүдэй, эртын үнэн алдартанай дэлхэйн түб гэхэдэ алдуу болохогүй. Хэр угһаа хойшо ёһо заншалаа нангинаар сахижа ябанат. Танда айлшаар ерэһэн хүн бүхэн танай ёһо заншал, соёл урлаг хаража, гайхажа, һонирхожо ошодог. Бишье Тарбагатай аймаг айлшалан ябахыень дуратайгаар уридагби. Ородой Холбоото Уласай энэ холын газарта иимэ һонирхолтой газар, Десятниково мэтэ һууринууд, хүндэмүүшэ арад зон ажаһуудаг гэжэ мэдэхэгүй байна ха юм.
Тарбагатай аймаг бэрхэшээлтэйшье, урагшатайшье жэлнүүдые дабан гараа. Мүнөөшье олон хубилалтанууд хүлеэгдэнэ. Харгы баригдана, хангалгын байгууламджа һайжаруулагдана, паркнууд һэльбэн шэнэлэгдэнэ, хүүгэдэй амбулатори баригдаа. Буряад Уласай Засагай газарай дэмжэлгээр баригдаһан һү һаалиин фермэдэ мүнөөдэр хүрэһэн байнабди. Саашадаа хубилалтанууд боложо, ажабайдал һайжаруулагдаха. Манайл хүсэнһөө дулдыдана», - гэжэ Алексей Цыденов баяр ёһололой хэмжээ ябуулгада хэлэбэ.
Тарбагатай аймагта «Аюулгүй, һайн шанартай харгынууд» болон «Болбосон түхэлтэй хотын оршон байгуулга» гэһэн түсэлнүүд бэелүүлэгдэнэ. Алексей Цыденов аймаг дотор баригдаһан хангалгын байгууламжын түсэлнүүдэй нээлгын баяр ёһололдо хабаадалсаа.
Удаань уласай хүтэлбэрилэгшэ талха таряа хаража, Большой Куналей нютагай Сергей Заигравай ажахыда хүрэһэн байна. Энэ ажахы һүүлэй хоёр жэлэй туршада гүрэнэй тэдхэмжэ - 22 сая түхэригтэ, хүртэжэ, тарилгын «Кузбасс» комплекс болон бусад техникэ худалдан абаһан юм. Тиихэдэ «Буряад уласай агропромышленна комплекс болон хүдөө нютагуудые хүгжөөлгэ» гэһэн уласай 8,9 сая түхэригэй грантда хүртэһэн Дмитрий Дампиловай гэр бүлын һүнэй фермэ Алексей Цыденов хараба.
Тиихэдэ уласай хүтэлбэрилэгшэ хүдөө ажахын һалбариин хүдэлмэрилэгшэдтэй уулзаа. Талха таряанай үрэһэ худалдан абалгада үгтэдэг тэдхэмжын гурим хубилгаха тухай, орооһо хадагалха талмай ехэ болгохо, элеваторнуудые олошоруулха тухай хүдөө ажахы эрхилэгшэд Алексей Цыденовтэ хандаба. Буряад Уласай Толгойлогшо Уласай хүдөө ажахын болон эдеэ хоолой яаманда эдэ асуудалнуудые шиидхэхэ талаар ажал ябуулха гэжэ даалгаба.
«Мүнөө жэл улас дотор талха таряан ехэ һайн. Полинуудые харааһанай удаа, гектар газарһаа 35 центнер ешмээн абахааар хүлеэнэбди. Мүнөө талха таряагаа хуряажа, тэрэнээ худалдаха гээшэ түрүүлэн бэелүүлхэ зорилго болоно. Тиихэдэ гүрэнэй талаһаа тэдхэмжэ үзүүлэгдэһээр лэ байха, хойто жэлдэ үшөө һайн дүнгүүдые туйлахабди. Шиидхэгдэхэгүй асуудалнууд үгы», – гэжэ Алексей Цыденов тэмдэглэбэ.
Буряад Уласай Засагай газарай хэблэлэй албанай гэрэл зураг
